Kunngi Frederik ataasinngornermit sisamanngornermut Kalaallit Nunaanniippoq, maaniinnerminilu qimussimik nakkutilliisut Siriusikkut qimusseqatigai.
Taama Kunngikkormiut pisortatigoortumik nittartakkakkut quppernerminni Instagramimilu arfininngornermi ullaakkut ilisimatitsipput.
- Kalaallit Nunaat naammatsiffigisinnaanngivippara, Kunngi Frederik allappoq, imalu nangilluni:
- Sapaatip akunnerani uani qimussimik nakkutilliisut Siriusikkut ullualunni qimusseqatigaakka. Mestersvigimut aqqusaarluta minnitsinni nerrivimmi arsaararpallalaarpugut, Hvalrosoddenimillu aallartilluta Aalborg Hus aqqusaarlugu Daneborgi anguarput, tassanngaannillu qimussit siulliit ukiut 75-t matuma siorna aallaqqaarput.
Taamanikkullu qimussimik nakkutilliisut Siriusikkunneersut 500-nit amerlanerusut pikkorissut nunami eqqissimatitami imaannaanngitsorsuarmi alianaaqisumilu nakkutilliinermik ingerlatsisimapput, Kunngi Frederik oqarpoq, taassumalu angalasarsimasut tamaasa ”annertunerpaamik ataqqillugit” oqaatigaa.
- Pinngortitap nukissuinik misigeqqinninnik Siriusikkut periarfissiinerannut qujanaq, taanna nangilluni oqarpoq.
Kunngip avannaaniissimanera aatsaat arfininngornermi ullaap tungaa Kunngikkormiut pisortatigoortumik ullorsiutaannut ilanngunneqarpoq.
