Nathanielsen Siumup isornartorsiuineranut akisoq

Naalakkersuisuni ilaasortat pineqartut marluk, Anna Wangenheim (D) aamma Naaja H. Nathanielsen (IA), folketingimut qineqqusaarnertik pillugu naalakkersuisoqataasunit Siumumit isornartorsiorneqarput.

Naaja H. Nathanielsen Facebookimi ikkussami ima akissuteqarpoq:

- Anna uangalu Naalakkersuisuni pinngitsoorneqarsinnaanngitsut Siumut isumaqarunarmat soorunami tulluusimaarpunga. Ajunngitsumik ingerlasugut uangattaaq isumaqarpunga, politikeri allappoq.

Qinigassanngortinneq tamat naalakkersueqataasinnaanerisigut pisinnaatitaaffiusoq taanna ilanngulluni allappoq:

Tamatuma saniatigut tamat naalakkersueqataasinnaanerat naapertorlugu qinigassanngortissinnaallutalu ullut 14-it tulliuttut qineqqusaarnissatsinni malittarisassanik unioqqutitsinavianngilagut.

Taasuma Naalakkersuisuni atorfini attatiitigalugu qineqqusaarsinnaalluni isumaqarpoq. Taannattaaq naalakkersuisoqatigiit siammasissut nunatsinnut nukittoqqutaasut Siumullu naalakkersuisoqataaginnassasoq aamma isumaqarpoq:

- Vivian (nunanut allanut tunngasunut naalakkersuisoq, aaqq.) ingerlalluartoq, suleqatigiinnerlu ingerlalluartoq isumaqarpunga.

Inuit Ataqatigiinni siulittaasuusimasoq Naalakkersuisunilu siulittaasuusimasoq Kuupik V. Kleist Folketingimut qinigassanngorpoq. Taanna 2015-imi politikkimik suliaqarunnaaraluarpoq.

- Usa-p nunatsinnik tatisimanninnera annertuvoq. Uanga isumaqarpunga, nunarput tuniniagaanngittoq, tunineqarsinnaanngitsoq, inunnilli aqunneqassasoq, qinigassanngortinnermini tunngavilersuilluni oqarpoq.

Kuupik V. Kleist namminersornerulernissamut inatsisip ineriartortinnerani suleqataangaatsiarsimavoq aammalu namminersornerulernissamut inatsisip 2009-mi atuutilernerani Naalakkersuisuutitaqartuni siuttuusimalluni.

Taassuma eqqaasitsissutigaa præsidentip isumaa amerikamiut tamarmik isumarinngikkaat.

- Inuiaqatigiittut pisariaqartitarput massakkut tassaavoq illersoqatigiinnissaq, ataatsimoornissaq aammalu suleqateqarnissaq. Folketingimi partiit tamaaviisa suleqatiginissaat piareersimaffigaara, isornartut, aammalu inuiaqatigiinnut kalaallinut angusassat pitsaanerpaat anguneqarsinnaanerat, aatsaat folketingimi suleqateqarnikkut anguneqarsinnaavoq, oqarpoq.

Folketingimut qinigassanngortittup Ane Lone Baggerip (S) nunat allat Kalaallit Nunaannut assingusut isumassarsiorfigisiniarpai. Peqqinnissaqarfinnut pitsanngorsaataasinnaasoq taanna isumaqarpoq:

- Siumut Folketingimi sulissutiginiarpaa nunani innuttaqassusaat ikitsuni aammalu siammarsimasuni inoqarfiusuni nunanit tamalaanit periutsit misissuiffigineqarnissaat, taakkulu Kalaallit Nunaanni peqqissutsimik misissuisarnernik katsorsaanermillu periarfissanik pitsaanerulersitsisinnaanersut. Anguniarneqarpoq nappaatit siusissukkut paasineqarnissaat – pingaartumik inuunerlunnermit patsiseqartartut aammalu kræfti – innuttaasut ukiuinut immikkoortiterlugit peqqissutsimik misissuisarnerit atuutilersinnerisigut.

