Saaguusat kuultiusut sølviusullu Nuummi GUX-ip inersuaani balkonngimit nivingapput.
007. Kilitsissiat tikilluaritsi, allagartarsuarmi allassimavoq.
Ilinniarnertuunngorniarfimmi sapaatip akunnerata naanerani nalliuttorsiortoqarmat 'James Bond' qulequtarineqarpoq. Fina Winberg peqataavoq. Taanna 2.G-mi ilinniarnertuunngorniarpoq, taamaalillunilu 3.G-mi 4.G-milu ilinniarnertuunngorniartut lancierimik kalattuumillu qitinnerat isiginnaarpaa. Taanna aappaagumut tullernguuppoq.
- Ajornakusuussasoq isumaqarpunga. Ilinniarluguli nuannissaaq, taanna oqarpoq.
Fina Winberg soraaqqammerpoq, ilinniarnertuunngorniarfillu nipaalluinnarpoq. Ikinngutini Malu Kajangmat atuarfiup nerriviisa ammalortut ilaanni issiapput.
Marluullutik kamippaarniarfimmi suleqatigiinnemrik saniatigut ukiuni qulini meeqqat atuarfianni klasseqatigiissimapput, maannalu ilinniarnertuunngorniarfimmi inuiaqatigiilerinermi klasseqatigiipput.
Qanittukkullu qinerseqqaassapput.
- Pissanganaqaaq. Misilinnikuunngisaannarparami, Malu Kajangmat oqarpoq ikinngutinilu qiviarlugu.
Siorna Inatsisartunut qinersisoqarmat atuaqatigiit tamarmik qinersivimmut ornigupput. Ilinniarnertuunngorniartut angajulliit qinersiartorlutik tulleriiaateqataasut Malu Kajangmat, Fina Winberg ilinniarnertuunngorniaqataallu allat suli 18-iliineqanngitsut isiginnaarput.
- Pissanganaqaaq. Aammali qinersisinnaannginnatta pikkunaaqaaq, Fina Winberg oqarpoq.
Marsip 24-anni atuaqatitik qinersivimmukaqatigeqqikkunikkit isiginnaaginnartussaannginnertik qilanaareqaat.
- Qinersineq manna pingaaruteqarnerpaat ilagigunarpaat. Kalaallit Nunaammi tassanngaannaq sammineqangaalerpoq. Siornatigullu taamaanngisaannarsimavugut, Fina Winberg oqarpoq.
Qinersisoqalerpat Trump eqqarsaatigineqassasoq
Nalliuttorsiornissamut pinnersaatit qillaalasullu saniatigut titartakkat Donald Trumpimik assitallit inersuarmi nivingapput.
Amerikap præsidentiata kiinamigut klovnitut qalipassimasutut assingi sisamat elevatoreqarfimmi qulaani nivingapput.
Kalaallit Nunaat – Kalaallit Pigaat, allagartarsuarmi allami allassimavoq.
Donald Trumpip Kalaallit Nunaata USA-mut ilanngunnissaanik sioorasaarinera tamatumalu kingorna pisut tamarmik Fina Winbergimut, Malu Kajangmamut taakkualu klassiannut ukioq manna initusimapput.
- Ullaat tamaasa nutaarsiassat siullertut isiginnaartarigut isumaqarpunga, Fina Winberg oqarpoq nangillunilu:
- Tusagassiortunik katersortitsinerit isiginnaaqatigiittarpagut. Taakkorpiaat eqqartortarpagut. Ilinniartitsisorpullu eqqartueqatigiilluartarpugut, aammali klasseqatigiiginnaalluta eqqartuisarpugut. Piffissamimi tassani annilaanganarluinnarpoq.
Aallaqqaammut USA-p Venezuela januaarip aallartinnerani saassummagu, tamatumalu kinguninngua Kalaallit Nunaata assinga Amerikamiut ulloriaannik atisaqartut oqaasertalimmik “SOON”-imik allassimasoqartoq siammarterneqarmat pissutsit ingammik ilungersunarput.
- Taava eqqarsarpugut arraa, tassa tiguagaalerpugut?, Fina Winberg oqarpoq isinilu uisillugit.
