NAMMCO-p Tunumi qilalukkat qernertat qaqortallu piniagaajunnaarnissaannik innersuuteqarpoq, qilalukkat amerlassusaat amerliartornissaat kinguaariillu tulliuttut pisassaqarsinnaanissaat siunertaralugu.
NAMMCO Nuummi marsip 24-aniit 26-anut ataatsimiinnerata kingorna taama nalunaaruteqartoqarpoq.
Tunumiunut atuagaq nuanninngilaq, piniarnermi kulturikkut aningaasarsiornikkullu pingaaruteqarluinnarpoq.
Pinngortitaleriffiup Tunumi qilalukkanik qernertanik pisassiissutinik siunnersuisarnera NAMMCO-p siunnersuutaanit aallaaveqartarpoq, taamaammallu pisassiisoqannginnissaa innersuussutigineqarluni.
Qilalukkanik qernertanik qaqortannillu pisassiissutit Naalakkersuisut aalajangertarpaat, ukiunilu kingullerni neqissaqarniarneq eqqarsaatigalugu pisassiisoqartapoq.
Tunumi qilalukkat qernertat 41-t 2026-mi pisassiissutigineqarput, aamma qilalukkat qaqortat pisassiissutit sinneruttut arfineq-marluusut 2027-p tungaanut atuupput.
Niisarnaqarluartoq
Qilalukkanik qernertanik qaqortanillu Tunumi kisitsisoqarneranut sanilliullugu niisarnanik kisitsinermi kisitsisit nutaat North Altantic Sghting Survey (NASS) 2024 allarluinnaapput. Niisarnaat altantikup avannaani 320.000-iusut kisitsisit takutippaat.
Kalaallit Nunaanni Savalimmiunilu niisarnarniarneq piujuartitsineq aallaavigalugu ingerlanneqartoq ilisimatuussutsikkut naliliivigineqarnikuuvoq. Ukiumut 1.570-it tungaannut pisarineqartarnerat nungusaataanngitsumik ingerlanneqartoq naatsorsuutigineqarpoq, nalilerneqarpoq.
Silap pissusiata allanngoriartornerata ukiuni makkunani uumassusilinnut qanoq allannguisitsinersoq Nuummi ataatsimiinnermi sammineqarpoq. Piniarneq kisiartaalluni tatineqanngitsoq erseqqissarneqarpoq; Siunnersuisoqatigiit inuit Tunumi iliuuseqarnerulersimanerat ernummatigaat, ilaatigut mingutsitsineq, umiarsuarnik takornariartitsineq, sakkutooqarneq umiarsuillu angallannerujartuinnarnerat.
Nakkutiginninneq
Ullumikkut aqutsinermut nutaaliaasumut atatillugu MINTAG-projektimi — nunat NAMMCO-mut ilaasortaasut Japanillu suleqatigiinneranni — qaammataasat mikinerusut, ilaatigut tikaagulliusaanut, tikaagulliusaarnanut tikaagullinnullu atorneqartartut, maanna ineriartortinneqarput.
Tikaagulliusaat niisarnallu Norgep sineriaaniit Tuluit Nunaannut Irlandimullu nutaamik ingerlaarfeqalersimasut 2025-mi paasisat takutippaat. Taamaalillutik ilisimatusartut arferit ingerlaarnerisa qanoq inissisimaffii pillugit paasisaqarnerujussuupput.
Atlantikup avannaani immami miluumasut pillugit ataatsimiititaliarsuaq
NAMMCO (North Atlantic Marine Mammal Commission) 1992-imiilli Kalaallit Nunaata, Savalimmiut, Islandip Norgellu akornanni miluumasut imarmiut pillugit suleqatigiinnermut qitiusumik suliniaqatigiiffittut atuuffeqarpoq.
Kattuffiup immami uumasut ilisimatuussutsikkut tunngavilersorluakkatut piujuartitsisumillu aqunneqarnissaat sulissutigaa, taamaalillunilu Naalagaaffiit Peqatigiit imarpik pillugu nunarsuaq tamakkerlugu anguniagaanut kaannersuarnillu atuukkunnaarsitsinissamut toqqaannartumik tapersersuilluni.
