Nutartigaq: Billundimiit timmisartoq Kangerlussualiartinneqarpoq.
Nutarterneqarpoq: Kitaani timmisartuussinissat tamarmik taamaatiinnarneqarlutillu Billundimiit nunatsinnukartut uteqqipput (Allaaserisap naanerani atuaruk).
Billundimit Nuummut timmisartuussineq Nuummi anorlernera pissutigalugu allamut tikisinneqarpoq.
Air Greenland timmisartoq Billundimeersoq Nuummi pissutsit pissutigalugit Kangerlussuarmut ingerlaqqittariaqalersinnaasoq pingasunngornermi ullaap tungaani nittartakkamini ilisimatitsivoq.
Nittartakkami Flightradar24-mi paasissutissat naapertorlugit timmisartoq Kangerlussuarmut ingerlaarsimagaluarpoq, maannali (nalunaaqutaq 11.00) Nuummut ingerlaaqqilersimasutut allaqqalluni.
- Timmisartoq Kangerlussuarmut missagaluarpat angalasut Nuummiit ilaasussat nutaamik angalanissaminnut pilersaarusiuunneqassaoout, Air Greenland allappoq.
Nuummi anorsarinnerata sakkortuumik anoraasuartarnera pissutigalugu nunap iluani timmisartuussinissat sunnerneqarsinnaasut Air Greenland siusinnerusukkut allappoq.
- Isumassatsialaavoq angalasut Dash8-mut ilaasussat, mailitik aamma SMS nakkutigippatigik, kinguaatoortoqarsinnaanera pissutigalugu.
Nuup Kulusuullu akornanni timmisartuussinissat allanngortinneqanngillat.
Nutartigaq: Kitaani timmisartuussinerit tamarmik taamaatiinnarneqarput
Air Greenland nalunaaqutaq 12.30-p missaani pisoq pillugu nutaarsiassiivoq.
Sila pissutigalugu timmisartortitseqatigiiffik ullup sinnerani kitaani timmisartuussinissat taamaatinneqarput.
Aamma Billundimiit Kangerlussuarmut timmisartuussinermi ilaasut Billundimut utertinneqassasut ilisimatitsissutigineqarpoq.
- Tamatumunnga pissutaavoq aqagu angallassinissamut pilersaarut ulikkaarmat aamma timmisartut Dash8 suli Nuummit timmisartunut inissiisarfimmiimmata. Aammattaaq Ilulissaniit Aasiannukartoq Dash8 Aasiannut missinnaanngimmat ullumi siusinnerusukkut aallarfimminut utiinnartariaqarpoq, Air Greenland unammilligassat pillugit allappoq.
Angalasut eqqugaasorpassuit angalanissaannut pilersaarutinik nutaanik Air Greenand suliaqaleruttorpoq.
- Taakkua qinnuigaavut suliap tamatuma suliarineqarnerani naammagittaqqullugit.
