Kangerlussuarmi innuttaasut sakkutuut innuttaasullu akornanni oqimaaqatigiissaarinerunissamik ujartuipput

Ajaaja Schmidt uinilu Apunnguaq Schmidt maajip aallaqqaataanni Kangerlussuarmut nuupput, nunaqarfimmi najugaqalivinnissartik kissaatigalugu.Apunnguaq Schmidt nunaqarfimmi peroriartorsimavoq pissutsillu ilisimalluarlugit. Taamaattumik nunaqarfimmi illersornissamut tunngasut sakkutooqarnerlu qanoq pingaartinneqartigisut takugamikku tupaallaatigeqaat.

 – Kangerlussuarmi sakkutooqartuarsimasoq nalunngilara, taamaattumik taakkua najuunnerat kisiat qisuariarfiginngilara. Apriililli pingajuanni innuttaasunik ataatsimiititsinerup kingorna innuttaasut amerlasuut sulisunut inissianik amigaateqartut aamma nalinginnaasumik inissaaleqinermik misigisaqartartut erseqqissiartuinnarami. Aamma INI-p tungaanit inissiat iluarsaanneqarnissaat piffissami sivisuumi naammattumik pingaartinneqarneq ajortoq misigisimavara. Allaannginnami aaqqissuussineq equngassuteqartoq, inissiammi ilaat atorneqanngimmata imaluunniit innuttaasunut nalinginnaasunut piareersimanngitsut, illersornissamik isumaginnittunut tunniunneqarsinnaasarmata taakkulu nutarternissaannut periarfissinneqartarlutik, Ajaaja Schmidt Sermitsiamut oqarpoq.

Nunaqarfimmi oqimaaqatigiissaarinissaq

Ajaaja Schmidtip erseqqissarpaa, sakkutuunut akerliuneq pineqarani, kisiannili innuttaasut pisariaqartitaasa sakkutuullu pisariaqartitaasa oqimaaqatigiissaarneqarnissaat pineqartoq.

– Sakkutuut imminnut mattusimasorujussuusarput, aamma nalunngikkaluarpakka amerlasuut nunaqarfimmiunut akuliusimanerunissaminnik kissaateqartut. Borgmesterip Kangerlussuarmiunut iliuuseqarnerunissaa kissaatiginartissinnaavara - ingammik amerlasuut ernummateqarlutik oqaatigisaannut tusaaniarnerussasoq.

Innuttaasunik ataatsimiititsinissaq

Ajaaja Schmidtip oqaatigaa, qaammammi matumani kingusinnerusukkut Naalakkersuisunut ilaasortaq Múte B. Egede borgmesteri Malik Berthelsen peqatigalugu innuttaasunik ataatsimiititsiniartoq, neriuutigalugulu tassani innuttaasut tusarneqarumaartut.

– Ukiup ataatsip matuma siornagut pissutsit allaanerulluinnartut nalunngilara, inissiarpassuimmi inoqanngimmata. Taamaattumik aamma paasilluarsinnaavara inissiat atulersinneqarnissaat isumaqatigiissutigineqarmat. Isumaqarpungali naammattumik eqqarsaatigineqarsimanngitsoq Kangerlussuarmi sulisunut najugaqartunullu sulisunut inissianik nalinginnaasunik peqatigitillugu inissiaqarnissaa. Ajornartorsiut tassaanngilaq inissiat atorneqartarnerat — ajornartorsiut tassaavoq maannakkut oqimaaqatigiissaarinerup amigaataanera, taamaalilluni innuttaasut ilaqutariillu nalinginnaasut nunaqarfimmi najugaqarlutillu najugaqartuarnissaminnut periarfissaqarniassammata.

Nunaqarfiup pilersaarusiornissaa ujartorneqartoq

Innuttaasulli ilaasa Kangerlussuarmi sakkutooqarnerulernera nuannaarutigaat, soorlu Vivi Schultzip, nunaqarfimmi "Vivi’s Shop"-imik piginnittup.

Niuertarfiutiminik piginnittuaannarnissani ilaatigut sakkutuunit qulakkeerneqarsimasoq isumaqarpoq.

"Inunnik takussaasoqarluaqqilernera nuannaarutigaara. Tassami Kangerlussuaq taama eqqaamagakku taamaattussaasoralugulu." Facebookimi quppernermini allappoq. Taanna aamma Ajaaja Schmidtitulli nunaqarfiup ukiuni aggersuni qanoq ineriartortinneqarnissaanut pilersaarusiortoqarnissaanik ujartuivoq.

Issittumi Sakkutooqarfiup innuttaasunik ataatsimiititsinissaq pilersaarpaa

Kangerlussuarmi pissutsit Issittumi Sakkutooqarfimmiit qanoq isumaqarfigineqarnersut Sermitsiamiit apequutigaarput. Illersornissaqarfiup Kangerlussuarmiinnerulernera "apeqquterpassuarnik pilersitsisoq ilisimaneqarpoq. Taamaammallu nunaqarfimmi innuttaasunik ataatsimiititsinissaq sapaatip-akunnerata tulliani pisussaq pilersaarusiorneqarpoq. Issittumi sakkutooqarfimmi pisortap Illersornissaqarfiup nunaqarfimi pilersaarutaagallartut saqqummiutissavai, innuttaasullu apeqqutaannut akissutissaqassalluni."