Rubinit safirillu Nunatsinneersut suli piumaneqarluartut

Københavnimi ujaqqanik erlinnartunik tuniniaavik Hartmann’s rubininik safirinillu Aappaluttumeersunik pinnersaatinik suli tuniniaasarpoq, naak piiaaffik ukiuni arlaqanngitsuni aningaasatigut ajornartorsiungaareerluni 2023-p qiteqqunnerani matuneqaraluartoq. Greenland Ruby 2022-p naanerani nammineq aningaasaatiminik 509 millionit koruuninik amigartooruteqarlunilu katillugit 513 millionit koruuninik akiitsoqarsimavoq.

– Greenland Rubymut piffissaq kingullerpaajusoq paasigatsigu, ujaqqat pitsaanerpaat qulakkeerniarsimavavut, taamaalilluta ukiualunni tulliuttuni soqutiginartunik pinnersaasiorsinnaaniassagatta, Ulrik Hartmann oqarpoq.

 Pisiniarfik Bredgademiittoq ullumikkut nunarsuarmi kalaallit rubiniinik peqartut annersaraat. 

– Ujaqqat eqqortut qalipaatigissaartut takugaangatsigik pisiariuaannaratsigik, qanittukkullu pinnersaatit nutaat 300-t saqqummiuppavut, Ulrik Hartmann oqarpoq nangillunilu oqaatigalugu, pinnersaatinik qalipaatigissaartunik imaluunniit kusanartumik silineqarsimasunik iluatsitsissagaanni siulliuniartoqartariaqartoq.

 Sølvitalinnik pinnersaasiat saqqummiunneqartut

Hartmann’s qanittukkut rubininik pink safirinillu Nunatsinneersunik sølvitalinnik saqqummiussivoq, ilaatigut Nuummi Anori Art-imi Ilulissanilu Glacier Shop-imi tuniniarneqartunik.

 

– Ilulissani Nuummilu tigulluarneqartorujussuupput pingaartumik takornarianit Kalaallit Nunaannit angerlamut nassatassaminnik pisiumasunut, aningaasarpassuarnik akeqartariaqanngitsunik, Ulrik Hartmann oqaluttuarpoq.

Sølvitalinnik pinnersaasiat akii 2.500 koruuninit aallartipput.

– Taamaattumik tuniniaanerput annertusarniarparput, Islandilu aamma tikeraarnikuuarput, tassani kalaallit rubinii soqutigineqarluarmata, Savalimmiunullu qanittukkut tikeraarnissarput pilersaarutigaarput.

 

Assammiut rubinitallit

Ulrik Hartmannip oqaatigaa, Kalaallit Nunaanni niuerfiit pingaarnertut samminiaritik. – Kalaallit rubiniinik oqaluttuaq Kalaallit Nunaannut qanittumi siammarterneqarluarnerusarpoq. Tassani naalagaaffeqatigiinneq pissutigalugu ataatsimoorfiusutut misigisimaneq pineqarsinnaavoq. Suli tupaallaatigisarpara inuppassuit Kalaallit Nunaannut attuumassuteqarnerat, Kalaallit Nunaanneersunillu pigisaqarnissaq soqutigigaat. Aammattaaq inuusuttunit Kalaallit Nunaannit pisisartunit arlalinnit saaffigineqartarpugut, taakkua kalaallit rubiniinik rubinitalinnik assammiunik pisinissartik soqutigisarpaat.

Safirit tungujortut assigiinngitsut kusanartut

 Hartmann’s aamma pinnersaatinik safirinik tungujortunik Aappaluttumeersunik mannakkorpiaq tuniniaavoq.

 – Safirit tungujortut piiaaffimmit pissarsiarineqartut annikitsuararsuugamik, uaguttaaq amerlavallaanngitsunik peqarpugut, taamaattumik pinnersaatinik safirinik tungujortunik Kalaallit Nunaanneersunik pisiumagaanni maannakkut pisisariaqarpoq. Kalaallit Nunaanni pinnersaatit ikittuinnaat tuniniarpavut Bredgademilu pisiniarfitsinni amerlanerulaarlutik, Ulrik Hartmann oqarpoq.

Rubinisiorfik pillugu atuagaq nutaaq

Ulrik Hartmann rubinit piiaaffimmeersut pillugit atuakkap siulequtaanik ilanngussaqarnermi saniatigut, atuakkami rubinit piiaaffimmit igalaaminernik sikaavimmut saqqummersitsivimmut ”Rubies from Greenland”-imi kapitalimik ataatsimik aamma allaaserinnittuuvoq. Atuagaq taanna ujaqqanik erlinnartunik nalilersuisartumit Vincent Pardieu-mit allanneqarpoq, taassumalu Greenland Ruby-mi siunnersortitut aqqanileriarluni piiaaffimmut tikeraarsimavoq.

Atuagaq Lyngbymi biilinik nioqquteqartumi saqqummiussinissamut bilitsit tamarmik tunineqarfigisimasaanni Jan Nygaardimi sapaatip akunnerani kingullermi, takuniaasunit 700-nit amerlanerusunit peqataaffigineqartumik saqqummiunneqarpoq. Tassani aamma rubininik suliareqqinneqanngitsunik aamma rubininik pinnersaasianik tuniniaasoqarluni.

- Tamanna aammaarluni ersersitsisuuvoq, inuit isumaqartut rubinit Kalaallit Nunaanneersut soqutiginartorujussuusut, tamatumalu oqaluttuassartaa naammassillugu suli oqaluttuarineqanngilaq, Ulrik Hartmann oqarpoq.

Vincent Pardieu-mit atuakkiaq ”Rubies from Greenland”, Ulrik Hartmann-imit siulequtserneqarsimasoq, 3000-inngorlugu naqiterneqarpoq. Hartmann-illu qarasaasiakkut pisiniarfianit pisiarineqarsinnaalluni.