USA-p præsidentia Donald Trump Kalaallit Nunaat pisiariniarlugu aqulerniarluguluunniit arlaleriarluni oqartarpoq. Taamaammat ICC-p tusagassiutitigut nalunaarummi kingullermi naalagaaffiit tamaasa nunat tamalaat inatsisaasa atuutsinneqarnissaannik malittarisassallu malinneqarnissaannik kajumissaarpai.
ICC-p siulittaasuata Sara Olsvigip Kalaallit Nunaata inuisalu niuerutigineqarsinnaanerannik akuerisaannginnini uteqqippaa.
- Issittoq angerlarsimaffigaarput. Nunatta inuillu niuerutigineqarsinnaanerannik isuma akuersaarsinnaanngittuarparput. Paaseqatigiinneq kiisalu naggueqatigiit Inuit pisinnaatitaaffiinik ataqqinninneq tunngavigalugit suleqatigiinneq piumasaraarput. Issittoq qangarsuaaniilli angerlarsimaffigivarput, Sara Olsvig tusagassiutitigut nalunaarummi oqarpoq.
Issittumi nunarsuullu sinnerani nunat inoqqaavisa namminneq aalajangiisinnaassuserminnik aalajangiusimasariaqarnerannik kaammattuivoq.
Kalaallit Nunaat Amerikamut ilanngutissanngitsoq
Inuiaat kalaallit oqariartuutaat ICC-p siulittaasuata tulliata Kalaallit Nunaanneersup Hjalmar Dahlip erseqqissaqqippaa.
- Kalaallit naalakkersuisuvut inatsisartuvullu aqqutigalugit erseqqilluinnartumik oqaatigaarput USA-mut ilanngunnissarput kissaatiginngikkipput, oqarpoq, erseqqissarlugulu, piffissanngorpoq pisinnaatitaaffitsinnik illersuinissatsinnut.
"Qallunaajuniarnata, Amerikamiuuniarnata, Kalaaliuniartugut" Naalakkersuisut siulittaasuat, Jens-Frederik Nielsen (D), arlaleriarluni oqarpoq.
