Ataatsimiititaliaq Savalimmiut, Kalaallit Nunaat Ålandilu nunat allat assigalugit Nunat Avannarliit Siunnersuisoqatigiivini aamma Nunat Avannarliit Ministeriisa Siunnersuisoqatigiivini qanoq peqataasinnaanersut pillugit siunnersuuteqassaaq.
Sapaatip-akunnerani matumani tamanna aalajangerneqarpoq.
Taama Nunat Avannarliit Ministeriisa Siunnersuisoqatigiivisa tusagassiuutitigut nalunaarummi ilisimatitsissutigaat.
Savalimmiut, Kalaallit Nunaat Ålandilu ukiuni qulikkuutaani nunat avannarliit siunnersuisoqatigiivisa, aamma Danmarkip, Sverigep, Finlandip, Norgep Islandillu ilaasortaaffigisaata, sulineranut peqataasimapput.
Nunalli avannarliit pingasut namminersorlutik oqartussaqarfiusut nunani avannarlerni suleqatigiinnermi sunniuteqarnerulernissartik sivitsortumik kissaatigaat.
Siulersuisoqatigiinni, ukiumoortumik ataatsimiinnerit akornanni politikkikkut aqutsisuni qullersaasuni, aalajangersimasumik ukiortaamiit ilaasortanngortinneqarput.
Ataatsimiititaliap Helsinkimi isumaqatigiissutip, Nunat Avannarliit Siunnersuisoqatigiivinut tunngaviusup, nutarternissaa sulissutigissavaa.
Suliaq tamanna naammassineqareersimassaaq, taamaalilluni ataatsimiititaliap allannguutitut siunnersuutaa ukioq manna oktobarimi Nunat Avannarliit Siunnersuisoqatigiivisa ataatsimiinneranni oqaluuserineqassalluni.
- Ataatsimiititaliap Helsinkimi isumaqatigiissutip allannguutai aalajangersimasut suliniutillu allat ataatsimut siunnersuutigissavai, taamaalilluni Savalimmiut, Kalaallit Nunaat Ålandilu nunat avannarliit suleqatigiinneranni naligiimmik peqataasinnaalissapput, suliassiissummi allassimavoq.
Ataatsimiititaliaq arfineq-pingasunik ilaasortaqassaaq. Taakku nunat avannarlerneersuullutillu nunani namminersorlutik oqartussaqarfinneersuussapput.
Suliaq siunnersuisoqatiit iluanniippoq.
Nunat avannarliit siunnersuisooqatigiivisa 2024-mi ataatsimiinnissaannut Kalaallit Nunaata peqataannginnera pissutigalugu nunat taakku pingasut politikkikkut suleqatigiinnerat Kalaallit Nunaata peqataaffigiunnaarpaa.
Siulittaasoqarfimmi nunat ilaalissasut aalajangerneqarmat, "suleqatigiinneq pingaaruteqarnerulerlunilu peqataatitsifiunerulersoq" siunnersuisoqatigiinnit nalunaarutigineqarpoq.
Naalakkersuisulli politikkikkut suliniuteqarnermut suli peqataajumanatik KNR-imut allapput.
- Naalakkersuisuusimasut oqariartuutaat, Kalaallit Nunaat Nunat Avannarliit Siunnersoqatigiittarfiani tamakkiisumik ilaasortanngussasoq, naalakkersuisunit maannakkut atuuttunit suli tapersersorneqarpoq aalajangiusimaneqarlunil, naalakkersuisut siulittaasuat Jens-Frederik Nielsen oktobarimi oqarpoq.
Helsinkimi isumaqatigiissut 1962-imi atsiorneqarpoq, kingullermillu 1995-imi allanngortinneqarluni.
Nunat Avannarliit Siunnersuisoqatigiivi nunani avannarlerni suleqatigiinnermut tunngatillugu inatsisartuni ilaasortaasut 1952-imi pilersinneqarsimapput. Siunnersuisoqatigiit Danmarkimiit, Finlandimiit, Norgemiit, Sverigemiit, Savalimmiuniit Kalaallit Nunaanniillu qinikkanik 87-inik ilaasortaqarput.
/ritzau/