Innuttaasut sumi najugaqarnerat apeqqutaanani peqqinnissaqarfimmiit sullinneqarsinnaasariaqartut Siumup tusagassiuutitigut naqissuserpaa.

- Kalaallit Nunaanni innuttaasut siammarsimallutik najugaqarput, tamannalu peqqinnissaqarfimmut atortulersorluakkamut immikkut ilisimasalinnillu sullissiffiusumut periarfissaqarnermut immikkut unammillernartorsiortitsivoq. Taamaattumik Siumut suliniutini nukittorsarniarpai, innuttaasut kunngeqarfiup iluani tamarmik pitsaanerusunik naligiinnerusunilu peqqissutsikkut sullissivigineqarnissaat qulakkeerniarlugu.

Ane Lone Bagger aamma Siumut ilungersunartumik napparsimasunut pitsaanerusumik tapersersuinissaq sulissutiginiarpaat. Tamanna Københavnimi Kalaallit Napparsimasut Illuannik amerlanerusunik kalaaliminertortitsinerunikkullu ilaatigut anguneqassasoq partiip nalunaarutigaa.

Siumut sinnerlugu Inatsisartunut ilaasortap naalakkersuisut marluk Folketingimut qinigassanngortinnerisa kingorna Naalakkersuisut suliassaminnut tunniusimanerat apeqquserpaa.

Peqqissutsimut inunnullu innarluuteqartunut naalakkersuisoq Anna Wangenheim (D) aamma ilaatigut inatsisinik atuutsitsinermut aamma aatsitassanut naalakkersuisoq Naaja H. Nathanielsen (IA) Folketingimut qinigassanngortipput.

- Naatsorsuutiginngisannik pakatsissutigisannik pisoqarnera nalilersuisariaqarnissannik killippoq, Lars Poulsen Facebookimi quppernermini ilaatigut allappoq.

- Isumalluarnera siunnerfeqaqatigiinnerpullu nakeriallaatigeqaakka, Naalakkersuisutta ilai massa folketingimut qinigaagunik tunuarnialereersut, ukioq ataaseq Naalakkersuisutut atuuffeqareerlutik - tamat oqartussaanerata aqqani pisinnaatitaaffiummat, Lars Poulsen allappoq.

Lars Poulsenip tunuliaqutsiinermut apeqqut pillugu parteeqatini tusarniassallugit aamma allaatigaa.

Naalakkersuisoqatigiit ukiumi ataatsimi siullermi marlunnik ikinnerulersimapput, tassa Maasi Pedersen meeqqat, inuusuttut ilaqutariinnullu naalakkersuisutut aamma Bentiaraq Ottosen sulisoqarnermut aamma avatangiisinut naalakkersuisutut tunuarmata.

Siumut naalakkersuisoqatigiinnut ilaavoq, naalakkersuisuutitaqarlunilu.

Naaja H. Nathanielsen Folketingimut qinigassanngortilluni ataasinngornermi unnukkut nalunaaruteqarpoq.

- Sassarumallunga maanna aalajangerpunga. Qinigaassagaluaruma Naalakkersuisuni qanoq tunuarnissara aamma suliat ingerlareersut tamaangaannannginnissaat pillugu, siulittaasora Múte B. Egede pilersaarusioqatigisimavara. Qinigaassanngikkaluaruma aamma qularutigineqassanngilaq pisarnittut tunniusimallunga Naalakkersuisutut suliakka nangikkumaarparikka, Naaja H. Nathanielsen allappoq.

Ilanngullugu ilisimatitsissutigaa Folketingimut qinigaassagaluaruni Inatsisartunit sulinngiffeqarumassalluni, marluinnik atuuffeqarnissaq anguniannginnamiuk.

IA-mit qinigassanngortittut allat sisamat saqqummiunneqareerput. Tassa Pipaluk Lynge, Nivi Rosing, Kalistat Lund aamma Aqqalukkuluk Fontain.