Malu Kajangmat isumaqataavoq. Maannakkulli pissutsit eqqissisimanarnerulersimasut isumaqarpoq.
- Tamanna maanna tusarsaarpiarunnaartoq misigivunga, taanna oqarpoq.
Fina Winberg isumaqataavoq.
- Maanna eqqissisimanarneruvoq. Nunanut allanut naalakkersuisorput Vivian Motzfeldt pikkoreqaaq. Aamma Lars Løkke suleqatigilluarsimavaa, taanna oqarpoq.
Trumpip oqaasii kingornalu pisut Folketingimut qinersinissassinnut sunniuteqarpat?
- Qineqqusaarutit tamaasa atuannginnakkit kina qinissanerlugu suli aalajanginngilara. Kisianni Trump eqqarsaatigalugu qinersissaanga, Fina Winberg akivoq.
Qanga pisimasut suli annernartut
Malu Kajangmat marsip 24-ani qinersileruni qinigassanngortittut ilaat „Danmarkimik ingerlaannaq peersitsiumanngitsoq“ qinissavaa.
- Danmarkimut attaveqartariaqartugut, ikinngutaallutalu naalagaaffeqatigiiginnartariaqartugut isumaqarpunga, taanna oqarpoq.
Fina Winberg isumaqataavoq:
- Folketingimut qinigassanngortittut maanngaanneersut pigeriikkagut attatiinnartariaqarpaat. Akornusersuinatik, taanna oqarpoq.
Taannattaaq Folketingimi ilaasortat innuttaasut pisinnaatitaaffiinik illersuinissaat Kalaallillu Nunaata ataqqineqartuarnissaanik qulakkeerinninnissaat pingaaruteqartoq isumaqarpoq.
- Soorunami maanna namminersulerpugut, tamannalu aamma pitsaasuuvoq, kisianni – Danmark aamma nunamut tamatumunnga ilaatillugu - nammineq nunatta piginissaa pisinnaatitaaffigisariaqarparput, Fina Winberg oqarpoq.
Danskit naalakkersuisuisa nutaat Kalaallit Nunaannut tunngatillugu suut pingaarnerutillugit sammisariaqaraat qanoq isumaqarpisi?
- Mette Frederiksen spiralilersuisimaneq pillugu maanga utoqqatseriartornikuusoq maanna nalunngilara, kisianni qanga pisimasut suli annernarput, Fina Winberg akivoq.
Nunami maani inuppassuit Danmarkip qanga Kalaallit Nunaannut pissusilersuutigisarsimasai suli ajornartorsiutigigaat taassuma erseqqissaatigaa.
Danmarki siornatigut kukkussutigisimasaminik qanoq aaqqiiniarsinnaanersoq Fina Winbergip naluaa.
- Isumaqarpungali arlaatigut sulinitsinnik ingerlatitseqqissinnaasariaqartugut, taanna oqarpoq.
Maanna danskit naalakkersuisuisa ingerlavigisaat pitsaasoq isumaqarpisi?
- Aap, pitsaanerulaartoq isumaqarpunga, Malu Kajangmat akivoq.
- Mette Frederiksenip utoqqatseriartornera ataqqinningaarneruvoq, Fina Winberg ilanngullugu oqarpoq.
Inuusuttorpassuit kina qinissanerlugu nalornissutigigaat
Malu Kajangmap aamma Fina Winbergip 2.G-mi klasseqataat qanittukkut matematikkernerminni isumasiuisimapput.
Inuit aqagu Folketingimut qinersisoqassasuuppat qanoq qinersissanersut apersorlugit illoqarfimmi angalaarput. Klasseqatigiit taasinerit 18-it iluatsippaat.
- Demokraatit amerlanerpaanik qinerneqarput, Fina Winberg oqaluttuarpoq.
Siumut arfineq-pingasunik qinerneqarlutik tulliusut Naleraq sisamanik qinerneqarpoq.
Malu Kajangmap Fina Winbergillu marsip 24-ani kina qinissanerlugu naluaat.
- Naluuippara. Angajoqqaamaluunniit suli naluaat, Fina Winberg oqarpoq.
