Inatsisartuni ilaasortat nutaat sapaatip akunnerata aallartinnerani akuerineqarmata, Inatsisartuni aalisarnermut, piniarnermut nunalerinermullu ataatsimiititaliap ilaasortassai inissititerput.
Taakkununnga ilaavoq Ane Hansen, IA, siornatigut Kommune Qeqertalimmi borgmesteriusimasoq. Taannalu ataatsimiititaliap ataatsimiinnissaanut maanna oqaluuserisassanngortitsivoq. Tassa Aasianni Polar Seafoodip tunisassiorfiata siunissaa, inissisimaneralu.
Aaqqiissutissamik atorsinnaasumik nassaartoqanngippat tunisassiorfik ukiamut matoratarsinnaavoq. Tamanna Polar Seafoodip pisortaata Bent Sallingip nalunaarutigaa, Polar Seafoodip Royal Greenlandillu akornanni isumaqatigiinniarnerit sapaatip-akunnerata aallartinnerani unimmata.
Taamaattoqassappat sulisut 116-it suliffissaarutissapput.
- Inuit Ataqatigiit Aasiaat fabrikkiata matuneqannginnissaa pingaartippaat. Taammaattumik aalisarnermut piniarnermullu ataatsimiititaliami oqaluuserisassanngortinneqarpoq, pisariaqassappallu Naalakkersuisumut isumasioqateqarnissamik kissaateqarluta, Ane Hansen, IA, inatsisartuni ilaasortaq, aalisarnermut, piniarnermut nunalerinermullu ataatsimiititaliamut ilaasortaq oqarpoq.
- Suliaqartut tamatta ilisimavarput fabrikki Kommune Qeqertalimmut pingaaruteqartoq. Taamaammat tamatta aaqqiissutissamik nassaarnissaq soqutigisarigipput naatsorsuutigaarput, allappoq.
Ataatsimiititaliap Polar Seafoodip tunisassiorfia pillugu qaqugu oqaloqatigiissanersoq ilisimatitsissutigineqanngilaq.
