Peqatigiiffik Uagut, juunimi 2025-mi pilersinneqartoq, kalaallit Danmarkimi kinaassutsiminnik attassinnaarnissaannik ataqatigiinnerunissaanillu anguniagaqarpoq. Peqatigiiffiup kalaallit attaveqaqatigiinnerat ineriartortinniarpaa, pisinnaatitaaffiit pitsanngorsarniarlugit, kulturikkut sorlaat attatiinnarniarlugit qallunaallu inuiaqatigiivinut pitsaanerusumik ikaarsaartitsinissamik suliaqassalluni.
Inuusuttunut sammisaqartitsinissat
Peqatigiiffik nunami sumiiffinni assigiinngitsuni naapeqatigiittarfimmik pilersitsinissamut aamma tapiiffigineqarpoq, tassani isummiussereertarneq pinaveersaartinniarlugu oqaloqatigiinneq pitsaanerusoq aamma inuusuttunut utoqqarnullu ataatsimoorneq aallunneqassallutik.
Peqatigiiffik aamma inuusuttut suliffinnut attaveqarnissaannut siunnersuisarnermik pilersitsinissamik suliniuteqarpoq. Nalinginnaasumik inuusuttoq inersimasumik siunnersuisartumik attaveqarfigineqartarpoq, taanna ilinniartitaanermut suliffimmillu toqqaanermut, inuttut ineriartornermut, inuiaqatigiinni unammilligassanut atuarfimmiillu suliffeqalernermut tunngatillugu ikiuuttussalluni. 'Uagut' aamma inuulluarneq ineriartornerlu sammivai, ilaatigut imminut tatiginerup imminullu ataqqinerup nukittorsarnissaat, inuusuttullu anguniagaqarnissaannut inuunermilu siunnerfissamik nassaarnissaannut ikiussallugit.
– Kalaallit ilinniagaqartut sammisassanut tamanut qaaqquavut, aamma Avalammut ilaasortaagaanni Uagut-sinnut toqqaannartumik ilaasortaaffeqartarpoq, taamaattumik ilaasortaanermut neqeroorutit sulissutigisavut aamma ilinniagaqartunut atuupput, Uagut pisortaat Julie Rademacher oqarpoq.
– Kangianit, kitaanit, kujataaneersunit avannaaneersunillu ilaasortaqarpugut. Inuusuttut utoqqaallu peqataasarput, Danmarkimilu kalaallit katersuuttarnerput nuannersuuvoq. Allaat ilungersunartunik oqallisigiuminaatsunillu oqaluuserinnikkaangatta, ataatsimooraangatta immikkut nukissaqalertarlutalu nuannaalertarpugut, oqarpoq.
Qinersisartut ataatsimiinnerat
Qineqqusaarnermi kingullermi Uagut Avalak suleqatigalugu qinersisartunik ataatsimiisitsivoq kalaallit ajornartorsiutaat sammineqarlutik.
– Aarhusimi ilinniartut eqimattat amerlanerusut ilaatigut nukippassuit atorpaat Aarhusimi qineqqusaartitsinissamut piareersarnermi, tassani inuusuttunut inissiat aamma ilinniagaqartunut timmisartumut bilitsit akikinnerusut oqaluuserineqarput, Julie Rademacher oqarpoq, taassumalu misigaa kalaallit ajornartorsiutaannut aaqqiissutissat amerlasuutigut immikkoortiterneqarsimasut siunissamullu ungasissumut isigisuunatik.
- Sutigut tamatigut siunissaq ungasinnerusoq eqqarsaatigalugu aaqqiissuteqartoqartariaqarpoq, Julie Rademacher oqarpoq.
Uagut Kalaallit Illuutaat, Inuit Pisinnaatitaaffii pillugit Instituti, Stenbroens Jurister, Kalaallit Peqqissartut Angerlarsimaffiat, Kalaallit Nunaata Sinniisoqarfia, Peqatigiiffik Inuit, Avalak aamma tusagassiorfik Tusarfik suleqatigai.
