Takorlooruk oqarasuaatit angallattakkt atorlugu ilaquttatit kammalaatitillu sms-ikkut inoqatinulluunniit attaveqaatitigut interneti atorlugu attavigisinnaanagit. Sianerfigisinnaanagit.
Fjernsynikkut nutaarsiassat kingulliit timersortulluunniit isiginnaarsinnaanagit. Nutaarsiassanik paasissutissanillu pissarsissaguit KNR-radio iridiumilu kisimik periarfissaasut. Qanigisatit nunarsuup sinneraniittut, qanikkaluartulluunniit, sianerfigissagukkit iridium atorlugu minutsimut koruuninik 30-inik akiliissaatit. Iridium taanna kommunip allaffianit pigineqarpoq. Sianerniartut allaffiup ammanerani allaffimmukartarput.
Tamakkuupput Qaanaap kangerluani inoqarfimmi, Qeqertani, ulluinnarsiutaasut. Navarana Nielsen, Qeqertani Pilersuisup pisiniarfiani sulisoq taassumalu saniatigut nunaqarfiup peqqinnissaqarfiani nakorsaatinik paarsisuusoq, Qaanaamiinnerani oqarasuaataatalu avammut attaveqarnerani Sermitsiamit oqaloqatigaarput.
- Misigisimasarpugut nunarsuarmi immikkuullarilluinnartumik inuulluta, Navarana Nielsen oqarpoq.
Pissutsit taama innerat Tusassip Sermitsiamut uppernarsarpaa.
- Qeqertat Tusassip attaveqaatinut attaveqaataanut atassuteqarfigineqanngilaq, ullumikkullu FM-ikkut kisimi attaveqarpoq, ingerlatseqatigiiffiup attaveqatigiinnermut immikkoortortaqarfia allappoq.
Silamut pilluni sullissineq
Nunatta Naatsorsueqqissaartarfiata kisitsisaatai naapertorlugit Qeqertat ukioq manna januaarip aallaqqaataani 25-nik inoqarpoq. Inuttaqqortussuseq ukiuni kingullerni aalaakkaavoq.
Navarana Nielsen Pilersuisup nunaqarfimmi pisiniarfiani sulivoq, taamaammallu aamma aningaasanik tigusiniartunik sullissisarpoq. Internetimummi attaveqanngimmat pisiniarniarluni kortit akiliutaasartut atorsinnaanngillat, taamaattumik aningaasanik tiguseqqaartoqartariaqarpoq.
- Bankikkut aningaasanik tigusiniartoqaraangat silamut anilluta Qaanaamut bankimut sianertarpugut. Silami issittorsuarmi sianertariaqartarpugut. Pisiniartussat aningaasanik akiliisussaammata taakkua pillugit, Navarana Nielsen oqarpoq.
Sila ukiuunerani qaammatini arlalinni qaammassanani kaperlattarpoq isseqalunilu. Iridiumilu attaveqassappat allatut ajornartumik silamut aneqqaartariaqarpoq.
- Sianerniarluni ajornartorujussuusarpoq. Ilaanni attaveeruteqattaartarami utaqqinartaqaaq. Nuanninngittaqaaq. Sulinermi piffissaq iridiumimut atortagarput sivisoqaaq. Sulisuulluni attaveqaatit atorlugit imaaliallaannaq sianersinnaasannginneq ilungersunarnerpaanngortarpoq, taanna oqaluttuarpoq. Pilersuisoq sulinermut atatillugu iridiumimik peqartoq Navarana Nielsen erseqqissaavoq.
Minutsimut koruunit 30-it
Qeqertani innuttaasut namminneq iridiummeqanngikkunik inunnullu Qeqertaniinngitsunut attaveqarniarlutik, soorlu ilaquttaminnut nalunngisaminnulluunniit taava Avannaata Kommuniata sullissivianut sianeriartortarput. Tamannali akikinngilaq.
- Nalunngilara Sullissivik iridiumimik pigisaqartoq. Taassuma atornera minutsimut koruuninik 30-inik akeqarpoq. Innuttaasunit atorneqassaguni minutsiinnarmut 30 koruunersuarnik akeqartarpoq, Navarana Nielsen oqarpoq.
Kommunip iridium-iata atornera minutsimut koruuninik 30-nik akeqartoq, Avannaata Kommunianit Sermitsiamut uppernarsarneqarpoq.
Iridiumimit mobilimut sianerneq Tusassip akigititai naapertorlugit minutsimut 7 koruuneqarpoq. Tamanna Tusassip Sermitsiamut uppernarsarpaa. Taamaalilluni Qeqertani najugallit kommunip iridiumianik atuinerminni tusassip akigititaanit sisamariaat sinnerlugu kommunimut akiliinerusarput.
Neriuuteqartoq
Taassuma oqarnera naapertorlugu nunaqqatigiit siunissami periarfissagissaarnerulernissaminnik neriuuteqarput.
- Soorunami tamatta nunaqqatigiiusugut attavittaarnissarput kissaatigeqaarput. Nalunngilara meerannguanit utoqqarsuarnut taama kissaateqartut, Navarana Nielsen oqarpoq.
Starlink atugaasoq
Sermitsiap paasissutissaatai naapertorlugit, Qeqertani attaveqaatitigut atugassarititaasut taama inneranni, Tusassillu attaveqaatinik pitsaanerusunik neqerooruteqannginnerani, nunaqqatigiit internetimut atassuteqarusullutik attaveqaammik starlinkimik atuisarput. Tamanna aamma tusarfiit imminnut attuumassuteqanngitsut uppernarsarpaat.
Starlink tassaavoq qaammataasat atorlugit internetimut attaveqaat. Tusassip attaveqaatiginngisaanik atuineq nunatsinni inerteqqutaavoq. Ingerlatseqatigiiffimmi Namminersorlutik Oqartussat pigisaat kisermaassilluni ingerlatsisussaasoq inatsisitigut aalajangerneqarnikuuvoq. Taamaattumik starlinkimik inoqarfinni atuineq inatsisinik uniuineruvoq.
Sermitsiap Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoq, Iddimanngiiu Jensen Bianco (IA), suliaq pillugu apersorumallugu attaveqarfigigaluarpaa. Taannali Sermitsimit apersorneqarumanngilaq, allakkatigullu akinissaminik neqeroorluni. Naalakkersuisup Sermitsiap akissutai akisimalerpagit allaaserisaq tassunga tunngasoq saqqummissaaq.
