Kalaallit Nunaanni innuttaasut 2024-mi novembarimili passimi kalaallisut qallunaatullu inuiaassutsimik allatsissinnaalerput.
Inatsisinili allannguutigineqartumi inuit kalaallit Danmarkimi najugallit pineqanngillat. Tamanna folketingimi ilaasortap Aaja Chemnitzip allanngortikkusuppaa.
kalaallit 17.000-it sinnerlugit, tassa Kalaallit Nunaanni innuttaasut 25 procentii, Danmarkimiittut IA-mi politikerip Danmarkimi inatsisinik atortitsinermut ministerimut Peter Hummelgaardimut saaffiginnissummini tikkuarpaa.
Paasilluarsinnaagaa
Inatsisinik atortitsinermut ministeri “kalaallit kinaassutsimik misigisimanerat kalaallinut qanoq pingaaruteqartigisoq paasilluarlugu” Aaja Chemnitzimut akissummini allappoq.
- Naalakkersuisut taama kissaateqarpata (kalaallit Danmarkimi najugaqartut pillugit passinut maleruagassat allanngortinnissaat, aaqq.), naalakkersuisut kikkut kalaallisut passimik tunineqarsinnaanerannik apeqqutip misissornissaanut ammapput, Peter Hummelgaard akissummini allappoq.
Suliarli „Naalakkersuisut inatsisinik atortitsinermut ministereqarfik suleqatigalugu suliassanik pingaarnersiuinerminni nalinginnaasumik suliarisartagaannut“ ilaassasoq oqarpoq.
