- Inuiattut ataqqineqarnissarput kissaatigaarput

Oqaluttuaq nuannersutut nipeqarsinnaavoq: Vivian Motzfeldt, nunanut allanut tunngasunut naalakkersuisuunikoq Inatsisartuni maanna attaviitsoq, politikerit isertortumik ataatsimoorfianni Bilderbergimi ukiumoortumik ataatsimiinneranni peqataanera. Kalaallit Nunaanniillu amerlanerpaat nalugunagaanni.

Ataatsimiinneq USA-mi illoqarfiit pingaarnersaanni Washingtonimi ingerlanneqarpoq.

- Issittoq Bilderbergimi sapaatip-akunnerata naanerani ataatsimiinnermi sammineqartut ilagaat. Natomilu generalsekretæriusimasoq Jens Stoltenberg oqallinnermi aqutsisoralugu oqallinnermi Sverigep illersornissamut ministeria Pål Jonson ilaatigut peqatigalugu oqalliseqataavugna, Vivian Motzfeldt Sermitsiamut oqarpoq.

Ataatsimiinnermi suna pingaarnertut oqariartuutigiviuk?

- Kalaallit Nunaat nunani tamalaani politikkimi sumiiffia kisimi apeqqutaanngitsoq. Inuit ukiuni tusindilikkaanni tassani inuunikunit najugaqarfigineqartoq. 

- Inuiattut ataqqineqarnissarput kissaatigaarput. Inuiaavugut qallunaajunngitsut, kunngeqarfiulli iluani nammineq oqartussaassusillit. Inuiaavugut nammineq oqaatsiminnik atuisuullutillu kulturimik ukiuni tusindilinniit sorlaqartumik tunngavillit, Vivian Motzfeldt nassuiaavoq.

Kalaallit Nunaat pissaanilinnik ileqarpoq

Kalaallit Nunaanniit Bilderbergimut siulermeerluni qaaqqusisoqarpoq. Vivian Motzfeldtip Bilderbergimi ataatsimeeqataanera Kalaallit Nunaata Atlantikumeersunik pissaanilinnik ileqarnera Trumpip naalakkersuisuinut oqariartuutaasutut malinnaasunit nalilerneqarpoq.

USA-mi illoqarfiit pingaarnersaanni Washingtonimi Hotel Salamanderimi tallimanik ullorialimmi akimasumi ataatsimiinneq pivoq. USA-mit Europamillu ataavartumik ilaasortat immikkullu qaaqqusat peqataapput.

- Ataatsimiinneq ulluni pingasuni ingerlanneqartarpoq, tassanilu suleqatigiilluni ulapputtoqartarluni, Vivian Motzfeldt oqarpoq.

Europap USA-llu oqaloqatigiinnerat siuarsarneqassaaq

Bilderbergimi politikkikkut ataatsimiinnerit 72-issaraat, tusagassiortunullu susoqarsimanera isertuunneqartaraluarluni.

Ataatsimiinneq NATO-mi nunat iligiit ajornartorsiornerani siunissamilu qanoq pisoqarumaarneranik nalorninartoqarnerani pivoq. USA-p præsidentia Donald Trump Natomit aninissaq sapaatit-akunnerini kingullerni sioorasaarissutigisaqattaarpaa.

Politikerit pissaanillit inuussutissarsiornermilu siuttut Europameersut amerikameersullu 1950-ikkunniilli USA-mi imaluunniit Amerikami avannarlermi Bilbergimi ukiut tamaasa ataatsimeeqatigiittarput.

Qaaqqusaasut kisimik ataatsimiinnernut peqataasinnaapput, matullu matoqqatillugit ingerlanneqartarpoq nalunaarutinillu suliaqartoqarneq ajorluni.

Aaqqissuussap Europap USA-llu akornanni oqaloqatigiinnerup siuarsarneqarnissaa siunertaraa.

Teknologiimik milliardærit sakkutuullu siuttui

Ukioq manna sapaatip-akunnerata naanerani ataatsimiinnermi kikkut peqataappat? Ministeriunerit, soorlu Finlandip præsidentia Alexander Stubb, sakkutuut naalagaat, teknologimik milliardærit aningaasaliisartullu suliffeqarfissuanni pisortaasut peqataasut, tuluit aviisiat The Guardian allappoq.

Bilderbergimi Natomilu siulittaasoq Mark Rutte "Præsidentip illorsuani unneqqarissumik oqaloqateqareernermi kingorna“ ataatsimiinnermut apuuttoq, tusagassiorfik allappoq.

Trump Natomit aniniarluni oqartaraluartoq Amerikamiut suliffeqarfissuini pisortaanerit, ilaatigut nakorsaatinik nioqqutissiorfimmi Pfizerimi, peqataapput. Politikeritoqqat Trumpimut qanimut suleqateqartut ilagalugit ataatsimeersuarnermut peqataapput. Sakkutuuniit generali Samuel Paparo sisamanik ullorialik peqataavoq.

