Naalakkersuisut siulittaasuat Jens-Frederik Nielseni (D) tallimanngornermi arfininngornermilu nunat tamat Münchenimi isumannaallisaanermut ataatsimeersuarneranni peqataavoq, tassanilu ministeriuneq Mette Frederiksen peqatigalugu ilaatigut USA-p nunanut allanut ministeria Marco Rubio ataatsimeeqatigaat.
Sapaammi Jens-Frederik Nielsen Facebookikkut ataatsimeersuarnermi oqariartuutiminik nalunaaruteqarpoq, tassanilu ilaatigut nunat allat immikkoortuisa qunusaarneqarnerat akuersaarneqarsinnaanngilluinnartoq erseqqissaatigaa:
- Eqqarsariartaaseq taanna akueriartussagutsigu, nunarsuaq nunat pissaanilissuit naalagaaffeeqqat taakkulu nammineerlutik aalajangiisinnaassusaat ataqqinagu, sunniuteqarnermik avitsivigisaat. Nunarsuaq taamaattoq kissaatiginngilarput, Jens-Frederik Nielsen allappoq.
- Ilitta tatiniarsaraatigut
Kina Ruslandiluunniit Kalaallit Nunaanni toqqissisimannginnermik pilersitsinngitsoq, iligisarli taamaaliortoq ilanngullugu erseqqissaatigaa:
- Nunatsinni ukiorpassuarni pissanganartorsiorfiunngitstumik inuuvugut. Ruslandimit Kinamilluunniit qunusaarneqarluta misiginngilagut.
- Kalaalerpassuit toqqissisimannginnermik siullermeerlutik misigimmata, iligisaq nunatsinnik tatisiniaavoq, taamaaliorneratalu siunissarput nalorninarsisippaa, Jens-Frederik Nielsen allappoq, tassanilu USA taatsiarpaa, tassani præsidentip Donald Trumpip arlaleriarluni USA-p Kalaallit Nunaat tigusariaqaraa oqariartortarpoq.
Kalaallit Nunaat pillugu aalajangernerit Kalaallit Nunaanni pissasut, Kalaallillu Nunaat nunarsuup immikkoortuani tamaani akisussaaffimmik annerusumik tiguseqataasoq, Jens-Frederik Nielsenip erseqqissarpaa.
Donald Trumpip arlaleriarluni Kalaallit Nunaanni isumannaallisaaneq isornartorsiortarpaa, Kalaallillu Nunaat Kinamiut Russillu umiarsuaannit unguneqaqqasoq oqartarluni. Taama oqarneq kalaallit danskillu eqqunnginnerartarpaat, Kalaallilli Nunaanni illersornissaq nukittorsarniarlugu suliniutit arlalissuit aallartinneqarput.