Atassut tallimanngornermi 13. marts nal. 15.00 tusagassiortunik aggersaavoq.

Tusagassiortunik katersortitsinermi Folketingimut qinigassanngortittut ilisaritinneqassapput anguniakkallu saqqummiunneqarlutik.

Atassut sinnerlugu sassartut tassaapput Bentiaraq Ottosen, Orla Joelsen aamma Malu Ostermann.

Qinersinermut 24. marts pisussamut partii allanik qinigassanngortitaqaqqissanersoq ilisimaneqanngilaq.

Anna Wangenheim Folketingimut qinigassanngortinnerminut tunngatillugu isornartorsiorneqarnini maanna akissuteqarfigaa. Tamat attaveqatigiittarfiini Facebookimi akissuteqarluni allappoq peqqissutsimut inunnik innarluuteqartunullu naalakkersuisoqarfimmi suliani ingerlatiinnarlugit:

- Suliakka ingerlappakka - allanngortoqanngilaq; assinganik tunniusimallunga pisussaaffikka suliaraakka; Naalakkersuisoqatigiit anguniagaannut naapertuuttumik, Anna Wangenheim allappoq.

Folketingimut qinigassanngortinnera pillugu Atassummi siulittaasumit Aqqalu C. Jerimiassenimit isornartorsiorneqarpoq, tassami Naalakkersuisoqatigiinni akisussaaffimmik annertuumik tigummisaqarluni suliaqartussaatigaluni qinigassanngortimmat:

- Saniatigut atorfeqanngilanga, qineqqusaarneq atorfiunngilaq aningaasarsiorfiunanilu; taanna tamanut pisinnaatitaaffiuvoq, taamaattumillu tamat oqartussaaneranik pisinnaatitaaffitsigullu illersorneqartoq, soorluttaaq qinikkat maanna qinikkatut atuuffeqaraluarlutik sassartut, Anna Wangenheim akissuteqarluni allappoq.

Taanna ilisimatitsereerpoq Folketingimut qinigaassagaluaruni Naalakkersuisutut atuuffimminit tunuassalluni.

Juno Berthelsen, Naleraq sinnerlugu Inatsisartunut ilaasortaq, Folketingimut sassarpoq. Naleraq Facebookimi quppernermini paasissutissiivoq. Taamaalilluni Naleqqap Folketingimut qinigassanngortitaata sisamaat saqqummiunneqarpoq.

- Maannakkorpiaq Danmarki Nunatsinnik piginnikkusunnerat annertusiartuaarpoq partiillu ilaasa Naalagaaffinngornissarput namminiussuseqarnerpullu peerniaraat iliuuseqanngitsoorfigisinnaannginnakku, Juno Berthelsen qineqqusaarnissaminut sassarnermini taama tunngavilersuivoq.

Inuiaqatigiilerinermi ilinniagaqarpoq nunanullu allanut tunngasunut naalakkersuisoqarfimmi immikkoortortami pisortatut ukiorpassuarni misilittagaqarluni.

- Folketingimut qinigassanngortippunga Nunatsinni Danmarkimilu kulturerput, kinaassuserput naleqartitagullu nukittorsarlugillu attatiinnarniarlugit sulissallunga.

Naleraq tunuliaqutaralugu Folketingimut qinigassanngortittoq Oliver Bech tusagassiutitigut nalunaarummi taama allappoq.

Naleqqakkormiut Folketingimut qinigassanngortitsinerminni qinigassanngortitttuni kingulleq inuusunnerpaarlu arfininngornermi saqqummiuppaat.

- Taanna inuusukkaluarluni politikkikkut sulinermi ilisimaneqarlualernikuuvoq, soorlu ilaatigut siornatigut Siumumi ilaasortaanikuuvoq, Nuummi partiip immikkoortortaqarfiani siulittaasup tullerinikuuaa, Naleraq allappoq.

Oliver Bechip Siumumi ilaasortaajunnaarnissani qanittukkunni saqqummiuppaa.

