Ullumikkut kommunimi sorlermi najugaqarneq apeqqutaalluni, meerarsiaasut ilaqutarsiatik feerialeraangata qimataallutik ilaqutariinnut allanut utaqqiisaasumik inissinneqarallartarnerat allanngortikkusullugu, Pipaluk Olsen Inatsisartunut oqallisissiamik siunnersuuteqarpoq.
- Takorlooruk meeraq angajoqqaarsiaminit qimanneqarluni, angajoqqaarsiaasalu feeriarneranni ilaqutariinnut allanut inissikkallarneqarnermini qanoq misigisimasassanersoq, Inatsisartunut ilaasortaq Pipaluk Olsen (D) Sermitsiamut oqarpoq.
Tamanna allanngortinnniarlugu meerarsiallu meeqqat allat assigalugit feriarnissaminnut, ilaqutariittullu inuunissaminnut periarfissaqarnissaat anguniarlugu Pipaluk Olsen Inatsisartut upernaakkut ataatsimiinneranni oqallisissiamik siunnersuuteqarpoq.
Maanna inatsit atuttoq malillugu meerarsiat ilaqutarsiaat sulinngiffeqarlutik angalaneranni ilaqutariinnut allanut inissinneqarallartarput.
Kommunini pissutsit assigiinngitsut
Kommunimiit kommunimut pissutsit assigiinnginneri oqaluuserisassanngortitsinermut pissutaavoq. Kommunit ilaanni ilaqutarsiaasut meerarsiartik peqatigalugu sulinngiffeqarlutik angalasinnaanerat akuerineqartarpoq, kommunit allat itigartitsisartut.
Meerarsiaasut pisariaqartitaat eqqarsaatigineqarnerusariaqarpoq, kommunimit sorlerminngaanneerneq apeqqutaatinnagu, Pipaluk Olsen isumaqarpoq.
- Meerarsiat nuna tamakkerlugu, kommunimi sumi najugaqarneq apeqqutaanani assigiimmik pineqartariaqarput, uani meeqqat misigissusaat pineqarmata. Meerarsiaasut angajoqqaarsiallu feeriaqatigiissinnaasariaqarput, Pipaluk Olsen oqarpoq.
- Meeqqat pineqartillugit inatsisit misigissuseqanngippallaarsorineqarput, inatsisillu meerarsianut tarrarsorfigineqarsinnaasut pilersinneqartariaqarput, Pipaluk Olsen isumaqarpoq.
- Inatsisitigut inuiaqatigiit aaqqissuussaanerat eqqarsaatigalugu meerarsiat angajoqqaarsiaasartullu illersorniarlugit inatsisiliortoqartariaqarpoq, Pipaluk Olsen oqarpoq.
Angajoqqaarsiaasartunut qujamasunneq
Ilaqutariit meerarsiaqartut ukiumut akiliunneqarlutik sulinngiffeqarlutik angalasalernissaat 14,3 millionit koruuninik naleqassasoq, Naalakkersuisut Pipaluk Olsennimut akissuteqaataanni atuarneqarsinnaavoq.
Pisortani atorfillit ukiut marlukkaarlugit akiliunneqarlutik angalanissaminnut periarfissaqarput.
- Oqaluuserisassanngortitsigaangama sunaluunniit ammatittarpara. Inatsisartut isumaqarpata meerarsiallit ukiut allortarlugit akiliunneqarlutik angalasalernissaannik periarfissiisoqartariaqartoq ajorinavianngilara, Pipaluk Olsen oqarpoq.
Angajoqqaarsiat nunatsinni annertoorujussuarmik kivitseqataasut pisariaqarfiinnaatigut atorneqassanngitsut siunnersuuteqartoq isumaqarpoq.
- Qujamasuutissaqarpugut angajoqqaarsianut, ukioq kaajallallugu meeqqamut angerlarsimaffimmi toqqissisimatitsinermik, meeqqat inuunerannik isumassuinermik, nerisisassaqartitsinermik, perorsaanermik aamma meeqqat misigissusaanik naapitsinermik tunniussisarmata, Pipaluk Olsen oqarpoq.
Inatsisartuni oqallinnissaq
Meerarsiat misigissusaat eqqarsaatigalugit Inatsisartut ataatsimiittarfianni oqallittoqarluassasoq oqaluuserisassanngortitsisup kissaatigaa.
- Neriuppunga meeqqat pineqartillugit Inatsisartuni oqallinneq annertussasoq ikummaarittoqassasorlu. Neriullungalu avataaninngaanniit malinnaasoqarluarumaartoq, Pipaluk Olsen naggasiivoq.
Naalakkersuisunut apeqquteqaat aallaavigalugu Inatsisartunut oqallisissiaq aalajangiiffigisassaanngitsoq immikkoortoq 151, Inatsisartuni maajip 13-iani oqaluuserineqassaaq.
