Aserfallatsaaliuinermut aningaasat attorneqassanngillat

Naalakkersuisut attartornermut inatsimmik nutaamik nutarterneqartumillu aningaasat inissiap aserfallatsaaliornissaanut akiliutigineqartut amigartoortoqartillugu matussutitut atorneqaratarsinnaanerat pinngitsoortinniarpaat.

Inatsit nutaaq maanna tusarniaassutigineqartoq aserfallatsaaliuinermi kinguaattoorujussuarnik, koruuninik milliardilinnik nalilimmik, iluarsaassinermut atatillugu aaqqissuusseqqinnermi pingaarutilimmik ilaassaaq.

- Inatsisissatut siunnersuut attartortup attartortitsisullu akornanni pingaarnertigut pissutsinik allannguinngilaq, aalajangersakkalli katersorlugit erseqqissarlugillu, taamaalilluni inatsisit paasiuminarnerusumik ullutsinnullu naleqqunnerusutut inissisimalerlutik, attartornermut inatsimmut nutaamut siunnersuummi allassimavoq.

Aaqqiissutissat

Inissianik attartornermut inatsit maanna atuuttoq piffissap ingerlanerani inatsisitigut allanngortinneqartarsimavoq, taamaammallu naammassineqarnissaanut nutarterneqarnissaanullu piffissanngorsimassaaq.

Inatsit nutaaq assigiinngitsorpassuartigut nutarterneqarpallaanngilaq, tusarniaanermili paasissutissiissutigineqartutut, immikkoortumili ataatsimi erseqqissaanerit sukaterinerillu iluarsaaqqinnissamik kinguaattoornerup ajornartorsiutaanerata qaangernissaanut iluaqutaasinnaapput.

Aningaasat inissiap aserfallatsaaliornissaanut akiliutit Immikkoortoq 16 naapertorlugu siunertamut aalajangersimasumut immikkoortinneqartariaqarput, taamaalillutillu amigartoorutigineqartunut matussusiinermut atorneqaqqusaassanngillat.

Inatsimmut nassuiaammi immikkoortoq 16-imi ima allassimavoq:

Nutarsaaneq

Attartornermut inatsimmut nutaamut siunnersuummi inatsisitigut suliarineqarsimasut ima nassuiarneqarput:

- Allannguisaqattaartuarnerit kingunerisimavaat inatsisitigut tunngaviusup ilaannakuusutut isikkoqalersimanera, ataatsimullu allanneqarnissaanik malittarisassallu nutarterneqarnissaannik piviusumik pisariaqartitsisoqalersimalluni.Inatsisissatut siunnersuummi matumani siunertaq tassaavoq inatsisartut peqqussutaata atuuttup ataatsimoortumik Inatsisartut inatsisaannik taarserneqarnissaa, manna tikillugu tunngaviusumik pingaarutilinnik ingerlatitsiinnartoq, kisiannili piviusunut atuuttunut, ullumikkut inissiat ilusaannut tulluarsarneqarsimasoq aamma pisortat attartortitsisarneranni aaqqissugaanikkut allannguuteqartoq. 

- Inatsisissatut siunnersuut attartortup attartortitsisullu akornanni pingaarnertigut pissutsinik allannguinngilaq, aalajangersakkalli katersorlugit erseqqissarlugillu, taamaalilluni inatsisit paasiuminarnerusumik ullutsinnullu naleqqunnerusutut inissisimalerlutik.Siunnersuummi ataasiakkaanik nalimmassaasoqarpoq, ilaatigut inissiani namminersortuni pigineqartuni attartortut Ineqarneq pillugu maalaaruteqartarfimmut isumaqatigiinngissutit suliarineqarsinnaanngorlugit kiisalu pilersaarutaasumik piffissakkaartumik aserfallatsaaliineq (PPA) pisortat attartortittagaanni maleruagassat eqqunneqarnissaat. 

- Namminersorlutik attartortitsisartut ineqarnermut akiliummik aalajangersaasarnerat, aserfallatsaaliisarnerat, attartornermik taamaatitsineq atorunnaarsitsisarnerlu ingerlatiinnarneqarput.Siunnersuut isigineqassaaq ineqarneq pillugu aaqqissuusseqinnermut suliaqarnermi tunngaviulluinnartutut, ullutsinni tulluarnerusumik ataqatigiinnerusumillu inatsisitigut toqqammavissatut nunatsinni.

Ukiunut qulinut pilersaarusiaq

Inatsisissatut siunnersuut nutaaq amerlanerussuteqartut IA aamma Siumut ukiuni qulini pilersaarusiamik arlalinnik immikkoortortaqartumi saqqummiussimmata 2024-mi maajimi naalakkersuinikkut isumaqatigiissummik tunngaveqarpoq.

Aamma atuaruk: Ukiuni qulini isumaqatigiissut milliardilikkaat kinguaattoorutaanerannut iluaqutaassaaq

Sermitsiaq taamanikkut pilersaarutit assigiinngitsut saqqummiunneqartut ima nassuiarpai, oqallisaasinnaasut politikkikkullu ulorianarsinnaasut tunngavigalugit, taamanikkut Naalakkersuisut ukiut arlallit ingerlaneranni isumaqatigiinniarsimasut:

Najugaqatigiiffiit aningaasaqarneranni oqimaaqatigiissitsineq - Namminersorlutik Oqartussat inissiaataanni ineqarnermut akiliutip ingerlatsinermut aserfallatsaaliuinermullu pissusiviusuni aningaasartuutinut naapertuunnissaata qulakkeerneqarnissaa.

Ineqarnermut tapiissut pillugu aaqqissuusseqqinneq nutaaq - Ineqarnermut akiliutip naleqqussarneqarneranik piviusunngortitsinermut atatillugu innuttaasunut aningaasaatikitsunut aningaasaqarneq pillugu toqqissisimatitsinissaq.

Namminersorlutik Oqartussat inissiaataannik iluarsaassinissamik suliniuteqarnissaq - inissianik aserfallatsaaliuisimannginnerup annertusiartornissaata unitsinneqarnissaa -iluarsaassinermut suliniutissanik aningaasalersuinissamut, ineqarnermut akiliutip ingerlatsinermut aserfallatsaaliuinermullu pissusiviusuni aningaasartuutaasartunut naapertuunnissaa pisariaqarpoq.

Illuliortiternernut aningaasalersueriaatsinik naleqqussaaneq - innuttaasut aaqqissuussinernut periarfissaqarnerat pitsanngorsarneqassaaq, taamaalillutik innuttaasut ineqarnikkut imminut pilersornissamut periarfissaqarnerat qulakkeerneqassalluni. Attartortuunermit piginnittuunermut periarfissat pitsanngorsarneqarnissaannut periarfissat immikkut ittumik ukkatarineqassasut kissaatigineqarpoq.

Sulisunut inissianut tunngaviusut - sulisunut inissianik atuisarneq annikillisinneqassaaq. Sulisunut inissianik atuinermut tunngavinnik kiisalu killissanik inatsisissatut siunnersuummik suliaqartoqassaaq.

Attartornermut inatsit nutaaq pillugu tusarniaaneq apriilip pingajuannut killeqarpoq.