Partiip kalaallit naleqartitaat pillugit suliniuteqarnera pillugu Naleqqami ilaasortanngorniarluni aalajangersimavoq.

Naleqqakkormiut qinigassanngortitatik ullumikkut nal. 13:30 tusagassiortunik katersortitsinikkut saqqummiutissavaat.

- Naalakkersuisuuneq akisussaaffiuvoq paarisassaq.

Atassummi siulittaasup Aqqalu C. Jerimiassenip Demokraatit Folketingimut qinigassanngortitaminnik saqqummeereernerisa kingorna tamat attaveqatigiittarfiini allatani taama aallarnerpaa.

Qinigassanngortittut ilagaat Anna Wangenheim, maanna peqqissutsimut inuillu innarluuteqartut pillugit naalakkersuisuusoq.

Aqqalu C. Jerimiassenip isornartorsiuinermini tunngavilersuutigaa Atassut naalakkersuisoqatigiinnut ilanngussimammat peqqinnissaqarfiup sulissutigineqarnissaa pingaarnerpaatut inissisimatillugu, qanorluunniit inissittoqaraluarpat.

Tamannalu pissutigalugu naalakkersuisoqatigiit siuttuinut ersarissumik oqariartuuteqarpoq:

- Naalakkersuisumut maanna folketingimut sassartumut iliuusaanut tapersiinngilagut, allappoq.

Anna Wangenheim Sermitsiamut ilisimatitsereerpoq Folketingimut qinigaassagaluaruni naalakkersuisutut tunuassalluni. Folketingimut 24. marts qinersisoqassaaq.

Anna Wangenheim (D), peqqissutsimut inunnullu innarluutilinnut naalakkersuisoq, Folketingimut qinigaassaguni naalakkersuisuunerminit tunuarniarpoq.

Taanna taama Sermitsiamut oqarpoq:

- Naalakkersuisuuneq ulloq tamaat suliffiuvoq, qinigaassagumalu soorunami naalakkersuisuujunnaassaanga.

Peqqinnissaqarfik ajornartorsiornartuuvoq, sulisunimmi amigaateqartoqarpoq, piffissamilu sivikitsumi atorfillit amerlallutik. Wangenheimili naapertorlugu toqqissisimalluni atuuffik qimassavaa:

- Toqqissisimallunga qimassavara, ukiummi kingulliup ingerlanerani peqqinnissaqarfiup aningaasaqarnerata sussaanngitsumik inissisimajunnaarnera qulakkeerpara.

- Naalakkersuisooqatigiinnimi danskillu naalagaaffiat suleqatigalugu tamanna iliuuseqarfigisimavarput, taamaammallu toqqissisimanaraara.

Folketingimut iserluni ilaatigut danskit naalakkersuisuinik peqqinnissaqarnermut immikkoortumi isumaqatigiissutaasimasunik nangitsinissap sorsuutiginissaa pingaartoq, taanna oqarpoq. Danskit naalakkersuisuisa ukiumut 200 mio. kr-t ilapittuutigisassallugit neriorsuutigaat.

- Atugarissaarnitsinni annertuut maanna ingerlanneqarput, Anna Wangenheim oqarpoq.

Taassuma ilanngullugu marlunnik qinigaaffeqarusunnginnini, Inatsisartunilu inissani aamma qimassallugu erseqqissaatigaa.

- Marlunnik qinigaaffeqassanngilanga. Qinigaaffinnik tamakkiisumik aallussissaanga.

Anna Wangenheim 2022-mi folketingimut qinersinermi qinigaanerpaat pingajoraat.

Inatsisileritooq Karina Zeeb, 38-nik ukiulik, Naleraq tunuliaqutaralugu Folketingimut qinigassanngortilluni sassarpoq. Taassuma sulissutigiumavaa kalaallit pitsaasumik malunnaatilimmillu politikkikkut sullinneqarnissaat.

