Bentiaraq Ottosen: Nunanit allanit suliartortut pinngitsoor-sinnaanngilluinnarpagut

Nunatsinni illoqarfippassuarni sumut arlaannut neriartoraanni nunanit allamiut sullissisut, ilaanni kalaallisut oqallattaalereersimasut takussaajuartarmata amerlanerit sungiusimalereersimassagunarpaat.

Neriniartarfinniinniinnaanngitsorli, aamma pisortat suliffeqarfiini sullissisut, allamiut takussaallattaalerput.

- Piviusoq uaniippoq, pinngitsoorsinnaanngilluinnarpagut avataaniit suliartortut tikittut, Suliffeqarnermut Naalakkersuisoq Bentiaraq Ottosen taama oqarpoq.

Piviusormi qiviaraanni, neriniartarfiit allallu sullissinerup iluani suliffissat kisimik pinnatik pisortat suliffeqarfii aamma sulisussameerput.

- Peqqinnissaqarfipput sulisussanik ajornartorsiorpoq. Taanna ilisimavarput tamatta.

Bentiaraq Ottosenip oqaloqatigineqarnera tamakkiisoq Podcastimi uani tusarnaaruk. Takorluukkani ilaatigut tassani oqaluttuarai.

Nunanit allanit suliartortut ukiuni kingullerni amerlipiloorput. Kisitsisit qiviaraanni nunani allani innuttaassusillit nunatsinni najugaqartut ukiut tallimat ingerlaneranni 75 procentimik amerleriarlutik siorna 2.300-nngorsimapput. Taakkuli naammaqqajanngillat.

- Sulisut amigaatigisagut 1.000-t sinneqarput. Taamaammat ineriartorneq toqqarutsigu pingaaruteqartorujussuuvoq avataaninngaanneersut suliartortut aamma nunatsinnut tikilluaqqunissaat.

Nunanit allanit suliartortut nunatsinnut tikikkaangamik nunarput pillugu oqaatsigulluunniit pillugit ilinniartinneqarnissaat piumasaqaataanngilaq. Tamanna nunatsinni akuutitsinissamut politikkeqannginnitsinnik tunngaveqarpoq.

- Taamaammat uani qinigaaffimmi akuutitsinerulernissamut inatsiseqalernissarput naalakkersuisuniit anguniarparput, Bentiaraq Ottosen oqarpoq.

Ilinniarsimasut atorneqanngitsut

Nunatta avataaniit suliartortut qiviaraanni Asiamiut amerlanerpaapput. Taakkua Thailandimiinngikkunik Filippinerineersuupput. Naatsorsueqqissaartarfiup kisitsisaatai nutaanerit qiviaraanni 1.770-ullutik. Ilaalu ilinniagaqarsimasuusarmata atorluarneqarsinnaagaluartut naalakkersuisoq isumaqarpoq. Soorlu peqqissaasutut ilinniarsimasut.

- Ataasiakkaaqarpoq taamatut ilinniarsimasunik, kisianni periarfissinneqarsimanngitsunik, soorlu peqqinnissaqarfimmiit.

- Taava immaqa kisianni pisiniarfinni sulisuullutik.

Assersuutigalugu Filippinerineersoq peqqissaasutut ilinniarsimasoq nunatsinni peqqinnissaqarfimmi atorfinissaguni ilinniagaa Nunatsinni Nakorsaaneqarfimmit akuersissutigineqaqqaartariaqarpoq, piumasaqaatillu arlaqarlutik.

- Periarfissanik ujaasinikkut arlaatigut ammaassinissaat pingaartutut isigilluinnaqqissaarpara, Bentiaraq Ottosen oqarpoq. Ukiunilu tallimani maaneereersimasut ammaanneqarsinnaanera ilanngullugu eqqaavaa.

80-20-imik aaqqissuussineq

Peqqinnissaqarfik assersuutigiinnaraanni allamiut amerlavallaalinnginnissaat eqqumaffigisariaqartoq naalakkersuisup erseqqissarpaa. Taassuma oqarnera naapertorlugu pisortat suliffeqarfiini sulisut nunaqavissut 80 procentit sulinissaat, nunanillu allaneersut 20 procentiunissaat takorloorneqarsinnaavoq.

- Nunaqavissut 80 procentii suliffeqarfimmi sulisussaapput, taavalu 20 procentip missaa allamiunik sulisoqarsinnaanerata periarfissaanissaa. Uani nammaqatigiissumik kalaallit nunaqavissuusut taakkuupput sulisussaasut 80 procentii. Illersorniarlugit suliffeqarfik aamma.

Piviusorli allarluinnaavoq, soorlu neriniartarfinni assigisaanilu sulisut ilaanni tamarmik nunanit allamiuusarput. Namminersortunullu taanna atuuttariaqarsorinngilaa.

- Uani kiffaanngissuseq pingaaruteqartorujussuuvoq suliffeqarfik namminersortuuppat, Bentiaraq Ottosen oqarpoq.

