- Maannakkut sinnarluttarpunga. Qaartinneqarnissarput ernumassutigaara. Kisimiikkama annilaanganaqaaq.
Taama Jacobina Rødbjerg Nuummi Amisuni nalunaaqutaq ataatsinut aallartittussamik akerliussutsimut takutitsisoqarnissaanut piffissaqarluarni takkuttoq oqarpoq.
- Siorna peqataannginnama ullumikkut peqataarusuppunga. Kalaallillu Nunaat Kalaallit pigimmassut peqataavunga – uagununa nunarput, taanna oqarpoq.
Jacobina Rødbjerg kisimi akerliussutsimik takutitsiartorluni takkutinngilaq. Inuit takkussuupput.
Nuummi akerliussutsimik takutitsisoqarnerata saniatigut kalaallit nunarput tamakkerlugu aamma akerliussutsimik takutitsillutik ingerlaaqatigeerrapput. Qaqortumi, Aasianni, Sisimiuni Ilulissanilu USA-p præsident Trumpillu Kalaallit Nunaannik nakkutilliilernissamik kissaateqarneranut akerliussutsimik takutitsisoqarnissaa pilersaarutaavoq.
Nalunaaqutaq ataatsinut tikilluaqqusisoqarpoq, inuillu nillerrallutillu erfalasunik erfalatitsipput. “Kalaallit Nunaat, Kalaallit pigaat”, inuit suaartaapput.
Takkuttunut politikerit arlallit peqataapput, taakkununngalu Naalakkersuisut siulittaasuat Jens-Frederik Nielsen (D), Inatsisartullu siulittaasuat Kim Kielsen (S) ilaapput.
Inuiattut erinarsuuterput erinarsorneqarpoq.
Karen Jessen Kalaallit Nunaat suli nunatut eqqissisimasuussasoq namminersortuussasorlu isumaqarami, ilaquttani peqatigalugit akerliussutsimik takutitsisunut peqataapput.
- USA-p pisiarissappatigut inuiattut suujunnaarsinneqassasugut isumaqarpunga. Kingulissakka pillugit maani peqataavunga.
- Piffissaq manna ilungersunartupilussuuvoq, oqarpoq qullilillunilu.
Jens Salik Lailalu Donald Trumpi isumaqatiginnginnamikku akerliussutsimik takutitseqataapput.
- Inuuvusi inuttulli allatut, nunarsuarmi innuttat naligalugit, Jens Salik oqarpoq, imalu nangilluni:
- Isumaqatiginngilarput. USA-p ataatsimeeqatiginissaa sioqqullugu pissangasimavugut, ataatsimeeqateqarnerullu kingorna – aamma kongressimi ilaasortanik - eqqissisimanerulerpugut.
Pingasunngormat nunanut allanut naalakkersuisoq Vivian Motzfeldt (S), nunanut allanut ministeri Lars Løkke Rasmussen (Moderaterne) Amerikamiut nunanut allanut ministeriannik præsidentiatalu tullianik J.D. Vancemik ataatsimeeqateqarput.
Ullup tulliani danskit kalaallit aallartitaat kongressimi senatimilu ilaasortanik naapeqateqarput.
Akerliussutsimik takutitsineq aallartilluareerpoq. Takkuttut amerlapput, Nuup aqqusernisigut ingerlaarnermi nipilersortoqarpoq.
