Avannaata Kommuniata Greenland Airportsillu imermut akiligassaq isumaqatigiinngissutigaat

Ilulissani mittarfimmik sanaartukkap eqqaani sulisartut inaanni januaarip aappaani  ikuallattoqalerpoq. Ikuallannermi ajoqusertoqanngilaq, taamaakkaluartorli pisoq annertuumik sunniuteqarsinnaasumik politikikkut kinguneqarpoq.

Ikuallattoqarneranimi Ilulissat mittarfissuassaani tunngaviusumik ajornartorsiuteqartoqarnera paasinarsisoq, Avannaata Kommuniani borgmesteri isumaqarpoq:

– Ikuallattoqarnerani pitsaasumik ataavartumillu ikuallannermik qatserisinnaasoqartinnagu mittarfimmik nutaamik ammaanissaq akuersaarneqarsinnaananilu illersorneqarsinnaanngilaq, Lars Erik Gabrielsen (S) mianersoqqusivoq.

Piffimmi imermik pilersuinerup naammannginnera kommuni naapertorlugu ajornartorsiutaavoq. Qanittuani imermik pissamaasivik pilertortumik imaarneqarpoq, taamaammallu qatserisartut illoqarfimmut aallerasuartariaqarput.

Taamaattoqarsinnaanngilaq, Lars Erik Gabrielsen mittarfissuassami timmisartunik annernik, inunnik amerlanerusunik orsussamillu annertunerusumik peqartussaq eqqarsaatigalugu inerniliivoq.

– Mittarfimmi muteerniusumi aaqqiigallarnernik, imermik illoqarfimmit pinngitsuuisinnaanngiffimmi toqqammaveqarsinnaangilaq, borgmesteri sumiginnaasoqarsimaneranik isumaqartoq oqarpoq.

Imermik amigaateqarnerup piffimmi ikuallannermik qamitsiniarneq ajornarsisikkaa, taamaammallu taarsiullugu nakkutigisamik ikuallattup nungutsiinnarneqarneranik pisoqartoq, Kalaallit Nunaanni Politiit Sermitsiamut uppernarsarpaat.

Kia piffimmi qatserinissamut naammattumik imissaqarnissaanik isumaginninnissaq akisussaaffigineraa, suliami paasinarsivoq. Kommunip akisussaaffigaa imaluunniit Greenland Airportsip akisussaaffigaa?

Greenland Airports: Kommunip akisussaaffigaa

Sanasut inaanni ikuallattoqarnera tunuliaqutaralugu borgmesterip oqariartuutaa Greenland Airportsimit tupigusuutigineqarpoq.

– Mittarfeqarfiup avataani upalungaarsimanissamik akisussaaffik – tassani imermik pilersuineq attaveqaatillu – kommunip akisussaaffigigai erseqqissassallugu pingaaruteqarpoq, Greenland Airports Kalaallit Nunaanni upalungaarsimanissamik inatsit arlaleriarluni innersuussutigalugu allakkatigut akissummini erseqqissaavoq.

– Greenland Airportsip mittarfiup immikkoortuani namminermi isumannaallisaaneq upalungaarsimanerlu akisussaaffigai, akisussaaffillu tamanna pimooruttorujussuuarput. Immikkoortutta iluani mittarfimmi timmisartut ajutoornerannut atatillugu, malittarisassat nunarsuarmilu periutsit nalinginnaasut naapertorlugit, qatserinissamut periutsit isumalluutillu pisariaqartut pilersinneqarput.

Sanasunut inissiami ingerlatseqatigiiffiup sulisui qatserinermut peqataasut, pilertortumillu naammassisaqarfiulluartumillu ikiuisut, Greenland Airportsip ilanngullugu ilisimatitsissutigaa.

– Taamaammat pisup Greenland Airportsip tungaanit sumiginnaanertut saqqummiunnera eqqortumik saqqummiussinerunngilaq. Mittarfimmi upalungaarsimanissaq uagut akisussaaffigaarput, tassanilu isumannaallisaaneq upalungaarsimanerlu pillugit nunat tamat akornanni malitassiat malippagut. Imermik pilersuinermi ilungersunartorsiutit mittarfiup immikkoortuata avataaniipput, kommunimillu akisussaaffigineqarlutik, Greenland Airports allappoq.

Kommuni: Mittarfik inatsisitigut sunniuteqarpoq

Sermitsiap Avannaata kommunia erseqqinnerusumik paasisaqarfigiumallugu attavigaa, tassanilu kommunip pisortaa Nick Nielsen akissuteqarpoq. Taassuma borgmesteri isumaqatigaa.

– Mittarfittaamit piumasaqaatit naammassiniarlugit annertoorujussuarnik aningaasaliinikuuvugut, imermillu pissamaatit maannakkutut itsillugit illersorneqarsinnaanngitsut isumaqarpugut, kommunimi pisortaq oqarpoq.

Upalungaarsimaneq qatserinerlu Greenland Airportsip erseqqissaaneratut kommunip akisussaaffigigaluarnerpai?

– Aap, mittarfimmullu tunngatillugu ataavartumik imermik pilersuinermik pilersitsineq Greenland Airportsip akisussaaffigigaa isumaqarpugut. Tamanna mittarfinnut nutaanut sinaakkutitut inatsimmi atuarneqarsinnaavoq, Nick Nielsen oqarpoq.

Inatsimmi pineqartumi ingerlatseqatigiiffik mittarfinnik ingerlatsisoq taamaallaat pilersitsinermut, sanaartornermut mittarfinnillu ingerlatsinermut akisussaasuunani, aamma “ingerlatanut, sanaartukkanut illuutinullu attuumassuteqartunut” akissaaffeqartoq aalajangersaavoq.

Avannaata Kommunia isumaqarpoq mittarfimmut nutaamut anginerusumullu imermik pilersuineq nutaaq pitsaanerusorlu pissutsit attuumassuteqartut Greenland Airportismut akisussaaffigitinneqarsinnaasut ataanniittoq isumaqarpoq.

Tassungalu atatillugu Sermitsiaq Naalakkersuisunit oqaaseqartitserusuppoq. Ilaatigut namminersorlutik oqartussat Ilulissani imeqarnikkut pissutsinut inatsisitigut akisussaanermut paasinninnerat tusassallugu soqutiginarsinnaavoq.

Naallu arlaleriarluni naalakkersuisoqarfinnut attuumassuteqartunut saaffiginnittoqartaraluartoq, Naalakkersuisut manna tikillugu oqaaseqartinneqarsinnaasimanngillat. Sulialli malitseqartitsiviginissaa naatsorsuutigaarput.