Puttasoqalissaaq multihuseqalissallunilu

Qaanaap kangerluani nunaqarfimmi Qeqertani puttasuliinissaq aamma illup sulliviup meeqqallu atuarfiata oqaluffiutigisup taartissaannik multihusiliornissaq (illu assigiinngitsunik neqerooruteqartoq, aaqq.) Avannaata Kommuniani kommunalbestyrelsip martsip naanerani ataatsimiinnermini akuersissutigaa.

Multihusi

Illu sullivittut massakkut atorneqartoq kiisalu atuarfiutigaluni, oqaluffiutigaluni, akunnittut unnuisarfiattut katerisimaartarfittullu atorneqartoq pisoqalerujussuarsimavoq.

- Illu sullivittut atorneqartoq 1961-ip naaneraneersuuvoq pisoqarujussuullunilu, Ujuut Olsen (S) siunnersuuteqartoq nassuiaavoq.

Illu imermik pilersorneqanngilaq, umiarsuup kissarsuutaata assinganik kiassarneqarpoq aamma allaffik inunnut paasissutissanik mianernartunik imalik isumannaatsumik parnaarneqarsinnaanngilaq.

Innuttaasut ullumikkut inoqarfimmi uffarfissaqanngillat. Uffarneq sullissivimmi uffarfik baaliaasaq atorlugu ilaannikkut pisarpoq, atugassarititaasut killeqaqisut atorlugit. Tamanna peqqissutsimut, atugarissaarnernut aamma najugaqarniarnermut periarfissanut sunniuteqarsinnaasutut nalilerneqarpoq.

Maannakkut atuarfiusoq aamma oqaluffittut, ataatsimoortarfittut, sunngiffimmi ornittakkatut kiisalu tikeraanut unnuisarfittut ilaatigut atorneqartoq, pisoqalillunilu nukissamik atuinermut tunngatillugu naammaginanngilaq, tassami kiassarnermut ikummatissamik annertuumik atuiffiusarpoq. Avannaata kommuniani kommunalbestyrelsip ataatsimiinnerani kommuni nassuiaammini taama ilisimatitsivoq.

Takornariaqarnermut ataatsimiititaliap paasisassarsiorluni Avanersuarmut tikeraarnerani pisariaqartitsineq qanoq annertutiginersoq uppernarsarneqarpoq.

- Ataatsimiitaliami ilaasortat namminneq takusaattut qanoq pisariaqartitsisoqartiginersoq takuaat, Ujuut Olsen (S) oqarpoq.

Avannaata Kommuniani kommunalbestyrelsip oqaluuserisassaani allaaserineqarpoq multihusi makkuninnga atuuffinnik imaqarsinnaasoq: Allaffik, sullissinermi atortut soorlu uffarfiit errorsiviillu, peqqinnissamut tunngasut, soorlu nakorsaataasivik, atuarfik ulluuneranilu paaqqinnittarfik.

Aningaasanik missingersuutinik sanaartugassanillu aaliangiinissani ukiup tullianut ilanngunneqassasoq qulakkeerneqarsimasutut taasinnaaviuk? Sermitsiaq aperivoq.

- Ukiuni tulliuttuni aningaasanik missingersuusiorallarnermi ilanngunnikuuarput. Sanaartornermut tunngasortassaat soorunami isumaqatiginninniarneq aningaasanut tunngasut ukiut tulliini isumaqatigiinniutigineqarnerani ikkusimanissaat aamma piviusunngornissaat kommunemi suleqatigiit Siumut Nalerarlu soqutigisarivarput, Ujuut Olsen (S) oqarpoq.

Puttasuliinissaq

Qeqertat aasaanerani qilalugarniarfiup nalaani piniartunut qitiulluinnartarpoq, puttasulerneratigullu isumannaannerusumik tikinneqarsinnaanissaa anguniarneqarpoq.

Sumiiffik ilaatigut piniartunit aalisartunillu orsersoriartorfigineqarlunilu taquassarsiniarfigineqartarpoq.

Qeqertanut tassanngaanniillu angalaneq pissutsit isumannaannerusut atorlugit pisinnaaniassammat atuisartunullu atugassarititaasut nalinginnaasumik pitsanngortinnissaat siunertaasoq, Avannaata kommuniani kommunalbestyrelsip ataatsimiissutaani allassimavoq.

- Usilersornermi taquassarsiniarnermi taavalu taassuma saniatigut orsersornermi isumannaannerusumik atugassaqartitsinissamik pisariaqartitsisoqarpoq, Ujuut Olsen (S) oqarpoq.

Avannaata Kommuniani kommunalbestyrelsip puttasuliisoqarnissaanik siunnersuut akuersissutigaa, naatsorsuutigineqarporlu aasaru umiarsuaqareerpat puttasuliisoqassasoq.

- Kommunalbestyrelsiminngaanniit naatsorsuutigivarput Qeqertani puttasut aasami atulersinnaassasut umiarsuaqarnerata kingornatigut, tassa taanna neriuutigivarput aamma naatsorsuutigivarput, Ujuut Olsen (S) oqarpoq.