Aalisarnissamut utoqqaavallaarpit? 33-nik ukiulik ukiuni peqqutigalugit itigartitaasoq

Kunuuti Kleemann 33-nik ukioqarpoq, inuummarissuullunilu suliumassuseqarpoq. Qaleralinniartunngussagaannili 29-nik ukioqarnissaq killiliussaavoq, taamaammallu qaleralinniarsinnaanngilaq.

- Iliuusissaarunnarpoq, pakatsinarlunilu, Kunuuti Kleemann AG-mut oqaluttuarpoq.

Sinerissap qanittuani qaleralinniarneq pillugu akuersissutinik piumasaqarneq aalisartut qanoq amerlatigisut pisassiissutinut peqataasinnaanerat aqussinnaajumallugu, aammattaaq – naalakkersuisut naapertorlugit – umiatsiaararsorluni aalisarnermi ukioqatigiiaat assigiinngilluinnarmata inuusuttortaqarnerulernissamut periarfissaqartitsiniarluni 18-iniit 29-nut ukiulinnut atuutilersinneqarnikuuvoq.

- Sinerissap qanittuani qaleralinniartartunut nutaanut killilersuinissaq siornatigut kissaatigineqarnikuuvoq. Aamma aalisartut, pingaartumik sinerissap qanittuani umiatsiaararsorluni aalisarnermi, inuusuttortaqarnerulernissaa ukiui tunngavigalugit Aalisarnermut, Piniarnermut Nunalerinermullu Naalakkersuisoq Peter Borg, taama allakkatigut akissuteqarpoq.

AG-mit toqqaannaq apersorneqarsinnaannginnini pissutigalugu allakkatigut taanna akivoq.

Itigartitsinermut naaggaarneq

Kunuuti Kleemann, Nuummi najugalik, aappani meeqqallu marluk ilagalugit inuuvoq. Ilinniarnertuunngorniarfik naammassinikuuaa, niuernermik ilinniarfimmi ilinniarnikuullunilu betonngilerisutut ilinniagaqarpoq.

Inilerisutut, betonimillu sanasutut ilinniagaqaraluarluni ukiuni qulini betoniliortareerluni suliffini kajungeriunnaarlugu paasivaa. Aalisartunngornissanilu misilissallugu aalajangerpoq.

Taamaammat aalisarnermik misiliiniarluni aalajangerpoq, tamannami siunertaqarluarnerusutut misinnarpoq.

- Nuan! Nuannaalersitsisarpoq. Kisimiilluni, kisimilu sulilluni uangalu nammineerlunga aalajagiisinnaallunga. Pinngortitamut qanilaarneq, tassa uanga, oqarpoq.

Inuussutissarsiutigalugu aalisarsinnaanermut allagartamik qinnuteqarami aallaqqaammut qaleralinniarnissaq pilersaarutiginngilaa, qaammatialunnguilli saarullinniareerluni immami pissutsit ukiullu qanoq ilineri ilisimaneruleraluttuinnarlugit tamanna kissaatigilerpaa.

- Assersuutigalugu saarulliit piffissami tamatumani kinguaassiortarput kangerluillu itinerusuniittarlutik, taamaattumik maannakkut qaleralinniarneq iluaqutaangaassaaq, Kunuuti Kleemann oqarpoq.

Qaleralinniarnissamut akuersissutinik pingasunik qinnuteqartarsimalluni, tamatigullu itigartinneqartarluni, AG-mut oqaluttuarpoq

- Naammagittarsinnaassusilittut imminut isigaanga, tamannali nukinnik atuinartuuvoq. Nalunngilara sulisinnaallunga sulerusussuseqarlungalu, kisianni periarfissaqanngilanga. Allaanngilaq pisinnaatitaaffimma avataaniittoq, oqarpoq.

Pisassiissutit nalimmassarneqarnerat

Soorlu qulaani taaneqartoq aalisartut nutaat nakkutigineqarluarsinnaanissaat pisassiissutillu pisinnaasanut naleqqussarnissaat siunertaralugit ukiunut piumasaqaatit atuutsinneqalersut Aalisarnermut Naalakkersuisoq, Peter Borg, nassuiaavoq. Aammattaaq sinerissamut qanittumi umiatsiaararsorluni aalisarnermi ukioqatigiiaat assigiinngilluinnarmata inuusuttut ukkatarineqassasut  kissaatigineqarpoq.

- Qaleralittassat amerlassusaat aalisartut ataasiakkaat aalisarsinnaanerannut naleqqussarniarlugit aamma aalisarnermi sulisussanik nutaanik pissarsisoqarnissaanik qulakkeerinninniarluni qaleralinniarneq ukioqqortussusermik killiliiffigineqartariaqarnikuuvoq, Peter Borg oqarpoq.

Apeqqut naapertorlugu namminersorlutik oqartussat ukiunut killilersuineq toqqaannanngitsumik immikkoortitsinertut isigineqarsinnaanersoq inatsisitigut nalilersimaneraat ima akivoq:

- Aalisarsinnaanermut killiliinikkut piumasaqaateqarnermikkullu — aamma ukiunut tunngatillugu piumasaqaateqarnermikkut — ukiut tunngavigalugit inatsisinik unioqqutitsinerunngilaq, naligiissitaanermut najoqqutassianut ataatsimut akerliusumik, akissummi allassimavoq.

Piumasaqaat Naalakkersuisup oqaasii naapertorlugit inuiaqatigiit soqutigisaannik tunngavissaqarpoq, inatsisartunilu ombudsmandi isornartorsiugassaqarsorinngilaq.

Aammattaaq pisinnaatitaaffiit periarfissallu aalajangersimasut atornissaannut piumasaqaatinik — assersuutigalugu qanoq ukioqartigisoq biilersinnaanermut allagartamik pissarsisinnaanersoq pillugu — atuutsitsisarneq nalinginnaasoq naalakkersuisoqarfik erseqqissaavoq.

Tamanna Kunuuti Kleemannip killilersuinertut sakkortuutut isigaa. Piffissap ilaani tatineqarpallaarsimalluni ilaqutariit inissiaat tuniniarniarlugu eqqarsaatigisimallugu, taamaaliorniarnanili aalajangerluni oqaluttuarpoq.

- Neriuppunga qanittukkut iliuuseqartoqarumaartoq, tamannami ukioqarnera allanngortissinnaannginnakku nuanniilliornartaqaaq, Kunuuti Kleemann oqarpoq.

Naalakkersuisut nalunaarummik nutaamik tusarniaassutiginninnermik aallartitsipput, tassani ukioqqortussusermut piumasaqaat peerniarlugu siunnersuuteqartoqarpoq.