- Nunarput pillugu avaqqulluta aalajangiisoqartannginnissaa qulakkeerneqartariaqarpoq, tamanna akisussaaffik tigussallugu piareersimavunga. Qinigaaffimmi naammassisumi Naleqqap naammassisai annertuut ingerlatinneqaqqinnissaat, suliallu uninngasut naammassinissaat tikillugu suliniarlunga aalajangiusimavunga, Karina Zeeb tusagassiorfinnut nalunaaruteqarluni oqarpoq.

Karina Zeeb oqaluttuarpoq inatsisilerituutut misilittakkani atorlugit inuit pisinnaatitaaffiisa malinneqarnissaat qulakkeerniassallugu.

Naleqqap Folketingimut sassartitani tamaasa ataasinngornermi nal. 13.30 tusagassiortunik katersortitsinermi saqqummiutissavai.

Demokraatit folketingimut qinersinissamut qinigassanngortitatik qineqqusaarutitillu saqqummiuppaat.

Demokraatit siulittaasuat Jens-Frederik Nielsen ullumi nal. 16.00 partiip allaffiani tusagassiortunik katersortitsissaaq, tassanilu qinigassanngortittut qineqqusaarutillu saqqummiutissavai.

Partii Facebookimi allappoq.

Demokraatit Inatsisartunut kommunalbestyrelsinullu 2025-mi qinersinermi angusarissaarput, taamaattumik partii Folketingimi ilaasortaqalissanersoq pissanganarpoq, minnerunngitsumillu kikkut qinigassanngortissanersut.

Folketingimut 2022-mi qinersinermi partiip Anna Wangenheim aamma Justus Hansen qinigassanngortippai. Wangeneim qinerneqarluarluni 3.482-init taaneqarpoq.

Anna Wangenheimili peqqissutsimut inunnullu innarluutilinnullu naalakkersuisutut atorfinitsinneqarnera pissutigalugu qinerneqarsinnaanissaa qularnarpoq.

Najannguaq Hegelund Naleraq sinnerlugu Folketingimut qinigassanngortippoq. Naleraq tusagassiorfinnut taama nalunaaruteqarpoq.

Najannguaq Hegelund, 37-nik ukiulik, Naleraq sinnerlugu kalaallit Danmarkimiittut pisinnaatitaaffii pillugit suliaqarniarpoq.

Najannguaq Hegelund peqatigiiffilerinerup iluani ukiuni arfineq-pingasuni kingullerni maluginiartarsimavaa kalaallit danskini paatsoorneqakulasut. Folketingimi sulinermi, partiit allat suleqatigalugit, kalaallit meerartaasa eqqunngitsoq tunngavigalugu arsaarinnissutigineqartarnerisa pinngitsoortinneqarnissaat sulissutiginiarpaa:

- Misilittakkamma takutippaat kalaallit pilluta angusaqassagaangatta, piumasaqarsinnaaneq, tunniutiinnajuissinnaaneq, pingaarnertullu qallunaanut maniguutiinnarnani kalaallinik salliussisinnaaneq pingaartinneqartariaqartoq, Najannguaq Hegelund oqarpoq.

- Takusarsimavara kalaalerpassuit namminneq kisimiittutut inissinneqartartut. Inatsisitigut illersorneqarnissaq tamanut atuuppoq – aamma kalaallinut ilaqutariinnut, oqarpoq.

Naleraq ilisimatitsivoq ataasinngornermi nal. 13.30 tusagassiortunik katersortitsinermi Folketingimut qineqqusaartitassatik tamaasa saqqummiukkumaaritik.

Orla Joelsen USA-p Kalaallit Nunaannik tiguaaniarneranut akerliusutut ilisimaneqarpoq.

Maanna Folketingimut qinigassanngortippoq.

Orla Joelsen Atassut tunuliaqutaralugu folketingimut qinigassanngortinniarluni aalajangersimalluni Facebookimi allappoq.

Orla Joelsenip Præsident Trumpip Kalaallit Nunaannik tiguaanissamik kiissaateqarneranut akerliulluni inuit nittartakkatigut naapeqatigiittarfianni X-imi allaaserisaqakulasarpoq.

