USA-p præsidentiata ullumi Washingtonimi USA-p, Kalaallit Nunaata Danmarkillu ataatsimeersuarnissaat sioqqullugu Kalaallit Nunaat pillugu sakkortuumik oqaaseqarnini nangippaa.
USA-p isumannaallisaaneq eqqarsaatigalugu Kalaallit Nunaat pisariaqartikkaa Donald Trump inuit attaveqatigiittarfianni Truth Socialimi pingasunngornermi allappoq.
Aamma Kalaallit Nunaat rakettinut illersornissamut suliniummut Golden Dome-mik taaneqartumut pingaaruteqartoq, Nato-llu Kalaallit Nunaata tiguarnissaanut USA ikiortariaqaraa oqaatigaa:
- Golden Dome-mut, sanasatsinnut pingaaruteqarpoq. NATO-p (Kalaallit Nunaata, aaqq.) pissarsiarinissaa aqqutissiuuttariaqarpaa.
- Uagut taamaaliunngikkutta Rusland Kinaluunniit taamaaliussapput, tamannali pissanngilaq, præsidenti allappoq.
Trump: Nato USA-qanngikkaluarpat sunniuteqarnavianngilaq
Præsidenti Naalakkersuisut siulittaasuat Jens-Frederik Nielsen (D) Kalaallit Nunaata USA-mut ilanngunnissaminik kissaatiginninngilluinnarneranik erseqqissaareernerata aqaguani taamatut nalunaaruteqarpoq.
Taamaakkaluartorli præsidentip tusarliussaq suli akuerinngilluinnarpaa.
Nato USA-p peqataanngippat sunniuteqaranilu ersisaarisinnaanngitsoq Donald Trump ilanngullugu allappoq:
- Nalunngilaat, aamma uanga nalunngilara. Kalaallit Nunaat USA-p tigummippagu NATO pissaaneqarnerujussuullunilu sunniuteqarluarnerussaaq. Sunaluunniit allaanerusoq akuerineqarsinnaanngilaq, præsidenti allappoq.
Jens-Frederik Nielsenip Kalaallit Nunaata USA-mut ilaarusunnginneranik oqaaserisai Trumpip marlunngornermi unnukkut tusarpai.
Trumpip tamanna isumaqatiginagu akivoq, Jens-Frederik Nielsenilu kinaanersoq nalunerarpaa.
Nunanut allanut tunngasunut naalakkersuisup Vivian Motzfeldtip aamma nunanut allanut ministerip Lars Løkke Rasmussenip USA-mi nunanut allanut ministeri Marco Rubio præsidentillu tullia J.D. Vance ullumi Kalaallit Nunaata nalunaaqutaa malillugu nal. 13.30 ataatsimeeqatigissavaat.