Allamiullu pisortat ataani sulissappata ajoriffissaqartinngilaa. Angalanermi ilaani takusani assersuutigaa.

- Pissutsit piviusut imaakkamik, utoqqaat illuani amigaateqarpugut sulisussanik. Qeqqata Kommuniani angalallunga paasitinneqarpunga, utoqqaat toqqissisimapput allamiumik sulisoqassagunik tikittumik. Utoqqaat toqqissisimapput pissutigalugu, oqaatigisaat uaniikkami, uagut nerisariaatsitsinnik nerisaqarutta ajunngilaq.

Sulinermut kajumissuseq amigaataasoq

Nunatsinni sulisussat amigaataasut eqqartornerini inuusuttut 16-iniit 25-nut ukiullit ilinniagaqaratillu suliffeqanngitsut 2.000-nit amerlanerusut eqqaanngitsoorneqarsinnaanngillat.

- Taakkua aamma qiviarusuppakka. Pissutigalugu sulinermut ikaarsaartinnissaanut aqqutissamik tunerusuppakka, periarfissamillu tunerusullugit.

Inuusuttut sulerinerinik ilisimaneqanngitsut sulilersissagaanni assigiinngitsunik iliuuseqartoqarsinnaasoq Bentiaraq Ottosen isumaqarpoq. Ukioq qineqqusaarnermi KNR-ikkut aallakaatinneqartumi partiinit sinniisuutitat aperineqarput, nunatsinni inuusuttut sakkutuujusussaatitaanerat eqqunneqassanersoq. Bentiaraq Atassut sinnerlugu oqalliseqataasoq, kisiartaalluni taamani angerpoq. Sakkutuujusussaatitaanermimi tunniusimasuunissaq ilanngullugu ilinniarneqarsinnaasoraa.

- Pingaartutut isigigakku, nunatsinni sulinermut kajumissuseq annikittuaraanera inuusuttuni takusinnaagakku.

Nunatsinnilu sulisinnaasut amerliartunnginnerini sulisinnaasut tamarmik tunniussaqarnissaat pisariaqarpoq.

- Utoqqaat amerliartorput, sulisinnaasullu ikiliartorput.

Periarfissaq alla sulinermut kajuminnerulernissamut iluaqutaasinnaasoq aamma qularinngilaa.

- Soorlu assersuutigalugu utoqqaat ilinniartitsisuusinnaapput aamma nammineerlutik, qanga suleriutsit eqqarsaatigalugit inuusuttunut kajumissaanissaminnut.

Sulinermut kajumissutsip meeraanermit ilinnialereernissaa naalakkersuisup pingaartippaa.

- Taamaammat aamma ilinniarfissaq tassaniittoq, periarfissarlu tassaniittoq kajumissaatitut kaammattuutitullu apuukkusunneruara. Utoqqartagut meeqqerivinnut atuarfinnut pulaartalertuuppata, aamma arbejdsmoral qaffakkiartulissagaluarpoq.

Akuutitsinissamut politikki

Nunanit allanit suliartortut aaqqissuussaasumik tikilluaqquneqartannginnerat akuutitsinermut politikkeqartoqannginneranik tunngaveqartoq Bentiaraq Ottosenip oqaatigaa. 

Naalakkersuisut siuliisa suliaq aallartereernikuuaat, taanna Bentiaraq Ottosenip aallartisaqqippaa. Akuutitsinerulernissaq kisimi pineqanngilaq, inatsisissarli nunatsinni innuttaasunut illersuissaaq.

- Akuutitsinerulernissamut inatsit tassaaginnanngilaq kalaallinut inuiaqatigiinnut akuutinnerulernissaannut inatsisiliorneq. Akuutitsinerulernermut inatsit tassaavoq oqaatsigut, pingaartitagut, kulturikkullu ilikkarsimanissaat maani nunami.

Suliffeqarnerullu iluani aaqqissuusseqqinnissaq naalakkersuisoqatigiit siunnerfigisaat tikinneqarpat qiviagassat arlaqarput. 

Assersuutigalugu fast trackimik aaqqissuussineq. Taanna aqqutigalugu suliffeqarfiit sulisussanik tikisitsigasuarsinnaapput. Suliffeqarfiit amerligaluttuinnartut aaqqissuussinermut peqataapput, maannakkullu 159-it tikisitsigasuarnissamut periarfissaqarlutik.

- Fast track ordningeqarpugut, taanna tapersersornartorujussuuvoq, kisianni aamma nalilersugassaqarpugut

Akuutitsinermut inatsisissaq nunanit allamiunut politikkimut ilassuunneqannginnissaa Suliffeqarnermut Naalakkersuisup erseqqissaatigaa.

- Uanga toqqannginnakku nunatta qimaaffissianngornissaa. Taanna toqqissisimanarinngilara. Taamaammat qulakkeerniarsimavara immikkoortilluinnarnissaat allamiunut politikkip akuutitsinerunissamullu politikkip, Bentiaraq Ottosen oqarpoq.