Orla Joelsen piffissap ingerlanerani X-imi 86.000-inik malinnaasoqalersimavoq.

Orla Joelsen Nuummi 2025-mi marsip 15-ianni USA pillugu akerliussutsimik takutitsinersuarmik aaqqissuisuuvoq.

Siumut tusagassiortunik sisamanngornermi nalunaaqutaq 13.30 katersortitsissaaq.

Tusagassiortunik katersortitsinermi Siumup folketingimut qineqqusaarutini aamma Siumut sinnerlugu qinigassanngortittut saqqummiunneqassapput.

Partiip qinigassanngortittut arlallit saqqummiuteqareerpai, tassa Ane Lone Bagger, Najaaraq Møller, Ineqi Kielsen, Aka Hansen, Doris J. Jensen aamma Erika Nielsen Baadh.

Inuit Ataqatigiit qineqqusaarutitik Folketingimullu qinigassanngortitatik tallimanngornermi ualikkut saqqummiunniarpaat.

Partii tusagassiutitigut nalunaarummi taama ilisimatitsivoq.

Tallimanngorpat Hotel Nordbomi Nuummiittumi nal. 14 saqqummiisoqassaaq.

Aaja Chemnitz partii sinnerlugu 2015-imili Folketingimut qinigaasarpoq, qineqqusaaqqissananili aalajangersimavoq.

Kina Aaja Chemnitzimut, folketingimut qinersinermi kingullermi 4.296-init, tassa qinersisimasut 22 procentiinit qinerneqarsimasumut, kingoraartaassanersoq tallimanngorpat paasinarsissaaq.

Marsip 24-ani Folketingimut qinersisoqassaaq, IA-llu saniatigut Naleraq Demokraatillu qineqqusaartussanik suli saqqummiussinngillat.

Doris J. Jensenip Folketingimut qinigassanngortinnini Sermitsiamut uppernarsarpaa.

- Aap, sassarniarlunga sapaatip-akunnera kingulleq aalajangerpunga, Doris J. Jensen taama oqarpoq.

Taanna politikkip iluani misilittagaqarluarpoq. 2011-miit 2015-imut Folketingimut ilaasortaareernikuuvoq, Naalakkersuisunut Inatsisartunullu ilaasortaasimalluni. Inatsisartunut kingullermik qinersisoqarmat qinigaanngitsoorpoq. Kim Kielsenilu Kommuneqarfik Sermersuumi kommunalbestyrelsemi sulinngiffeqarmat, sinniisutut kommunalbestyrelsemi ilaasortaalluni.

Doris J. Jensen Nuummi Atuarfik Hans Lyngemi atuartunut angajullernut siornali ilinniartitsisuusoq, Folketingimullu ilaasortanngussagaluaruni tunniussassaqarluni qularinngilaa.

- Isumaqarpunga nunatsinni aatsaat taama pingaaruteqartigisumik inissisimatilluta ilisimasalinnik misilittagalinnillu qinigassanngortittoqarnissaa.

- Nuannaarutigivara nutaarpassuit takkummata, kisianni aamma Siumumi ileqqorivarput sapinngisamik nutaat aammalu misilittagallit sassartittarlugit.

- Salliullugu una pivara, nunatsinni illersorneqarnissarput aatsaat taama pingaaruteqartigivoq, nunarsuarmi eqqissiviilliornerit taama annertutigitillugit.

Siumumit Folketingimut qinigassanngortittut maannamut arfinilinngorput.

Aaja Chmenitzip Folketingimi sulisimanera qujassutiginiarlugu Inuit Ataqatigiit sisamanngorpat kaffillerutigissavaat.

Aaja Chemnitz IA sinnerlugu Folketingimi 2015-imi ilaasortanngorpoq:

- Pissutissaqarluarluta Aaja inuiaqatigiinnut sullissisimaneranut qujaniarluta Hotel Nordbomi kaffillerfigissavarput, Inuit Ataqatigiit Facebookimi quppernermini allapput.