Vivian Motzfeldt, Kalaallit Nunaat Issittorlu pillugit qanoq oqarpit?

- Issittumi sakkoqarneqqusaannissap kissaatiginnginnera oqariartuutigaara. Aammali Issittumi aqutsisuerunnissaat kissaatiginngikkipput. Sakkutooqarfinngornissarput siunertatut isiginngilarput, aammali allat politikikkut pissaaneqarniarnerisa siunissatsinnik aalajangiisuunissat akuerinagu.

Isumannaallisaanermut nunanullu allanut tunngasunut politikkimut tunngatillugu qanoq nalunaaruteqarpit?

- Isumannaallisaanermut tunngatillugu maanna oqaluttuarisaanermi piffissami pingaarutilimmiippugut, isumannaallisaaneq allanngorartuarpoq. Allanngupallattarpoq, annertuumillu allanngortarluni.

- Maannakkut nunarsuup sinnera Issittumi isumannaallisaaq pillugu malinnaapput – Kalaallit Nunaannut – Issittumi isumannaallisaanikkut unammilligassat ukiuni arlalinni pingaartillugit isiginiartariaqarsimavagut.

- Silap pissusiata allanngoriartornera ukiorpassuarni ulluinnarni inuunitsinnut sunniuteqartarpoq. Avatangiisitsinnut, piniarnissamut aalisarnissamullu periarfissatsinnut ileqqutoqqatsinnillu inuussutissarsiutitsinnut sunniuteqartarpoq. Sikukinnerusalernerata saniatigut avatangiisivut aamma allanngussapput, periarfissanik nutaanik unammilligassanillu nutaanik pilersitsiumaarlutik, Vivian Motzfeldt oqarpoq.

Præsidentip illorsuaniit nipi atorneqartoq

Siunissami umiarsuarnik angallaffiusinnaasut niuerfiulluarsinnaasullu nutaat, soorlu avannamut aqqutit aqqutigalugit Asiap Europallu akornanni ammarneqarsinnaasut, aamma pinngortitap pisuussutaanik pingaarutilinnik pissarsiffigiuminarnerulissasoq, Bilderbergimi ataatsimiinnermi naqissuserpaa.

Donald Trumpip Kalaallit Nunaannik tiguaaniarluni oqaasii illit oqaaseqarfigerusuppigit?

- Kalaallit Nunaat ukiuni qulikkuutaani USA-miit tatigineqarsinnaasumik iliunini ikinngutaaninilu takutinnikuugaa oqarpunga. Sorsunnersuup aappaaniilli amerikamiut sakkutuui nunatsinniipput, maannalu Pituffik Space Basemi sakkutooqarfik USA-mi Kalaallillu Nunaanni isumannaallisaanermut pingaaruteqarluni. Tamannali isumannaallisaanerup aqunneqarnerani nunarput USA ataaniittariaqarneranik isumaqanngilaq.

- Aallaqqaammulli erseqqissumik USA-p isumannaatsuunissaa uagutsinnut aamma tunngassuteqartoq oqaatigaarput.

- USA-p isumannaatsuuneranut suleqataanerput tulluusimaarutigaarput, præsidentilli illorsuaniit nipi atorneqartoq ukiuni qulikkuutaani tatigeqatigiinnitsinnut ikinngutigiinnitsinnullu akornutaavoq kalaallinilu inuiaqatigiinni annertuumik isumakulunnermik kinguneqarluni.

Vivian: - Kalaallit Nunaat NATO-mi iligiinnut tunniusimavoq

Illersornissamut isumannaallisaanermullu politikki eqqarsaatigalugu Kalaallit Nunaata USA-llu suleqatigiinnerat pillugu qanoq oqarpit?

- Kalaallit Nunaat danskit illersornissamut isumaqatigiissutaannut ukiuni kingullerni peqataasarpoq. Nunarujussuartut innuttakitsutullu Issittumi isumannaallisaaneq eqqarsaatigalugu unammilligassat aaqqinniarlugit suleqateqartariaqarnerput ilisimajuaannarnikuuarput.

- Kalaallit Nunaat NATO-mi iligiinnut tunniusimavoq, Danmarkillu Kunngeqarfianut ilaagatta NATO-p iluani isumannaallisaanermut tunngasunik qanimut suleqataavugut.

- Isumannaallisaanikkut maanna siunissamilu unammilligassat iliuuseqarfigissagutsigit taamatut suleqatigiinneq pingaaruteqarpoq. Tamatta immitsinnut pisariaqartippugut, kikkulluunniimmi kisimiillutik pisinnaanngillat.

- Isumannaatsuunerup aningaasaqarnerullu qajannaannerat imminnut ataqatigiilluinnarnerat paasissallugu pingaaruteqarpoq, naalakkersuisuunikoq Vivian Motzfeldt Bilderbergimi ataatsimiinnermi oqariartuutini naggaserlugit taama oqaaseqarpoq.