Naneruusimaarniaraanni mianersornissaq pingaaruteqarpoq, Kalaallit Nunaanni Politiiniit Aputsiaq Hansen oqarpoq.
Maniitsumi illup qisummik sanaap silataa qaliatalu isua ikuallannera pingasunngormat nalunaaqutaq 09.51 nalunaarutigineqareersorlugu taamatut eqqaasitsisoqarpoq.
Naneruutit ikuallannermut peqqutaagunarpoq.
- Mianersornissaq pisariaqarpoq, piareersomasut aqutsisuat oqarpoq.
Ajoqusertoqarsimanersoq politiit nalunaarusiaanni eqqaaneqanngilaq.
Nakuusertoqarnera nalunaarutigineqartoq
Ikuallattup saniatigut politiit pisut allat pillugit aamma nalunaarfigineqarput, ilaatigut nakuusernermut suliat marluk.
Aappaa Nuummi pingasunngornermi nalunaaqutaq 11.29 pivoq, tassani inuk persuttarneqarnermini uluaata saarnga napisimagunarluni.
Pisup aappaa Tasiilami pivoq, tassani inuk niaqutigut pingasoriarluni anaatarneqarluni. Pisumi politiit pasisaqarput.
Pisimasut taakku marluk Kalaallit Nunaanni Politiinit misissorneqarlutillu suliarineqarput.
Aamma Nuummi tarnikkut nakuusertoqarneranik nalunaaruteqartoqarpoq, angerlarsimaffinnilu eqqissiviilliornerit, aserorterinerit aqqusinemilu eqqissiviilliornerit pillugit politiit nalunaarfigineqarput.
