USA-p præsidentiata, Donald Trumpip, Kalaallit Nunaannut immikkut aallartitaa, Jeff Landry, Nuummut sapaatiummat tikimmat, USA-meersumik nakorsamik timmisartumi ilaasoqarpoq. Nakorsaq taanna Landry assigalugu maanna Nuummiippoq.
Danskit nutaarsiassaqartitsiviata, TV2 News-ip, nakorsaq, Joseph Griffin, apersorpaa.
- Maani peqqinnissaqarfimmi pissutisut pingaarnertut aallaqqaammullu paasisqarfigerusuppagut, Joseph Griffin oqarpoq.
Taassuma amerikami naalakkersuisunut attuumassuteqarani namminerlu kajumissutsimik Nuummiilluni tusagassiorfimmut erseqqissaatigaa.
Naalakkersuisoq: Kalaallit misileraataanngillat
Amerikamiup naalakkersuinermut attuumassuteqanngitsup, namminerlu kajumissutsimik suliaqartup, Kalaallit Nunaannukarluni taama iliornera peqqissutsimut naalakkersuisup pitsaanngeqisutut nalilerpaa. Taanna inoqatinut attaveqaammi, LinkedIn-imi, sapaammi allappoq.
- Inuit Kalaallit Nunaata USA-mut ilanngunnissaanik politikkikkut anguniagallit “nakorsamik kajumissutsimik suliaqartutut” taaneqartumik “nunatsinni pisariaqartitatsinnik nalilersuiartortitsiniarlutik” Nuummut aallartitsinerat ajorluinnarpoq.
- Kalaallit nunarsuarmi politikkikkut suliniummut misiligaatissatut atorneqarneq ajorput, naalakkersuisoq allappoq.
Sermitsiaq suliaq pillugu peqqissutsimut naalakkersuisoqarfimmut attaveqarpoq. Tassani paaserusupparput, Joseph Griffin, Kalaallit Nunaanni peqqissutsimik sullissisunik ataatsimeeqateqarnissaa pilersaaruteqarfigineqarnersoq. Allaaserisalli suliarinerani tamanna suli akissutissarsineqanngilaq.
