Kommune Kujalleq Akileraartarnermut Aqutsisoqarfimmut 4 millionit koruuninik akiliissaaq. Nunatta Karsiata suliami aningaasartuutit akilissavai.
KNR marlunngormat ullaap tungaani eqqartuussut pillugu taama allappoq.
Unnerluussisussaatitaasut kommunip akileraarutinut A-nut kingusinaartumik akiliisimanerat pillugu Akileraartarnermut Aqutsisoqarfimmut 6,1 millionit koruuninik akiligassinneqarnissaa piumasarigaluarpaat, kommunili 4 millionit koruuninik akiligassinneqarpoq.
Suliaq Kommune Kujalliup 2023-mi aamma 2024-mi akileraarutinut A-nut qaammatini qulini piffissaq eqqorlugu akiliisimannginneranut qaammatinilu pingasuni akiliinngitsoorsimaneranut tunngavoq.
Kommune aningaasaqarnikkut ajornartorsiortoq
Ilisimannittut tallimat kommuni aningaasaqarnikkut ajornartorsiortoq aqutsinerluttorlu apriilip 21-ani eqqartuussinermi oqaluttuaraat. Aningaasaqarnermut aaqqissuussineq nutaaq paatsiveerutsitsivoq, siunnersortillu avataaneersup suliamik paasiniaanissaata tungaanut kommunimit piffissaq eqqorlugu akileraarutinik akiliisoqarsimasoq qularineqanngilluinnarpoq.
- Kommunip tamanna maluginiarsimanngikkaa taakkualu isumaqarnerattut aningaasat akilerneqarsimasut paasivara, siunnersorti avataaneersoq eqqartuussivimmi oqarpoq.
Kommune Kujalleq piffissaq eqqorlugu akileraarutinut A-nut akiliisimanani nammineerluni tamanna pillugu saaffiginnimmat Akileraartarnermut Aqutsisoqarfiup aatsaat paasisimagaa ilisimannittut aamma oqarput.
Kikkut tamarmik akiligassinneqarneq ajortut
Piffissaq eqqorlugu akileraarsimanngitsut pillugit nalunaarsuuteqanngitsoq, taamaammallu piffissaq eqqorlugu akileraarsimanngitsut tamarmik akiligassinneqarneq ajortut Akileraartarnermut Aqutsisoqarfimmi sulisup eqqartuussivimmi nassuiaatigaa.
Kommuni februaari 2025 aallarnerfigalugu Akileraartarnermut Aqutsisoqarfimmit akiligassaaruttoq Kommune Kujallermi aningaasaqarnermut pisortap/kommunimi pisortaanerup tulliata Arne Andersenip eqqartuussivimmi nassuiarpaa.
