Siorna umiarsuarnut takornariartaatinut ilaasut avatangiisinut pitsanngorsaanermullu akitsuummut aningaasarpassuit akiliutaat qanoq agguaanneqassanersut Kommuneqarfik Sermersuumi pisortap tullia Marie Fleischer aningaasaqarnermut ataatsimiititaliamut siunnersuuteqarpoq. Akitsuutit taakku “najukkani nunallu ilaani takornariaqarnerup tapersersornissaanut siuarsarnissaanullu kiisalu tamatuma kingunerisinnaasaanik ajortumik kinguneqaratarsinnaasunik annikillisitsinissamut” atorneqartussaapput.
4,5 millionit koruunit Nuummi, Paamiuni, Ittoqqortoormiini Tasiilamilu agguaanneqassapput. Umiarsuarnili takornariartaatini ilaasut tikiffissanut tikissimasut amerlassusaat naapertorlugit agguaanneqanngitsut politikerinut saqqummiussami aalajangerneqarpoq, tamanna Sermitsiap qulaajaaneranit erserpoq.
Paamiup kommunimi umiarsuarnik takornariartaatinik akitsuummit isertitaanit 36,3 procentimik agguagassarsisumut sanilliullugu taamaallaat 18,9 procentimik aningaasaliiffigineqarnera maluginiarnartuuvoq. NIkingassuseq 780.000 koruuniusoq illoqarfiup takornariaqarnermut suliniutissanut atorsinnaasaralua.
Paamiut umiarsuarnik takornariartaatinik tikeraartunit 2025-mi tikilluarneqarluarpoq, tikeraat tallimariaammik amerleriaateqarlutik siornalu Kalaallit Nunaanni tikinneqartartut pingajuattut inissilluni.
Tasiilamiulli umiarsuarmik takornariartaatinik tikittartut amerlassusiannit amerlanerungaartunik aningaasaliiffigineqaramik aningaasanik agguaassineq nuannaarutigisimassavaat.
Kommunip illoqarfiisa avannarpasinnersaanni Ittoqqortoormiini apummik sisoortoqartillugu isumannaallisaanermut pikkorissarnermut 125.000 koruuniinnaat atorneqarput, naak ukiumut angallatit attartukkat 300.000 koruunit sinnerlugit aningaasartuutigineqartaraluartut.
Nassuiarneqanngitsoq
Sooq aningaasat agguataarneqarnerat pulaarnerit qanoq amerlatiginerat naapertorlugit aalajangerneqarsimanngitsoq allaaserisami nassuiarneqanngilaq.
Aningaasaqarnermut ataatsimiititaliap marsip aqqaneq-aappaanni ataatsimiinnerani saqqummiussami pisortap tullia ima allappoq:
- Inuussutissarsiornermut immikkoortortamit tamakkiisumik allattorsimaffik suliarineqarpoq, aningaasat sumut atorneqarsinnaanerinik siunnersuutitalimmik taakkulu ataatsimiititamit isummerfigeqquneqarput pingaarnersioqquneqarlutillu. Tamatuma saniatigut aningaasat sumut atorneqarnissaat pillugu ataatsimiititamit nammineq siunnersuutigineqartut akuersissutigineqarsinnaapput.
Suliniutit allattorsimaffiat
Suliniutit allattorsimaffiat ima isikkoqarpoq:
NUUK
Qernertunnguit Kangerluat-ni perusuersartarfik kikkut tamarmik atorsinnaasaat:
Qernertunnguit Kangerluat perusuersartarfimmik pisariaqartitsineq annertuvoq. Perusuersartarfik containeriunani aaliangersimasumik toqqaveqassaaq. Suliniut siusinnerusukkut ataatsimiititaliami suliarineqarnikuuvoq, uggornaraluartumilli suli piviusunngortinneqarsimanani. Siullermik suliarineqarnerani aningaasaliissutaagaluarsimasut allamut atorneqarsimagamik.
Aningaasartuutissat.2.000.000 kr. missaat
Kapisillit kangerluata qinnguani puttasuliinissaq:
Angallateeqqat talittarfissaat puttasoq pisiarineqareersimalerpoq, taannalu Kapisillit kangerluata qinnguani, Kangerlupiluup kitaatungaani, illuaqqamiit qaninnerpaamik 200 – 300 m. ungasitsigisumut ikkunneqarnissaat pilersaarutaavoq. Sumiiffiup Kangersunerup tungaanut aqqutaanut naleqquppoq. Qanittukkut Kangersunermut isikkivilimmik oqquiffiliorniussamut nunaminertamik pissarsisoqarpoq.
