Issittumi Siunnersuisoqatigiit ataatsimeersuarneri arlallit Kalaallit Nunaanni ingerlanneqassasut

Kalaallit Nunaat Issittumi Siunnersuisoqatigiinni qitiusumik inissisimaffeqarpoq – ingammik maannakkut, Kunngeqarfiup Danmarkip peqatigiiffimmi ukioq manna ukiunik 30-nngortorsiorluni nalliuttorsiortumi siulittaasuunerani.

Siulittaasoqarfik Kunngeqarfiup Issittumi aallartitaanit Kenneth Høeghimit siulersorneqarpoq, taassumalu Nuummi Nunanut Allanut Ilisimatusarnermullu Naalakkersuisoqarfimmi Københavnimilu Nunanut allanut Ministereqarfimmi allaffimminit sulineq katiterlugulu ataqatigiissaartarpaa.

Kisimiinngilarli. Camilla Aviaja Olsen, Nunanut allanut Ilisimatusarnermullu Naalakkersuisoqarfimmi atorfilik Issittumilu Siunnersuisooqatigiit pillugit suliaqartunut ilaasoq qanimut suleqatigaa.

Camilla Aviaja Olsen Issittumi Siunnersuisoqatigiinni suleqatigiissitat arfinillit ilaanni, akisussaasutut siuttuuvoq.

Inunnut sunniutit

Camilla Aviaja Olsen suleqatigiissitami SDWG-mik – Sustainable Development Working Groupimik - taaguutilimmi siuttuuvoq. Suleqatigiissitami Issittumi Siunnersuisoqatigiinni sulinerup inunnut sunniutai sammineqarnerupput, suleqatigiissitallu allat ilaatigut mingutsitsinermut avatangiisinullu tunngasunik immikkut suliaqarput.

Issittumi isumakkut peqqissuuneq imminortarnerlu pinaveersaartinnissaat, kiisalu aningaasaqarnikkut ineriartorneq nunap inoqqaavisa peqataatinneqarnerannik pingaartitsisoq SDWG-mi sammineqartartut pingaarnerit ilagaat.

Suleqatigiissitat sulinerat Issittumi Siunnersuisoqatigiit periusissatut pilersaarutaannik aamma Kunngeqarfiup siulittaasuuffimmini pingaarnersiuineranik tunngaveqarpoq. Pingaartitat makkuupput:

1) Issittumi nunap inoqqaavi inuiaqatigiillu

2) Aningaasaqarnikkut ineriartorneq piujuartitsisoq nukissiornermullu tunngatillugu allannguineq

3) Imaq

4) Issittumi silap pissusiata allanngoriartornera

5) Uumassusillit assigiinngiiaarnerat

Suliniaqatigiiffinni siulittaasuuffik ukiut marluk sinnerlugit paarlakaajaallugu Issittumi Siunnersuisoqatigiinni nunanit arfineq-pingasunit ilaasortaasunit tiguneqartarpoq - SDWG-milu siulittaasuuneq pingaarnertut siulittaasuuffimmut malinnittuusarpoq.

Issittumi Siunnersuisoqatigiit suliassaasa amerlanersaat suliniaqatigiiffinni taakkunani suliarineqartarput – tassanilu allakkat pingaarutillit tamarmik allanneqarlutillu akuersissutigineqartarput. Siunnersuisoqatigiit aallussaasa amerlanersaat suliniaqatigiiffinni aamma aaqqissuunneqartarput.

- Issittumi Siunnersuisoqatigiinni siuttuugatta ukiup tulliani pisussanut annertuunut arlalinnut Kalaallit Nunaat tunngaviliissaaq, tassanilu SDWG qitiusumik inissisimassaaq, Camilla Olsen oqaluttuarpoq.

Inuusuttunut ataatsimeersuarneq

Siulittaasoqarfik Nuummi inuusuttut ataatsimeersuarnerannik aaqqissuissaaq, taannalu Katuami 2027-mi februaarip 26-aniit 28-anut ingerlanneqassaaq. Ataatsimeersuarnermi inuusuttut 300-t missaanniittut Issittumit tamarmeersut Nuummut katersorneqassapput, tassani avitseqatigiillutillu Issittumi inuusuttut atugaat sammissavaat.

- Ataatsimeersuarnissaq piareersarneqalereerpoq. Januaarimi Ottawami isumasioqatigiinnermi peqataavunga, tassani ilaatigut sammisat suut ullumikkut oqallisaassanersut eqqartorneqarput. Piffissami takkuttumi inuusuttut ataatsimeersuarnissaminni oqallisigisassaannut iluaqutaasussamik isumasioqatigiittassaagut.

- Aammattaaq uumassusillit assigiinngisitaarnerat pillugu ataatsimeersuarneq 2027-mi marsimi Nuummi ingerlanneqassaaq – aamma Issittumi aningaasaqarnikkut ineriartorneq pillugu isumasioqatigiissitsinissaq sulissutigaarput. Sumi qaqugulu ingerlanneqassanersoq suli aalajangerneqanngilaq, isumasioqatigiinnerulli Nuup avataani ingerlanneqarsinnaa anguniarparput.