Amerikamiut umiarsuaat napparsimmaviusoq USNS "Mercy" Portlandimi Oregonimiittumi amutsivimmut tikippoq.
Tamanna paasissutissanit AIS-imit (automatic identification system), imaatigut radiokkut angallatit kinaassusersiornissaannut atortumit, paasinarsisoq, tusagassiorfik gCaptain allappoq.
Umiarsuaq sumunnassanersorlu sapaatit-akunnerini arlalinni eqqoriaqattaarneqareerluni Portlandimut sapaatip-akunnerani kingullermi sisamanngornermi tikittoq tusagassorfik allappoq.
USA-p præsidentiata Donald Trumpip Amerikamiut umiarsuaat napparsimmavik USNS "Mercy" Kalaallit Nunaannut ingerlaartoq inuit attaveqaqatigiittarfianni Truth Socialimi februaarimi nalunaarutigereeraalu taanna malinnaavigineqartorujussuanngorpoq.
Umiarsuaq inuppassuarnik napparsimasunik isumassuissasoq Trumpip taamani oqaatigaa.
Erseqqissumik uppernarsaataasoq
Trumpip siammartigaani umiarsuaq napparsimmavik USNS “Mercy”-mik atilik Amerikamiut erfalasuannik erfalasulik silassorissuusiaq atorlugu assitaqarpoq.
Umiarsuaq 1000-inik siniffeqarpoq.
AIS-imit paasissutissat kingulliit naapertorlugit umiarsuaq USA-p kitaata sineriaa sinerlugu avannamut ingerlaarsimavoq, kuussuarlu Columbia, Portlandip eqqaaniittoq, ikaarlugu.
Februaarip naanerani umiarsuaq Mobilemit Alabamamiittumi aserfallatsaaliorneqarniarluni aallarpoq.
Umiarsuup Portlandimut tikinnera Manerassuarmut avannaata kitaanut Panamap kanaliatigut umiarsuarmik ingerlaarnerup pilersaarutaasumik allanngortinneqarsimaneranik — Issittoq ilanngunnagu — erseqqarinnerpaamik uppernarsaataasoq tusagassiorfik allappoq.
Isumannaallisaanermut piareersimanngitsoq
USNS "Mercy" qaamatini arlalinni Portlandimiinnissaa naatsorsuutigineqartoq, tusagassiorfik allappoq.
Umiarsuup Kalaallit Nunaannukartinniarnera piviusorsiorpalaanngitsutut siornatigut apeqquserneqareerpoq. gCaptainip paasissutissiinera naapertorlugu, umiarsuaq sikumut illersugaanngilaq issittumilu suliaqarnermi siornatigut peqataanikuunani.
Immami sikut, sikorsuit umiarsualiveqarnikkullu attaveqaasersuinerup killeqarnerata, umiarsuarmut taama angissusilimmut imaannaanngitsunik ilungersunartoqartitsissasoq allaaserineqarpoq.
/ritzau/