- Ataatagalu tamanna pillugu oqaloqatigiippugut, pingaartumik pissanganarteriarakku. Annerusumik oqaluusereqqinngilarput. Qineqqusaartut qanoq iliorumaarnersut naluarput, Malu Kajangmat oqarpoq nangillunilu:
- Taamaammat suniarnerlutik oqaluttuarnissaat utaqqilaarparput.
Ikinngutigiilli Demokraatit qinernissaat naatsorsuutigaat.
- Uagulli inuusuttullu allat kina qinissanerlugu paatsiveerusimaaqaagut. Akornatsinni suli oqaluuserinngilarput - tamannali sapaatit akunnerini makkunani allanngussasoq ilimagaara, Fina Winberg oqarpoq.
Malu Kajangmallu nerrivimmit nikuimmata issiaviit nipiliorput. Malu Kajangmat kamippaarniarfimmi sulisussaavoq, aatsaalli unnugu. Seqinnarippoq – aputeqarluarsimagaluarpallu sisorarsimassagaluarput, Fina Winberg oqaluttuarpoq.
Qinersinermi suna qilanaarinerpaavisiuk?
- Qinersisinnaaneq. Meeqqat atuarfianni atuartut siunnersuisoqatigiivinut qinersisoqartarneratut pinnani, pingaaruteqartumulli qinersisinnaaneq, Fina Winberg oqarpoq.
Malu Kajangmat isumaqataalluni ileqimisaartuutigaluni balloni qaqortoq ninilersoq natermiittoq isimmippaa.
- Peqataasinnaanerput, ilanngullugu oqarpoq.
- Siunissamut sunniuteqaqataaneq, Fina Winberg naggasiivoq.
Abonnementer
Sermitsiaq.gl – Nittartagaq
- Sermitsiaq.gl-imi allaaserisat tamakkiisumik atuarsinnaalissavatit
- Qaammammut kr. 59.00
- Ukiumut kr. 650.00
Sermitsiaq - E-aviisi
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
AG - Atuagagdliutit E-aviisi
- Aviisi AG - Atuagagdliutit e-aviisitut pingasunngornerit tamaasa saqqummersartoq atuarsinnaalissavat
- Sermitsiaq.gl-mi allaaserisat tamakkiisumik atuarsinnaanngussavatit
- Qaammammut kr. 191
- Ukiumut kr. 1.677
Sermitsiaq.AG+
- Aviisi AG - Atuagagdliutit e-aviisitut pingasunngornerit tamaasa saqqummersartoq atuarsinnaalissavat
- Sermitsiaq e-aviisitut tallimanngornerit tamaasa saqqummersartoq atuarsinnaalissavat
- Sermitsiaq.gl-imi allaaserisat tamakkiisumik iserfigisinnaalissavatit
- Arnanut e-magasinatut atuarsinnaalissavat
- Nutserisoq.gl atorsinnaanngussavat
- Soqutiginnikkuit abonnement@sermitsiaq.gl-imut allagaqarsinnaavutit
Asasarput atuartartoq, Sermitsiaq.gl-imut – Kalaallit Nunaanni nutaarsiassanik isornartorsiuisumillu tusagassiornermik saqqummiussiffimmut – tikilluarit. Kiffaanngissuseqarluni tusagassiornerup siuarsarneqarneranik suliniuteqartuarsinnaajumalluta, itisiliillutalu isornartorsiuilluta tusagassiortuarsinnaajumalluta, allaaserisat aalajangersimasut akeqalersippavut. Tamanna iluaqutigalugu allaaserisat pitsaassusaat qulakkeersinnaavarput, tusagassiortuttalu pikkorissut oqaluttuanik pingaarnerpaanik saqqummiussinissaannut tapersersorsinnaavavut. Allaaserisat akillit qaammammut taamaallaat 59 koruuninit akeqarput. Pisineq ajornanngitsuararsuuvoq – ataaniittoq toorlugu saqqummiussavut tamakkiisumik iserfigisalersinnaavatit. Paasinninnerit tapersersuinerillu qujamasuutigaavut. Pituttorsimanngitsumik isornartorsiuisumillu Kalaallit Nunaannut tusagassiortarnissamik suliniuteqartuarnissamut akiliutivit ikiorpaatigut.
