Iran aningaasaqarnikkut sakkutooqarnikkullu tatineqarunnaarpat aatsaat ikummatissap akia allanngorarunnaassaaq.
Iranimi præsidentip tullia, Mohammad Reza Aref, sapaatiummat unnukkut inuit attaveqatigiittarfianni X-imi taamatut allappoq.
- Hormuzip Kangerliumarngani isumannaallisaaneq akeqarpoq. Allat isumannaallisaaffigineqarnissaat naatsorsuutigalugu Iranip uuliamik avammut tunisassiornera killilerneqarsinnaanngilaq.
- Aalajangernissaq ersarippoq: tamanut ammasumik uuliamik niuerneq, imaluunniit kikkut tamarmik aningaasartuuteqangaatsiarnissaat, Aref allappoq.
Hormuzip kangerliumarngani Persiap Kangerliumarnganiit Omanip Kangerliumarnganiittumut ikaartarfik, Iranip, USA-p Israelillu sorsunnerisa nalaanni umiarsuarnut inuinnarnik angallassisunut piffissap annerpaartaani matuneqarsimavoq.
Nunarsuarmi uuliap tamarmi 20 procentia kangerluk taanna aqqutigalugu nalinginnaasumik assartorneqartarpoq. Taamaammat kangerluup matuneqarnera pissutigalugu nukissiuutit akii nunarsuaq tamakkerlugu qaffakkiartuaarsimapput.
USA Hormuzip kangerliumarnga umiarsuarnut Iranip umiarsualiviinut tassungalu aallartunut ataasinngormat kingullermi matuaa.
Ingerlaarfissaq pingaarutilik ammarneqartutut tallimanngormat nalunaarutigineqarpoq, kingornali matuneqartutut nalunaarutigineqarluni. Iranimit saassussisoqartoq umiarsuarnit nioqqutissanik assartuutit tassuuna aqqutikkoortut arlallit arfininngormat nalunaarutigaat.
Nalunaaruterpassuit nalunaaquttap-akunneri 24-t ingerlaneranni saqqummiunneqartut nunarsuaq tamakkerlugu isumallualersitsillutillu nukissiuutit akiisa appariarumaarnerannik neriuuteqalersitsipput.
USA-p umiarsuaq Iranimeersoq sapaammi tigusarisimavaa, umiarsuullu Amerikamiut umiarsuarnik mattussinera unitsinniarsarigaa USA-p præsidentiata Donald Trumpip oqaatigaa. Taamaaliortoqareersoq Iranip USA nunat taakku marluk akornanni sakkuaakkunnaarnermik isumaqatigiissutaannik unioqqutitsisutut oqaatigaa, Iranilu akiniaassamaarluni neriorsuuteqarpoq.
Uuliap Brentip nappartap ataatsip akia nutaarsiassaqartitsivik AP naapertorlugu sapaatiummat 96,25 dollarinngorluni 6,5 procentimik qaffappoq.
Tamatuma saniatigut USA-mi uuliap akiata 6,4 procentimik qaffassimanera pissutigalugu nappartaq ataaseq 87,88 dollareqalerpoq.
USA-p præsidentia Donald Trump naapertorlugu Amerikamiut aallartitaat Pakistanimi illoqarfiit pingaarnersaanni Islamabadimi ataasinngorpat Iranimik isumaqatigiinniaqqissapput.
Iranilli Pakistanimi ataasinngornermi isumaqatigiinniartoqarnissaa uppernarsarsimanngilaa.
/ritzau/