Kaffillerner Hotel Nordbomi sisamanngornermi marsip tallimaani nalunaaqutaq 15.00–18.00 pissaaq.

Siumut tunuliaqutaralugu folketingimut qinigassanngortittoq Aka Hansen Danmarkimi kalaallit angajoqqaat inatsisitigut isumannaatsuunerulernissaat sulissutiginiarlugu tusagassiuutitigut nalunaarutigaa.

- Kalaallit angajoqqaat aaqqissuussaanermi oqaatsimik kulturikkullu paasisimasaqanngitsumi nalilersorneqarlutillu aalajangiiffigineqartarnermik misigisarpaat, Aka Hansen allappoq, nangillunilu:

- Aaqqissuussaaneq ataasiarluni arlaleriarlunilu aalajangiisarnermini pineqartunut paasisimasaqanngitsutut naapertuilluanngitsutullu misigineqartunik pilersitsigaangat, taava ilaqutariit kukkunngillat. Aaqqissuussaaneq ajorpoq.

Danmarkimi kalaallit angajoqqaat meeqqaminnik arsaarneqartarnerat pillugu suliat arlallit ukiuni kingullerni oqallisaasorujussuupput akerliussutsimillu takutitsiffigineqartarlutik.

Aka Hansen inatsisitigut isumannaatsuuneq tunngaviusumik pisinnaatitaaffiusoq allappoq, aamma Danmarkimi kalaallit angajoqqaat “innuttaasunut allanut tamanut assingusumik ataqqinninnermik, suliamut ilisimasatigut piginnaasaqarnermik inatsisitigullu illersorneqarnermik naapinneqartariaqarput”.

Najaaraq Møller Inatsisartunut ilaasortaasimavoq kalaallillu namminneq nunaminni aalajangiisinnaanerulernissaat siuarsarniarlugu sulisimallunilu oqallinnerni peqataasarsimavoq.

Maanna Folketingimut qinigassanngortippoq. Taama Siumut tusagassiuutinut nalunaarummi allappoq.

- Inuiaat Kalaallit namminneerlutik aalajangiisinnaassusiata Folketingimi illersornissaa aatsaat taama pingaaruteqartigilerpoq, taanna oqarpoq.

Tusagassiuutinut nalunaarummi Najaaraq Møllerip nunarsuarmioqatigiit Kalaallit Nunaannut soqutiginninnerisa annertusiartornera pingaartippaa.

- Taamaammat uagut kalaallit annertunerusumik nammineerluta aalajangiisinnaassusitta annertunerusumik illersornissaa pingaaruteqartupilussuuvoq. Peqatigisaanillu soqutigisatta siaruarterlugillu siuarsarnissaannut nunanik allanik suleqateqarnissatsinnut piffissanngorpoq.

Taanna kalaallit innuttaasut inissisimanerisa ullumikkornit pitsaanerulersinnissaa sulissutiginiarlugu Folketingimut qinigassanngortippoq.

Siumup Folketingimut qinigassanngortitartik alla maanna saqqummiuppaa.

Partiimi siulittaasup tullia Ineqi Kielsen pineqarpoq.

Ineqi Kielsenip Folketingimut qinigassanngortinnini pillugu tusagassiuutitigut nalunaarutigaa, Folketingimilu erseqqissumik nipiorusunini:

- Nunarput akisussaassuseqartumik namminiussuseqarnerulernermut ingerlaassappat, taava

ullumikkut aalajangiiffiusuni akisussaaffimmik tigusisariaqarpoq.

- Folketingi taakkununnga ilaavoq, Ineqi Kielsen allappoq.

Danmarkimi Kalaallit Nunaat pillugu oqallinneq ajornannginneruallaartinneqartartoq, naalagaaffiullu ataatsimut tapiissutai pillugit apeqqutiinnanngortinneqartartoq isumaqarpoq.

