Oqaatsit ilikkagaqarnissamut akornutaasut

Ilinniartitsisoq atuaqatigiinnut kalaallisut oqalukkaangat atuartut sisamat nipangersimaannarlutik malinnaaniartarput.

Imaanngitsoq oqaatigineqartut paasigamikkit, kisianni ulluinnarni atuarfimmi pisartut kingusinnerusukkut paasisarneri sungiusimagamikkit.

Taava aatsaat ilinniartitsisup tuluttut nassuiaaffigisinnaavai — sapinngikkuni. Saperpat taava imminnut tapersersortariaqarput — imaluunniit namminneq paasiniartariaqarpaat.

Atuartut taakku sisamat atuartitsinermik paasinninniarsarisut tamarmik Nuummi Atuarfimmi Inussumi 10. klassimi atuarput.

Cyrille Jhoy, Shanelle Pampoza, Samuel Del Rosario aamma Aelred Malix Esguerra Cortez meeqqat atuarfianni atuartutut ukioqarlutik Kalaallit Nunaannut tikipput taamaammallu atuaqatimittulli kalaallisut ilinniarnissamut periarfissaqarsimanngillat.

Taakkununnga oqaatsit ajornartorsiutaasarneri ulluinnarsiutinngorsimapput — ilinniartitsisullu paasinissaa kisimi pineqanngilaq. Taamaammat apersorneqarnerat tuluttut ingerlanneqarpoq.

- Qallunaat oqaasii paasilluarnerusinnaavakka. Kalaallisut oqaatsit paasiuminaatsinneruakka Shanelle Pampoza, Nuummi ukiuni sisamani najugaqarsimasoq, nassuiaavoq.

Atuartullu allat aamma taamaapput – sulili ajornerusumik. Samuel Del Rosario, ukiuni marlunni nunami najugaqartoq, naapertorlugu kalaallisut paasiuminaatsorujussuuvoq, Cyrille Jhoyillu ukiup aappaata affaani maani najugaqarsimasup oqaatsit taakku tamaasa ajornakusoortittaraluarlugit tuluttut nutserinissaq ajornannginnerummat qallunaatut oqalukkusunneruvoq.

Allaaserisaq una allaaserisamut: Inimi atuartitsiviusumi oqaatsit sumiginnarneqaraangata-mut nanginneruvoq, tassani AG-p ilisimatuut marluk kangiamiunik meeqqat atuarfianni atuartunik sammisaqarsimapput.

Ataatsimoorneq pingaaruteqartoq

Taamaakkaluartoq taakku sisamat arlaatigut iluatsitsilluarsimapput. Atuaqatigiinni arlaliupput. Tapersersoqatigiissinnaallutillu, imminnut nutserussinnaallutillu misilittakkaminnik avitseqatigiissinnaapput. Tamanna pingaaruteqarluinnartoq arlallit namminneerlutik oqaatigaat.

Tassami nunami sumiiffiit ilaanni kangiamiut atuartut atuaqatigiinni kisiartaasarput - oqaatsinik paasisimanngisaminnik ilinniartinneqaraangamik inimi atuarfimmi ikiortissaqaratik.

Maani Nuummi imminnut ataqatigiipput, ataatsimoornerinnaanngilaq. Malinnaalaarsinnaanissamut tunngaviuvoq.

Tamanna pingaaruteqarluinnarpoq. Allaaserisap siuliani kangiamiut atuartut Kalaallit Nunaanniittut kiserliortarnerat – ilinniagaqarnikkut inooqatigiinnermikkullu – ilisimatuunit oqaatigineqarpoq. Tassunga sanilliukkaanni atuartut sisamat atugaat immikkut ippoq.

Shanelle Pampozap assigiinngissut ilisimalluarpaa. Taanna ima oqarpoq:

- 7. klassimi atualerama kisimiilluinnarpunga. Tamanna ilungersunartorujussuuvoq. Kingusinnerusukkut allamik atuaqateqalerpunga, aatsaallu 9. aamma 10. klassimi kangiamiut atuartut amerlanerusut klassimi ataatsimiilerpugut. Immitsinnut ikiorsinnaagatta tamanna ajornannginnerulersitsivoq.

