Ulloq unnuarlu kingulleq angerlarsimaffinni aqqusinermilu eqqissiviilliortitsinernik suliassaqarfiusimasoq, pigaartut pisortaat Aqqalu Petersen Sermitsiamut oqaluttuarpoq.
Tamatuma saniatigut imigassartorsimalluni biilertut pillugit suliat sisamaapput, taakkulu tamarmik Nuummi pipput.
Taakkunannga pingasut Nuussuarmi unitsinneqarput, ataaserlu Nuup qeqqani unitsinneqarluni.
Biilertut unnuakkut nal. 00.36 05.01-llu akornanni unitsinneqarput. Suliani tamani pineqartut angutaapput, taakkulu tigusarineqarlutik aaversikkiartortinneqarput.
Politiit aamma Nuummi nal. 03.41 persuttaasoqarneranik nalunaarfigineqartut, pigaartut pisortaata oqaluttuaraa.
Persuttarneqartoq 21-nik ukioqarpoq, politiillu sapaammi ullaakkut persutaasimasumik suli tigusarinninngillat, suliarli misissorneqarpoq.
Sisimiuni politiit toqutsinissamik qunusaarineq pillugu suliaq misissorpaat. Pisoq 04.42 nalunaarutigineqarpoq.
