Naatsorsueqqissaartarfiup 2025-mi nunanut allanut timmisartumik angalasut amerlassusaat saqqummiuteqqammerpai, malunnaatilimillu amerliartorsimapput:
- 2025-mi januaarimiit decembarimut timmisartumik ilaasartaamik nunanut allanut angalasut 114.431-iusimapput, 2024-mullu sanilliullugit 18,2 pct.-inik amerlanerupput, Naatsorsueqqissaartarfik allappoq.
Angalasut amerlanerpaartaat Nuummi mittarfik aqqusaarlugu angalasimapput, taannalu timmisartuussinermi qitiusoq Kangerlussuarmiit Nuummut 2024-mi nuuppoq.
Takussutissami 2025-mi ilaasut 93.753-it mittarfik nutaaq aqqutigalugu angalasimasut ataani takuneqarsinnaavoq:
Takussutissaq takuneqarsinnaasutut angalasut Kangerlussuakkoortut ikileriarujussuarsimapput, tassa 8.179-iullutik. 88 procentimik ikileriarsimallutik.
Kulusummi, Ilulissani Narsarsuarmilu mittarfinni 2025-mi nunanut allanut angalasut 2024-mut sanilliullugit aamma ikileriarsimapput.
