Tallimanngornermi unnukkaa Aasianni inuit marluk angummik savilersortumik saassunneqarput. Politiit arfininngornermi ullaakkut nalunaaqutaq 05.39 kalerrinneqarput.
Angut 33-nik ukiulik kingusinnersukkut savilersorsimasutut tigusarineqarpoq.
Taama Kalaallit Nunaanni Politiini pigaartut pisortaat Poul Kreutzmann ilisimatitsivoq.
33-nik ukiulik ullumi eqqartuussisunut sassartinneqassaaq, tassanilu tigummigallarneqarnissaa siunertaralugu toqutseriarsimasunut unnerluutigineqassaaq.
Pigaartut pisortaata inuit marluk saassunneqartut pisut kingorna ajunngitsut oqaluttuaraa.
Akerliussutsimik takutitsinerit eqqissisimasumik ingerlanneqartut
Tamatuma saniatigut ulloq unnuarlu eqqissisimanartuusimavoq. Arfininngornermi illoqarfinni amerlasuuni akerliussutsimik takutitsisoqarnerani inuit USA-mut misigissutsiminnik nittarsaassiniarlutik aqqusinikkut pisoqatigiipput.
- Taakku tamarmik politiit ilimagisaattut innersuussaattullu eqqissisimasumik ingerlanneqarput, Poul Kreutzmann paasissutissiivoq.
Assit aallaavigalugit Nuummi akerliussutsimik takutitsisut 4000-init amerlanerunissaat politiit missingerpaat.
