Kommune Kujalliup akileraarutinik A-nik akiliisimannginnermut tunngatillugu nassuiaateqassalluni naatsorsuutigisinnaavaa.
Tamanna kommunimi pisortap Randi Vestergaard Evaldsenip uppernarsarpaa.
Akileraartarnermut tunngatillugu akiligassiinissamik suliaq Kalaallit Nunaanni Eqqartuussivimmi 2026-mi apriilip 24-ani suliarineqassaaq, Randi Vestergaard Evaldsen Sermitsiamut ilisimatitsivoq.
Ilaatigut suliami ilisimannittut aggersarneqarput.
Borgmesteriusimasup Stine Egedep (IA) tamanna siornatigut ajuusaarutigisimavaa.
- Aningaasaqarnermut ataatsimiititaliaq kommunalbestyrelsilu sinnerlugit akileraarutit piffissaq eqqorlugu akilerneqarsimannginnerat pillugu utoqqatserpunga,“ 2024-mi kommunip akileraarutinik akiliisimannginneranik paasinarsisoqarmat taanna oqarpoq.
Aningaasaqarnikkut ajornartorsiutit innuttaasunit malugineqartut
Akileraarutinik akiliinngitsoorneq kommunimut aningaasatigut annertuumik kinguneqarpoq. Innuttaasut akileraarutinut 1 procentimik akiliinerussapput.
Aningaasaqarnermut ataatsimiititaliap borgmester Malene Vahl Rasmussen siuttoralugu akileraarutit 2 procentimik qaffanneqarnissaat siunnersuutigigaluarpaa. Missingersuusiornikkulli isumaqatigiinniarnerit kingorna akileraarutit 1 procentimik qaffanneqassasut aalajangerneqarpoq.
Kommunaldirektøri oqaaseqaqqikkusunngilaq.
- Eqqartuussivik aalajangiitinnagu suliamut akuliunnissara kissaatiginngilara. Oqartussaasut pineqartut tatigilluinnarpakka, Randi Vestergaard Evaldsen allappoq.