Aningaasartuutissat 200.000 kr. missaat
Hans Egedep eqqaassutissiaanut majuartarfiliinissaq:
Umiarsuit takornariartaatit tikerarfiisa nalaani Hans Egedep eqqaassutissiaa alakkarneqartuartarpoq. Alakkaasullu tamatigut Annaassisitta Oqaluffia saneqqullugu majuartarput, taamaanneralu ilaatigut naalagiartunut akornusersuutaallunilu puffassimaartitsisinnaasarput. Aqqusineq Avannarliit aallaavigalugit majuartarfiliisoqarpat tamanna iluaqutaatissaa naatsorsuutaavoq. Aningaasartuutissat 200.000 kr. missaat Containerit marluk perusuersartarfiit ikkussornissaat: Containerit marluk perusuersartarfiit pissarsiarineqareerput, taakkualu illoqarfiup qeqqanut (ataatsimiititaliap siusinnerusukkut siunnersuutiginikuusaanut) ikkussorneqassapput. Aningaasartuutissat 150.000 kr. missaat Nasinnermi qinngutit - atortulersuutit Nuummi nasittarfiup eqqaani immikkoortumut ”pequtit” annikinnerusut, tassani nasinnermi qinngutinik ikkussisoqassaaq. Tassunga atatillugu issiavinnik, ikkussugassanik, eqqaavinnik allanillu pisisoqassaaq.
Aningaasartuutissat 25.000 kr missaat.
QEQERTARSUATSIAAT
Isikkivimmut qinngutitalimmut majuartarfiliinissaq kiisalu qinngutip ikkunnissaanut.
Aningaasartuutissat 50.000 kr. missaat
PAAMIUT
Paamiunut perusuersartarfimmik ataatsimik pissarsinissaq:
Umiarsuit takornariartaatit Paamiunut tikittartut amerliartuinnarput. 2025-mi takornariat 30.000 missaanni amerlassusillit aqqusaarsimapput, tassanilu erseqqarissumik takutinneqarpoq perusuersartarfiit amigaataasut. Inuppassuit suliffeqarfiit perusuersartarfiini perusuersarusuttut suliffeqarfinnut inuinnarnullu qinngarnartarsimapput. Aningaasat perusuersartarfiup pisiarineranut, Nuummiit Paamiuliaanneranut kiisalu ikkussornissaanut atorneqassapput.
Aningaasartuutissat 475.000 kr. missaat
Puttasut Paamiuni Ivittuunilu ikkussuunnissaat Paamiuni puttasuleeqqinnissaq pisariaqalersimavoq. Takornariat amerlisut kiisalu Paamiuni takornarialerisut angallataatillit 5-mat aallartissimapput. Ivittuunilu taamatulli takornariartaatit amerlisimapput, taamaammat aamma Ivittuuni puttasuliisoqarnissaa kissaatigineqarpoq. Puttasut pisiarineqareerput kisiannili suli ikkussuunneqaratik.
Aningaasartuutissat. 375.000 kr kr. missaat
ITTOQQORTOORMIIT
Aput sisoortarneranut tunngatillugu pikkorissaaneq.
Ukiuunerani Ittoqqortoormiini aput sisoortarneranut tunngatillugu pikkorissaaneq. Pikkorissaanissap Ittoqqortoormiini pisariaqartinneqarnera annertusiartorpoq. Sila allanngoriartornerata kinguneranik aputip sisoortarneri amerliartorput. Takornariaqarnermullu inatsisip nutaap piumasarivaa isumannaallisaanerup pitsanngorsarnissaa, tamannalu takornarialerisunut piumasaqaatitut pinngorsimavoq taamaalillutik takornariat isumannaannerusumik isumagineqartassammata. Pikkorissarnerup kingunerissavaa pinngitsuuisinnaaneq, ulorianarsinnaasunik paasinninnerulerneq sumiiffimmilu upalungaarsimaneq pitsaanerusoq.
Aningaasartuutissat 125.000 kr. missaat
TASIILAQ/KULUSUK
Tasiilami takornarianik inuussutissarsiutigalugu angallassinermi 12 pax-imik pikkorissaaneq. Siornatigut 12 pax-imik Tasiilarmiut pikkorissarsimasut aallakaasimanerisa kingorna ilinniarsimasunik pisariaqartitsineq pinngoqqissimavoq, imatut paasillugu, Tasiilami pikkorissarsimanermut uppernarsaatillit takornarianik sullissisinnaasut amigaataalersimammata, pikkorissartoqarnissaa ujartorneqalersimalluni.
Aningaasartuutissat 650.000 kr. missaat
Kulusummi takornarianut/mittarfiup puttasuini oqquiffissamik pisariaqartitsisoqarpoq, utaqqinermi sialleraangat inuit nassataallu oqquisinnaaniassammata, pingaartumik aasaanerani Kulusuup Tasiilallu akornanni tikeraat umiatsiartartut amerligaluttuinnarmata.
Aningaasartuutissat 75.000 DKK missaat.
Suliap ingerlarnga
Suliniutit sorliit, ilaatigut nammineq suliniutigisinnaasaminik aalajangiisinnaanissaq ilanngullugu, pingaarnersiuunneqartassanersut ataatsimiititaliamit aalajangerneqartariaqartoq Marie Fleischer siunnersuuteqarluni allappoq. Taamaaliortoqareerpat pingaarnersiukkat kommunalbestyrelsemut paasissutissiissutitut nassiunneqassapput.
