Paamiuni innuttaasut ineqarnermut tunngatillugu iliuuseqarnissamut naalagaasuugunik politikkikkut iliuuseqapallattoqassagaluarpoq.
Paamiuni innuttaasut 100-nit amerlanerusut tamanna pillugu Naalakkersuisunut Kommuneqarfik Sermersuumullu allakkatigut saaffiginnissut atsioqataaffigaat.
Illoqarfimmi innuttaasut arlallit angerlarsimaffeqannginnerat, ilaqutariillu ilaat najugaqarfigineqarnissamut tulluanngitsuni najugaqarnerat ajornartorsiutit annersarigaat atsioqataasut isumaqarput. Aamma innuttaasut ilaat naleqquttumik inissarsisinnaanerup ajornakusoornera pissutigalugu illoqarfik qimattariaqartaraat.
Kommuni Naalakkersuisullu attaveqarfigisareerlugit aalajangiisartunik akisussaaffimmik paarsisunik peqataasoqarluni, Paamiuni innuttaasunik ataatsimiititsinissaq aamma iliuusissatut pilersaarusiamik pisussaaffiusumik kissaateqartoqartoq, innuttaasut sinnerlugit Sermitsiamut nalunaaruteqartut ilisimatitsipput.
Innuttaasut naapertorlugit ajornartorsiutit nassuerutigineqarput, aaqqiissutissalli piviusut naammaginartut amigaataallutik.
Kommune: Nutaanik inissialiornissarput sulissutigaarput
Kommuneqarfik Sermersuumi borgmesteri Avaaraq Olsen (IA) atsiornernik katersineq februaarimi qisuariarfigaa.
Namminersorlutik Oqartussat Paamiuni inissiaataat aserfallatsaalineqarsimannginnerat isumannaallisaanerlu pissutigalugit amerlasuut ukiut ingerlaneranni isaterneqarnikuunerat ilumoortoq, borgmesteri allakkamini eqqaavai.
Innuttaasut naapertorlugit Paamiuni inissiat 450-it missaanniittut ukiuni arlalinni isaterneqarsimapput, tamannalu isornartorsiugaasa ilagalugu.
Isaterinerit pisariaqarsimapput inissallu amerlassusaannut kinguneqarsimanerisa isumakuluutigineqarnerat kommunimiit paasineqarluarsinnaasoq borgmesteri allappoq.
Kommuneqarfik Sermersuulli 2026-mi illoqarfimmi utoqqarnut pitsaasunik inissianik 14-inik neqeroortitsissasoq, suliniummullu 45 millionit koruunit missaat immikkoortinneqarsimasut innersuussutigaa.
- Ataatsimut isigalugit Paamiuni inissiat nutaat 18-it, innuttaasunut utoqqarnut inuusuttunullu inissatut siunniunneqartut, pilersinneqartussanngorput, borgmesteri allappoq.
Naalakkersuisut: Ineqarnissamik pisariaqartitsisukinnerulernera pissutigalugu inissiat isaterneqarput
Aamma naalakkersuisoq Aqqaluaq B. Egede (IA) innuttaasunit saaffiginninnermut akissuteqarpoq. Piffissami inissiarpassuarnik inigineqanngitsunik peqarnerata nalaani inissiarpassuit isaterneqarsimasut taassuma ilaatigut paasissutissiissutigaa.
Inissiat marluk aamma inuerutsinneqarnikuupput 2026-milu isaterneqassasut naatsorsuutigineqartoq, naalakkersuisoq ilisimatitsivoq. Inissiat taakku piffissami sivisuumi inoqarnikuunnginnamik ajoquteqalersimammata ajornartorsiutit maanna atuuttut aaqqiiviginiarlugit atulerneqarsinnaanngillat.
INI-mit paasissutissat naalakkersuisup pissarsiarisimasai naapertorlugit Paamiuni inuit 71-it initaarnissamut utaqqisuniipput.
Oqartussaasunit akissutigineqartut innuttaasunit naammagineqanngimmata, pineqartoq pillugu innuttaasunik ataatsimiititsinissaq iliuusissatullu pilersaarusiortoqarnissaa kissaatigineqarpoq.
- Pissutsit ajorneruleriartorneranni oqartussaasut akisussaaffimmik miloriussisaqattaartutut misigaavut, innuttaasut sinnerlugit oqaaseqartoq Sermitsiamut allappoq.