Assigiinngissut tamanna ulluinnarni malugineqarsinnaavoq. Oqaatsit tungaasigut ajornartorsiutaarutinngillat, ajornartorsiummilli kisermaassiunnaarput.

Ilinniartut sisamat taakkua immaqa maluginiarnerusaat tassaavoq akisussaaffiup ingerlaannaq allamut tunniunneqartarnera. Ilinniartitsisoq paasisinnaasaminnik nassuiaateqanngippat tamanna namminneq ajornartorsiutigilissavaat, ataaseq oqarpoq.

Taava namminneq iliuuseqartariaqarput — atuaqatitik aperisassavaat, namminneq atuassapput imaluunniit qanoq pisoqarnersoq paasiniassavaat.

Ikiuineq erloqinartuusoq

Ajornartorsiut suunersoq Samuel Del Rosariomut ersarippoq. Atuarfimmi atuartut kalaallisut qallunaatullu naammattumik oqalussinnaanngitsut ilinniartitsinermi malinnaaffigisinnaasaannik ilinniartitsisoqarsinnaanngilaq.

- Uagutsinnuinnaanngitsoq aammali siunissami atualertussanut ilinniartitsisut tuluttut oqalussinnaasut amerlanerusariaqarput, taanna oqarpoq.

Nammineerluni sapaatip-akunnera atuarfiusoq qimerlooraangamiuk ilinniartitsisut ilaat ataasiinnaq tuluttut oqalulluarsinnaavoq. Ikiuineq taamaalilluni erloqinarsisarpoq. Ilinniartitsisoq taanna peqanngippat malinnaanissaq ajornakusoorsisarpoq.

Siornatigut atuarfimmi oqaatsit atorlugit immikkut ikiuisoqartarsimagaluartoq Cyrille Jhoy oqarpoq.

- Nalinginnaasumik atuartitsinermi ilaatinnata inimi allami kalaallisut, danskisut tuluttullu oqalussinnaasumik ilinniartitsisoqartarnikuuvugut. Tassani tunngaviusut ilinniarpagut, tamannalu malinnaanissamut ajornannginnerulersitsivoq, taanna oqaluttuarpoq.

Tamanna pitsaanerpaanngikkaluartoq naqissuserpaa, kisianni iluaqutaavoq. Ullumikkut taamatut neqerooruteqartoqanngilaq.

Cyrillep kissaataa piviusorsioraluarpoq. Tupinnartuliornissaq pineqanngilaq, pivisiorsiorporli: atuartut nunanit allaneersut Kalaallit Nunaannut tikikkaangata atuartitsinermut oqaatsinullu ilisarititsineq pitsaanerusoq.

Atuarfimmi ilisarititsineq, ilinniartitsisut tuluttut oqalussinnaasut amerlanerusut — aamma atuartut ilaannaasa kalaallisut danskisullu oqalussinnaanerat piareersimaffiginerusariaqarpoq.

Oqaatsit siunissamut aalajangiisuusut

Ilinniartut sisamat taakkua siunissaq isumakuluutigaat. Ilinniartitaanermi ingerlariaqqikkusupput -ilinniarnertuunngorniarfimmi, kingornalu ilisimatusarfimmi ilinniaqqinnissartik kissaatigaat - taamaaliussagunilli danskisut ilikkaqqaartariaqarput, tamannalu nalorninermik pilersitsivoq.

- GU-mi ilinniarlunga ingerlaqqikkusuppunga, danskisulli oqaatsikka naammaginarnersut nalornissutigaara, Shanelle Pampoza oqarpoq oqaatsillu periarfissaminut aalajangiisuusut erseqqissarpaa.

Anguniagaqaraluarlutik atuaqatiminnut naligiinnissamut suli periarfissaqanngillat. Ima nangippoq:

- Ilinniartitsisoq paasinngikkaangatsigu nammineq paasiniaasariaqartarpugut. Tamanna ilatta angajoqqaat akiligaannik angerlarsimaffimmi immikkut ilinniartinneqartariaqartarnerannik isumaqarpoq.