Kangerlussuarmi marlunngornermi marsip 31-ani ualikkut pisoq qaqutigoortoq ulapputigineqarpoq.
Timmisartup Polenimeersup attaveqarnera politiinit piffissap ilaani ulapaarfiusimasoq Kalaallit Nunaanni Politiiniit Karsten Højrup Kristensen Sermitsiamut ilisimatitsivoq.
- Timmisartoq takornarianik ilaasulik angalasut ilaat napparsimalersimasoq nakorsamit ikiorniartariaqarmat mikkumalluni saaffiginnippoq. Timmisartoq 300-nik ilaasoqartoq Polenimiit Torontoliartorpoq, Karsten Højrup Kristensen oqaluttuarpoq.
Ilaasut ilaat nakorsaasoq ikiuisinnaasorlu paasineqarmat timmisartoq minngilaq.
Nanortalik sarfaaruttoq
Nanortalimmi politiit aamma ulapaarlutik illoqarfimmi angalaarnerupput.
Nanortallip ilarujussua suli innaallagiaqanngilaq, illoqarfillu tamarmi oqarasuaatinut internetimullu attaveqarani.
- Kujataani anorersuarnera pissutigalugu Nanortalik nalunaaquttap akunnerini arlalinni sarfaqanngilaq. Pingasunngornerup unnuaani nalunaaqutaq 02.30 innaallagiaaruppoq. Ajornartorsiut aaqqinniarlugu sulissutigineqarpoq, politiit ilimatitsipput.
Aqquserngup quasannera biilinik ajutoorfiusoq
Nuummi aqqusinermi angallattut arlallit Nuussuarmi biilinik ajutoortoqarsimasoq takusimassagunarpaat.
Biilit pingasunngornerup unnuaani apummut qaqisimapput.
- Biilit attartortakkat pineqarput, tassanilu aquttoq aqquserngup quasannerani aputip qaanut qaqisimagunarpoq. Ajutoorneq Qarsaalimmi aqquserngup sangusariaanni pivoq, tassani biilit qanoq sukkatigisumik ingerlasimanerat paasineqanngilaq. Aquttoq ajutoorfimmiit nammineq pisulluni ingerlasinnaasimavoq, aamma ajutoornermi allat eqqugaanatik, Karsten Højrup Kristensen oqarpoq.
Eqqaaneqartut saniatigut politiit angerlarsimaffinni eqqissiviilliortunut arlalinnut ornigupput.
