Kalaallit Nunaanni Teknikimik Ilinniarfiup (KTI) Sisimiuniittup Lyngbymi Teknika suleqatigalugu 2022-mi aggustimi mistalinngorniarfimmik aallartitsivoq (Teknika novembarip aallaqqaataata 2024-p tungaanut Maskinmesterskolen Københavnimik ateqarpoq). Nunaqavissut amerlanerusut ilinniarsimasunngornissat, Kalaallit Nunaannilu suliffeqarfinnut atassuteqarnerup annertusinissaa siunertarineqarpoq.
Ilinniartulli siulliit ikittuinnaapput. Alfred Mølgaard taakku ilagaat, maannalu siullersaalluni allagartartaarpoq.
- Oqaasertaleruminaatsumik nuanneqaaq, 35-nik ukiulik Qeqertarsuarmiu Alfred Mølgaard oqarpoq.
– Kalaallit Nunaannut uternissara sulilernissaralu kissaatigaara. Mistalitut ilinniagaq assigiinngitsorpassuarnik periarfissarpassuaqarpoq. Sunaluunniit periarfissatut isigaara, suliffeqarfiilli tamaasa oqaloqatiginissaannut ammavunga, Alfred Mølgaard illarluni oqarpoq, tamatumalu takutippaa arlaleriarluni neqeroorfigineqareersimasoq.
Suliffissatut periarfissarpassuit
Alfredimut allanullu mistalinngortussanut atorfittaarineqarsinnaasut periarfissarpassuaqarput. Nunamimi imaanilu teknikikkut atortorissaarutit aserfallatsaaliornissaannut ikkussuunnissaannullu sulisunik amigaateqartoqangaarpoq.
Suliffeqarfinni Namminersorlutik Oqartussanit pigineqartuni soorlu Royal Arctic Linemi, Royal Greenlandimi, Tusassimi, Nukissiorfinni, Greenland Airportsimi, kommunini, Namminersorlutik Oqartussani suliffeqarfinnilu namminersortuni soorlu Polar Seafoodimi, Inussummi, Permagreenimi il.il.
Imaani nunamiluunniit
Alfred Mølgaard mistalittut ilinniarnikuunermi saniatigut Sisimiuni Aatsitassarsiornermik Ilinniarfimmi Sanaartornermi Maskiinanik ingerlatitsisutut qaarusummilu sulisutut ilinniarsimasuuvoq.
Aamma rubinisiorfimmi Nuummilu mittarfiliornermi sulinermik misilittagaqarpoq, nunaminullu uterluni piginnaasani nutaat atornissai qilanaaraa.
– Imaaniissinnaavoq. Aamma nunami. Immaqa Nukissiorfinni allaniluunniit. Qasuersaariarlungalu Qeqertarsuarmut februaarip ingerlanerani ilaquttannut tikeraarnissara naatsorsuutigaara, Alfred Mølgaard oqarpoq, taassumalu inuusuttut matematikkimik fysikkimillu soqutiginnittut tamaasa mistalinngorniarnissamut qinnuteqaqqullugit kajumissaarpai.
Soqutiginninneq, piumaffigisinnaaneq piumassuseqarnerlu
– Teknikkimut tunngasunik soqutigisaqartariaqarpoq, aamma ilinniarnermi imminut piumaffiginissaq pisariaqalaarpoq. Taamaakkanilu ilinniagaq naammassineqarsinnaasarpoq. Uanga naammassisinnaaguma allat aamma naammassisinnaavaat, Alfred Mølgaard oqarpoq, Lyngbymili ilinniarfiup Sisimiuniit allaanerulluinnarnera misigaa.
- Ilinniartut amerlanerujussuupput, atuaqatigiillu amerlanerungaarlutik. Kisianni nikallujuittuarniarsarivunga isumalluartuaannarlungalu, Alfred Mølgaard oqarpoq. Taanna ilinniarnermini angajoqqaaminit, angajuminit aappakuminiillu tapersersorneqarpoq.
– Maanna ilinniakkama naammassinera oqiliallaatigeqaara, nuanneqaaq, Alfred Mølgaard oqarpoq.
Allaaserisaq una Teknikamit tapiiffigineqarpoq
