Saviminilerinermik Ilinniarfik 2030-mi Nuummiit Sisimiunut nuunneqassasoq aalajangiunneqarnikuuvoq, maannalu Naalakkersuisut suliap siuariaateqarneranik nalunaaruteqarput.
Sisimiuni ilinniarfissap nutaap pilersaarusiornissaa isumaqatigiissutigineqartoq, siunnersuisullu kiffartuussinissaat neqeroorutigineqartoq, neqeroorutigineqartullu arlallit tiguneqartut tusagassiutitigut nalunaarummi ilisimatitsissutigineqarpoq.
Naliliineq tamaat tunngavigalugu Inuplan A/S siunnersortitut Pilu A/S suleqatigissagaa toqqarneqarput.
Naalakkersuisoq: Sinaakkutinik nutaaliaasunik pilersitsinissarput qaninnerulissaaq
Ilinniarfimmik nutaamik pilersitsinikkut ilinniartitaanerup ataqatigiissumik kajungernartumillu ineriartortinnissaa siunertaavoq, tassani ilinniartitsisut pitsaasut atuartullu nuannaarlutik atuarsinnaassallutik Naalakkersuisoq Nivi Olsen oqarpoq:
"Pilersaarutip aallartinneqarneratigut ilinniarnermut, suleqatigiinnermut, nutaamillu eqqarsarnermut nukittorsaataasunik sinaakkutinik nutaaliaasunik pilersitsinissarput qaninnerulissaaq,“ Nivi Olsen (D) oqarpoq.
Naalakkersuisut naapertorlugit Inatsisartut Aningaasaqarnermut Akileraartarnermullu Ataatsimiititaliaata januaarimi tamanna siunertaralugu aningaasaliissuteqarnissaq akuersissutigaa.
Sanaartorneq 2027-p naalernerani aallartinneqarnissaa naatsorsuutigineqarpoq
- Isumaqatiginninniareernerup kingorna maanna isumaqatigiissusiortoqareerpoq, taamaalillunilu pilersaarut immikkoortup tullianut ikaarsaarluni, Naalakkersuisut allapput.
Naalakkersuisut sanaartornissamut suliariumannittussarsiuussineq 2027-p qiteqqunnerani naammassineqarumaartoq, tamatuma kingorna sanaartorneq 2027-p naanerani aallartinneqassasoq ilinniarfillu 2030-p naanerani atulersinneqarumaartoq naatsorsuutigaat.
Nuummi ilinniarfiusumi maanna atuuttumi sulisut 30-t missaanniittut arlaleriarlutik nuukkusunnginnertik oqaatigisarpaat.
