Ilisimatusarneq: Nunatsinni qimmit qimuttut qangatut ikkunnanngillat — pingaarutilimmilli allanngoriartorput

Silap pissusiata allanngoriartornera illoqarfinnilu annerusunut nuttarneq pissutigalugit qimussertarneq unammillerneqangaatsiarpoq, qimmilli piniarnermi kulturimillu siammarterinermut suli atorneqartarput. Naak qimussertarneq sumiiffiit ilaanni annikilliartoraluartoq ileqqutoqqat allanngoriartorneq aallaavigalugu tulluarsartuarnikkut suli uumajuartoq, Manumina Lund Jensen naqissusiivoq.

Kingornussassanik qangatut ’karsitut’ aalajangersimasutut isiginnittaaseqarneq allanngortittariaqaripput, Manumina Lund Jensen Ilisimatusarfimmi adjunktiusoq isumaqarpoq

- Kulturi qeritinneqarpat kulturi toqujartulersarpoq, Manumina Lund Jensen taama oqarpoq. Taassumalu kultoori allanngutsaaliorniarlugu assoralisimaartoqartariaqartarneranik pigiliussisimaneq isornartorsiorlugu tikkuarpaa.

Manumina Lund Jensenip qimmit qimuttut kalaallit kulturiannut inuuinnarnerannullu qanoq sunniuteqartarnerat pillugu nutaamik ilisimatusarnini maanna aallartippaa.

Qimmeq suleqatitut

Naak atortorissaarutitigut siuariartortoqaraluartoq piniarnermut angalanermullu qimmeq suli suleqataajuarpoq. Ataqatigiinneq tamanna assartuinermut kisimi attuumassuteqanngilaq, immikkullarissumik timikkut ilisimasaqarneq aammalu nunamik atuaasinnaaneq kinguaariit kingornuttarpaat.

Immikkut ilisimasaqarneq kultoorikkut, kinaassutsimut Avannaani qitiulluinnartumik inuunermut tunngavileeqataavoq. Taamaattumik piniartumut qiminullu suleqatigiinnerinnaanngilaq; imminnut ataqatigiilluinnarput.

- Inooqatigisinnaaneri aniguinissamik aallaaveqarpoq. Soorlu piniartorpassuit oqartartut, piniartoq qimmeqartinnani piniartuusinnaanngilaq, Mannumina taama oqaaseqarpoq.

Illoqarfinnut annerusunut nuuttarneq unammillernartoq

Naak qimmit qimuttut kultooritsinnut tunngaviliisuugaluartut, nutaaliaasumik illoqarfinni pilersaarusioriaatsit uumasunullu nakorsaqarnermut malittarisassat qimussertartunut killersuipput.

Illoqarfiit alliartortillugit inissialiornissat qimminiit pingaarnerutinneqartarput, taamaattumillu qimmiutillit qimmit toqqissisimaffianniit allamut nuuttariaqartarpaat.

Qimmit immikkoortinneqarnerisa ulluinnarni nakkutiginissaat ajornakusoornerulersiinnarnagu aammali qimussertartut assartuinermut piffissaq annertunerusoq atortariaqalerpaat.

- Sisimiuni qimmilivinnik nunaminertamik inissaqartitsipput, qimminik illoqarfiup avataanut inissiinikkut – tamannalu qimussersunut akisoorujuuvoq.

Amaqqup aava pillugu tusatsiakkat

Qimussertarneq ileqqutoqaannaanngilaq nutaaliaasoq, ukiunilli tusindilinnik oqaluttuarisaanermi Sibiriamut Alaskamullu attuumassuteqarpoq.

Itsarnisarsiorfimmi nassaat inuillu oqaluttuaata uppernarsarpaat amaqqut nujuartat kitaani kangerlunni angalaartarsimasut Canadamillu siku ituillugu ikaarsimagaat. Piniartut qimmit nukittunerulersinniarlugit pinertusaarnerusinnaaniassammata piaaralutik qimmit amaqqunik piaqqitinneqarput.

- Qimussertartut amaqqunik akusanik qimmeqarnissaq ilaasa kissaatigisimavaat, qimmillu amaqqunik akillugit piaqqiortillugit. Lund Jensenip qimmit qimuttut amaqqunik piaqqitinneqarsimasut tusatsiakkat pillugit aperineqarami tamanna uppernarsarpaa.

Nanorriutit — nannunniutit

Qimmit ilaat immikkut ittuupput nanoriutitinik taaneqartarput - nannunniutit. Qimmit taakkua sananeqaatiminnik qimminit allanit allaaneruganngillat, taamaatsorli piniartumit suliassamut navianartumut qimmit immikkut toqqartorneqartartut.

Qimmeq nannunniarnermi atorneqartartoq sapiissuseqartariaqarpoq, qimminummi amerlanernut nanumik naapitsineq naliginnaasuunngilaq. Piniarnermi qimmit nanoq anguniarlugu allunaavi kipineqartarput.

- Qimmit eqqortut toqqarnissaat sungiusarnissaallu pillugit ilisimasat misilittakkat aallaavigaluit ilusilerneqartarput atuakkat aallaavigagit, Manumina itisiliivoq.

Inatsisartut qimussertarnermik kultoori attatiinnarniarlugu qimussertut oqaasii tusaasariaqarpaat

Qimmit qimuttut kinguaariit tulliuttut eqqarsaatigalugit tammaannannginnissat eqqarsaatigalungu Inatsisartuni politikkerit qimussertartut tusaaniarnerullugillu sumiiffimmilu unammillernartut paasisinnaasariaqarpaat.

Ilaatigut nerukkaatissannut aningaasartuutit qaffasippallaarnerat illoqarfinnillu pilersaarusiorneq, sanaartornerit pissutigalugit qimmilivinnik piujunnaartitsisartut, pakatsissutigineqartarput.

Kujataani illoqarfiilluunniit annerit qimusserfiunngikkaluartut kulturiusup annaaneqarnera inuiattut kinaassutsitinnik annaasaqaataassaaq.

Avanersuarmiut qajaqarlutillu qimussertarput, oqaluttuarisaanermilu qimmit sutigut tamatigut iluaqutaapput, soorlu assartuinermi, kamippanut kissartumut kamiillu amii atorneqartarlutik.

- Kulturi allanngorartuarpoq, siuaasalli qimuttunik qimmiuteqartuarsimapput... oqaluttuarisaanerannulli ilaalluinnarpoq, ilisimatusartoq Manumina Lund Jensen taama naggasiivoq.