Narsarsuaq Qaqortumi mittarfik nutaaq sisamanngornermi ammarneqarpat mittarfiup qulimiguulimmut mittarfinngortinneqarnissaa, illoqarfimmi akunnittarfiup matunissaa suliffippassuarnillu peersitsisoqarnissaa pissutigalugit allanngorujussuartussanngorpoq.
Innuttaasut ilaat, Naja Lund, uani sapaatip-akunnerani marlunngornermi Inatsisartunut Naalakkersuisunullu ammasumik allagaqarsimavoq, tassanilu politikerit inunnut aalajaalluni Narsarsuarmi sulisimasunut najugaqarsimasunullu qujamasunnerat ujartorpaa.
“Sinnattupiluk ajornerpaaq”
Innuttaasunut tamanna sinnattupiluusoq Naja Lund allappoq:
"Sinnattupiluk ajornerpaaq eqquutilerpoq. Uagut Narsarsuarmiut allallu sumiiffimmut arlaatigut attuumassuteqartut isigitilluta,“ Naja Lund allappoq nangillunilu:
“Uagutsinnut Narsarsuarmiunut soorlu tassa toqqammavipput peerneqartoq, tamaani "angerlarsimaffeqartuartunut", "meeraalluta angerlarsimaffipput.”
Politikerit sooq qujannginnersut taassuma apeqqutigaa.
„Politikerit aqagu Qaqortumut mittarfissap nutaap nuannaarutigiartornissaanut angalaqataasussat suliassat nuannersut kisiisa isumagisarpaat,“ Naja Lund Inatsisartunut Naalakkersuisunullu allappoq.
IA-mi politikeri: innuttaasut takuneqarnissaat pingaaruteqarpoq
Inuit Ataqatigiit sinnerlugit Inatsisartunut ilaasortaq Paarma Lund Kreutzmann Naja Lundip ujaarineqarneranut akissutitut isigineqarsinnaasumik sisamanngornermi allappoq.
Paarma Lund Kreutzmann nammineq Narsarsuarmi peroriartorsimalluni, meeraanermilu kiffaanngissuseqarluni toqqissisimallunilu inuusimalluni ilaatigut allappoq.
"Narsarsuarmi innuttaasut ukiuni amerlasuuni malinnaavigisimavakka, nalorninartumik inissisimanerat. Inissisimaffik peqqinnanngitsoq. Taamaattumik pingaaruteqarpoq innuttaasut takuneqarnissaat, tusaaniarneqarnissaallu, puujorneqarnatik, politikeri allappoq, taassumattaaq Narsarsuaq suli ineriartortinneqarsinnaasoq nalilerlugulu minnerunngitsumik qujavoq:
„Inuit Ataqatigiit sinnerlugit ukiorpassuarni Narsarsuarmi sulisimasunut aammalu innuttaasunut peqataasimasunut qujarusuppunga,“ Paarma Lund Kreutzmann allappoq.
Qulimiguulinnut mittarfinngornissaa sunniuteqangaassangatinneqartoq
Qaqortumi mittarfiliortoqarnissaa aalajangiunneqarmat tamatuna Narsarsuarmut aamma sunniuteqarumaarnissaa ersarippoq.
Qaqortup mittarfia ammarneqarpat mittarfiup timmisartunut matuneqassallunilu qulimiguulinnut mittarfinngortinneqarnissaa Naalakkersuisut 2022-mi aalajangermassuk tamanna erseqqippoq.
Narsarsuarmi innuttaasut 2026-p aallartinnerani 139-upput, nunaqarfillu ukiuni arlalinni allanngorarpallaanngitsumik innuttaqarsimavoq.
Nunaqarfik qulimiguulinnik mittarfinngortinneqassappat innuttaasut ikileriarujussuarumaartut siusinnerusukkut naatsorsuinermi nalilerneqarpoq.
Nunaqarfimmi mittarfiusumi allami, Kangerlussuarmi, timmisartukkut angallannerit amerlanerpaartaasa Nuummi mittarfimmut nutaamut nuunneqarneranut atatillugu suliffissarpassuit annaaneqarsimapput. Nunaqarfimmi innuttaasut 30 procentiisa missaat ukiup aappaata affaani kingullermi nuussimapput. Narsarsuarmi sunniuteqarnissaa suli annertunerussasoq naatsorsuutigineqarpoq.
