Ombudsmandip Inatsisinik atortitsinermut ministereqarfik Kalaallit Nunaanni isertitsivinniittut ulloq unnuarlu nakkutigineqartarnerat inatsisinut naapertuunnersoq oqaaseqarfigeqqullugu qinnuigaa.
Tamanna Ombudsmandip Kalaallit Nunaanni isertitsivinnut pineqaatissinneqarsimasunullu inissiisarfinnut nakkutilliiartorluni 2025-mi tikeraarnerminii tusagassiutitigut nalunaarutaani atuarneqarsinnaavoq.
Ombudsmandip nakkutilliilluni tikeraarnermini isertitsivinni assiliiviit nakkutilliissutit qaminneqarsinnaanngitsut, taamaammallu isertitsivimmiittut ulloq unnuarlu nakkutigineqartartut paasivaa.
Aammattaaq tigummigallarneqartut isertitsivinni pisataqanngitsuniittarnerat.
Madraasi ataaseq natermi
Isertitsivinni madraasi ataasiinnaq natermiittoq pisatatuaavoq, tusagassiuutitigut nalunaarummi allassimavoq.
Kalaallit Nunaanni politiit piffissami sivikitsumi tigummigallarneqartunut isertitsiviit taamaallaat malittarisassat naapertorlugit atortussaavaat, Ombudsmandilli nalunaarutaa naapertorlugit inuit ilaat sapaatip-akunnerini arlalinni ilaannikkullu qaammatini arlalinni tigummigallarneqartut tassaniitsinneqartarput.
Pineqaatissinneqarsimasunut inissiisarfinni inissaaleqineq pissutaalluni taamaattoqartoq Kalaallit Nunaanni Pinerluttunik Isumaginnittoqarfik nalunaarpoq.
- Tigummigallarneqartut qanoq sivisutigisumik politeeqarfinni isertitsivimmiinnerat assiliivinnillu nakkutigineqarnerat kiffaanngissutsimut arsaarneqarnermut tunngatillugu inatsisitigut isumannaatsuunissamut pingaaruteqarluinnarpoq, Folketingimi ombudsmandi Christian Britten Lundblad tusagassiuutitigut nalunaarummi oqarpoq.
- Taamaattumik kiffaanngissusiiagaanermut tunngatillugu pisinnaatitaaffiit malinneqarnersut qulakkeerniarlugu pissutsit taaneqartut misissoqqissaarneqartariaqarput.
Angutit arnallu immikkoortortaqarfimmi ataatsimi
Nuummi pineqaatissinneqarsimasunut inissiisarfiup matoqqasortaani arnat angutillu ataatsimoortillugit inissinneqarsimanerat ombudsmandip tikeraarnermini aamma maluginiarpaa. Tassunga atatillugu Ombudsmandip Kalaallit Nunaanni Pinerluttunik Isumaginnittoqarfik inissinneqarsimasut ataatsimoorsinnaaneranut qanoq kinguneqarnersoq nassuiaateqaqquaa.
Ombudsmandip nakkutilliiartorluni tikeraarnerminiit Kalaallit Nunaanni Politiinut aamma Pinerluttunik Isumaginnittoqarfimmut arlalitsigut innersuussuteqarpoq.
Kalaallit Nunaanni Politiinut tigummigallarneqartunik nakkutilliisarnermut aamma politiit tigummigallarneqartunut atortussanik elektroniskiusunik namminneq nakkutilliinerannut tunngasut innersuussutigineqartut ilagaat.
Pineqaatissinneqarsimasunut inissiisarfimmiilerlaat imminut toqunnissamik aarlerinaateqarsinnaanerannik nakkutilliinermut aamma nakorsaatinik isumaginninnermut tunngasut Kalaallit Nunaanni Pinerluttunik Isumaginnittoqarfimmut innersuussutigineqarput.
/ritzau/
