Inatsisartut siulittaasuat Kim Kielsen Kalaallit Nunaanni piffissaq sorleq atuutissanersoq aamma aasaanerani ukiukkullu nalunaaqutaq allanngorartuassanersoq pillugit inatsisissatut siunnersuutit marluk sivisuumik suliarineqarnerannut atatillugu maanna nalunaaruteqarpoq.
Inatsisissatut siunnersuutit marluk aappassaaneerneqarnissaat ukiakkut ataatsimiinnissaannut kinguartinneqartut sapaatip-akunnerani matumani saqqummiunneqarpoq. Aappassaaneerinninnerup aallartilaarnerani oqallinneq unitsinneqarpoq, inatsisinillu atuutsitsinermut ataatsimiisitaliamut ingerlateqqinneqarnerata kingunerisaanik tamanna pivoq.
Tamanna illuatungiliuttut partiiata ilaanniit Naleqqamit isornartorsiorneqarpoq, ilaatigut Inatsisartut siulittaasuat inatsisartut suleriusaannik eqqortumik malinnaannaanersoq apeqquserneqarluni.
Inatsisartut Siulittaasoqarfia pinnani Inatsisartulli tamarmiusut inatsisissatut siunnersuutit marluk ataatsimiititaliamut utertinneqarnissaat aalajangeraat Kim Kielsen tusagassiutitigut nalunaarummi allappoq:
- Ataatsimiititaliaq isumaliutissiissuteqaqqereerpat aappassaaneerinninneq aatsaat nangeqqinneqarsinnaavoq, tamatumalu ataatsimiinnermi ingerlasumi naammassineqarsinnaanissaa ataatsimiititaliap naatsorsuutiginngilaa, Kielsen allappoq.
- Siulittaasoqarfiup appisaluunnissaanut pissutissaqanngilaq
Ataatsimiititaliap misissueqqinnermut nammineerluni piffissamik qanoq sivisutigisumik atuissanerluni aalajangersinnaagaa taassuma erseqqissarpaa:
- Inatsisissatut siunnersuutini marlunni apeqqutit pineqartut imaannaanngitsuupput. Apeqqutit minnerunngitsumik nunatsinni innuttaasunut pingaarutilerujussuupput. Siunnersuuteqartut namminneq tamanna uparuarsimavaat. Misissuinerit isumaliuteqarnerillu imaaliallaannaq naammassineqarsinnaaneq ajorput, Kim Kielsen allappoq.
Siunnersuuteqartut naammagittaalliornerat tunngavissaqanngitsoq taanna isumaqarpoq:
- Siunnersuuteqartut aalajangiinissamut tunngavissat pigineqartut tunngavigalugit siunnersuutimik itigartinneqannginnerisa nuannaarutiginissaannut pissutissaqarnerunerlutik – imaluunniit siunnersuutip maanna aatsaat ukiakkut ataatsimiinnermi naammassillugit suliarineqarnissaannik ajuusaarutiginninnissamut pissutissaqarnerunerlutik namminneq isummerfigisassaraat.
- Siulittaasoqarfiup appisaluunnissaanut pissutissaqanngilaq, Kim Kielsen allappoq.
Inatsisinut ataatsimiititaliap siunnersuutit itigartinneqarnissaat innersuussutigigaat, suliarineqaqqinnissaalli tapersersorneqartoq Kielsenip oqaatigaa.
