Washington D.C.-mi tusagassiortut nerersuaqatigiinneraanni aallaasersortutut pasisap præsidenti Donald Trump naalakkersuisuinilu atorfilittat saassuteriarsimagunarpai.
Taama inatsiseqarnermut ministeriugallartoq Todd Blanche sapaammit tusagassiorfimmut NBC Newimut oqartoq, tusagassiorfik Reuters allappoq.
- Naalakkersuisoqarfimmi inunnik sulisunik saassussinissaminik siunertaqarsimasutut isikkoqarpoq, immaqa præsidenti ilanngullugu, Blanche oqarpoq.
Pasineqartoq Los Angelesimit qimuttuitsunik Chicagoliarsimassagunartoq kingornalu Washington D.C-mut ingerlaqqilluni, taanna ilassusiivoq.
Aallaasersorneq piffimmi arfininngornermi unnukkut – danskit nalunaaqutaat malillugu sapaammut unnuaani – Hilton Hotelimi Washingtonimi, ukiumoortumik nerersuaqatigiinnerup ingerlanneqarfiani pivoq.
Pisoq isumannaallisaanermut nakkutilliiviup avataatut taaneqartumi, Washingtonimi Hilton Hotelimi inip nerisarfiup silataani pivoq.
Pinerliiniartup Donald Trumpip naalakkersuisuini atorfilittat aallaanissaannik siunertaqarsimasoq, Amerikamiut tusagassiorfiat CBS News sapaammi siusinnerusukkut allappoq.
Tigusarineqarnermi kingorna taama politiinut oqaluttuarsimasoq, tusagassiorfik tusarfiit aterminnik taasaqanngitsut marluk tunuliaqutaralugit allappoq.
Pinerliiniartup suna siunertarisimaneraa suli politiinit pisortatigoortumik avammut nalunaarutigineqanngilaq.
Trump siullermeerluni præsidentiunerminni tusagassiortut nerersuaqatigiinneranni peqataavoq.
Qanngorpallattoqarpoq, kingornalu præsidenti, nulia vicepræsidenti Trumpillu naalakkersuisuini ilaasortat arlallit qimarngunneqarput.
Washingtonimi Hilton Hotelimi kateriffimmi peqataasunit 2600-nit peqataasut arlallit natermut nallakaapput nerriviillu ataannut toqqorlutik.
Kingorna isumannaallisaasuni Secret Servicemeersoq aallaaneqarsimasoq præsidenti oqarpoq, eqqornaveeqqutiminilli annaanneqarsimavoq. Allanik ajoqusertoqanngilaq.
Pasineqartoq ataasinngornermi naalagaaffiup politiianik saassussisimasutut, aallaammik seqqorsimasutut, naalagaaffiullu politiivanik toqutseriarsimasutut naalagaaffiup eqqartuussiviani unnerluutigineqassasoq, Todd Blanche oqarpoq.
Ukiumoortumik tusagassiortut nerersuaqatigiittarnerat White House Correspondents' Associationimit (WHCA) aaqqissuunneqartarpoq. Taanna tassaavoq tusagassiortut Det Hvide Husimi suliaqartut peqatigiiffiat.
Aaqqissuisut malillugit tusagassiortut Det Hvide Husillu akornanni eqqissisimasumik naapeqatigiinnermik pilersitsinissaq tusagassiortut nerersuaqatigiinneranni siunertaavoq.
/ritzau/
