Lars Møller-Sørensen qanittukkut Danmarkimi sivisuumik napparsimareerluni 62-inik ukioqarluni toquvoq. Toqukkut iqmagunnera qallunaat politikki pillugu tusagassiorfiani Altingetimi allaaserineqarpoq.
Lars Møller-Sørensen ukiut 25-t ingerlanerini Kalaallit Nunaanni pisortatut assigiinngitsuni akisussaaffeqarnikuuvoq, suliarisimasanilu amerlasuut eqqaamaneqaatigissallugit.
Kalaallit Nunaannut 1995-imi tikippoq, Mittarfeqarfinni sulisoqarnermut pisortanngorluni kingusinnerusukkullu KNI-mi pisortatut atorfeqarnikuulluni.
Kommuneqarfik Sermersuumi 2014-imi sulilerpoq, 2017-imiillu 2021 tikillugu pisortaalluni.
Aningaasaqarnermut ineqarnermullu politikkimut tunngatillugu akerleriissutaasunik aalajangiisarpoq, tamannalu pissutigalugu atorfimminit soraarnikuulluni. Kingorna siunnersuisartutut namminersortunngorluni.
Lars Møller-Sørensen politikkeriusimasup Lars-Emil Johansenip (S) kommunimi eqqunngitsunik tunngaveqarluni atorfinititsisimasutut siorna unnerluutigineqarpoq. Peqquserlussimasutut Nunatta Eqqartuussisuuneqarfiani pisuunngitsutut aalajangiiffigienqarpoq.
Danmarkimi inuusuttuulluni Lars Møller-Sørensen Venstrep inuusuttaanut siulittaasutut politikkimut suliaqarpoq, kommunimilu Koldingimi politikeriunikuulluni.
Lars Møller-Sørensen panini pingasut qimappai, Koldingillu eqqaani Seestimi arfininngorpat ilineqassasoq, Altinget allappoq.