Piviusoq pisariunerusoq allappoq:

- Nunarput Danmarkimi geopolitikkikkut inissisimaffianut iluaqutaavoq. Nunarput NATO-p Issittumi periusissiaanut qitiuvoq. Nunarput Danmarkip nunatut angissutsiminut sanilliullugu nunarsuup sinneranut pingaaruteqassusianik annertusisitsivoq.

Ineqi Kielsen Folketingimut 2019-imi aamma qinigassanngortippoq, tassanilu 805-init taaneqarluni.

Folketingimi qinigaaffimmi kingullermi Aki-Matilda Høegh-Damip sinniisaa (N) marsip 24-ani folketingimut qinersisoqalerpat taaneqarsinnaasunut ilaassanngilaq.

– Naamik, qinigassanngortissaanngilanga, Elvira Kûitse Naleraq sinnerlugu qinigassanngortissanersoq Sermitsiamit aperineqarami taama akivoq.

Aki-Matilda Høegh-Dam Inatsisartuni suliniarluni 2025-mi ukiakkut sulinngiffeqalermat Elvira Kûitse tunumiunit siullersaalluni Folketingimi ilaasortanngorpoq.

Folketingimut 2022-mi qinersinermi Kûitse 120-nit taaneqarpoq. Aki-Matilda Høegh-Dam assigalugu Siumut sinnerlugu taamani qinigassanngortippoq, kingornalu Naleqqami ilaasortaalerluni.

Kalaallit Nunaat Folketingimi marlunnik nutaanik ilaasortaqalissasoq maanna paasinarsivoq.

Aaja Chemnitz (IA) qinigassanngorteqqinniarani sisamanngornermi nalunaarpoq, Naleqqamilu siulittaasup Pele Brobergip Aki-Matilda Høegh-Damip aamma qinigassanngorteqqinniarnani aalajangernera sisamanngornermilu unnukkut nalunaarutigaa.

Partiip siulittaasuata Aki-Matilda Høegh-Dam suliaanut qujassuteqarfigaa:

- Puigornavianngilarput. Eqqaamajuassavarput, maannalu aaliangiussat sassaqqinniannginerit tamakkiisumik taperserparput. Tununniippugut, Pele Broberg Facebookimi quppernermini allappoq.

Aki-Matilda Høegh-Dam Folketingimut qinigassanngorteqqinniarnani siusinnerusukkut nalunaarutigereernikuaa, ilaatigut Inatsisartunut ilaasortanngorami nukini tassani atorusullugit.

Aki-Matilda Høegh-Damip aalajangernini pillugu immiussani TikTokimi saqqummiuteqqammerpaa:

- Maannakkut Uummannamiippunga. Tusareersimassavarsi Folketingimut qineqqusaarneq aallartittoq. Paatsoortoqaqinammat oqaatigiinnassavara:

- Folketingimut sassaqqinniarnanga aalajangiussimagakku. Taamaammat tapersersuisarsimagassi tamaavissi qamannga pisumik qujaffigeruppassi. Angusaqaqaagut. Aamma qularutiginngilara Folketingimut isertussat tullii pimoorussillutik ingerlalluarumaartut, Aki-Matilda Høegh-Dam videomi ilaatigut oqarpoq, nangillunilu:

- Nunatsinni pissutsit ilungersunartut ikiliartunngillat, taamaammat nukikka tamaasa nunatsinni aaqqitassanut ilungersunartunut piffissamik atuilluarlunga atorusuppakka. Folketingimi suleqatigisimasakka immikkut aamma qujaffigerusuppakka, aamma Aaja Chemnitz. Isumaqatigiittuaannanngikkaluarluta suleqatigiissimanitsinnut aamma qutsavigerusuppakkit.

Aki-Matilda Høegh-Dam Folketingimut 2022-mi qinersinermi Siumut sinnerlugu qinigassanngortippoq. Qinersinermi taaguunneqarnerpaalluni 6.670-inik qinerneqarpoq, tassa qinersisut tamarmik 33 procentiinit taaneqarluni.

Inatsisartunut 2025-mi qinersisoqarnissaa sioqqullugu februaarimi Siumumiit Naleqqamut nuuppoq.