Qaammammuliartartut sisamat Kalaallit Nunaata nalunaaqutaa malillugu sisamanngornermi unnukkut qaammat kaajallallugu angalanissamut aallartinneqarput.
Amerikamiut Reid Wiseman, Victor Glover aamma Christina Koch Canadamiullu Jeremy Hansen avataarsualiartaat „Orion“ Floridami Kennedy Space Centerimit aallartinneqarmat ilaapput.
Aallartinneqarneq ulluni qulini angalanissaminni suliassaasa ilungersunarnerpaartaasa ilagaat.
Ajornartorsiut annikitsunnguarluunniit inuttanut ajunaarutaasinnaavoq.
Avataarsualiartaat sumiiffimmi nalunaaqutaq malillugu 18.35 – Kalaallit Nunaata nalunaaqutaa naapertorlugu 21.35 – Amerikamiut avataarsualiortarnermut ingerlatsivianit Nasa-mit innerujussuaq atorlugu qummut aallarpoq.
Nalunaaquttap-akunneranut 8000 kilometerit
"Orion“ minutsit pingasut qaangiummata raketti ikiuisoq atorlugu nalunaaquttap-akunneranut 8000 kilometerit sinnerlugit sukkassuseqalersinneqarpoq.
Qaammammuliartartut ulluni siullerni nunarsuaq kaavissavaat, tassanilu atortorissaarutit arlallit misissussavaat. Kingorna qaammammuliarlutik ingerlaqqissapput.
"Orion“ ullut sisamat qaangiuppata qaammatip eqqaatiguussaaq, tamatumalu kinguninngua angerlamut aallaqqissaaq.
Qaammammuliartaat nunarsuup silaannartaanut isissappat angalanermi ajortumik pisoqaratarsinnaammat inuttat navianartorsioqqissinnaapput.
Qaammamuliartaat angerlamut ingerlaarnerminni nalunaaquttap-akunneranut 40.200 kilometerit sinnerlugit sukkassuseqassaaq.
1970-ikkunniilli siullerpaajusoq
“Orion” pilersaarutit malillugit Manerassuarmut missaaq, tassanilu annaassiniartartut inuttat aassallugit piareersimassapput.
Aallartitsineq suliniummut Artemis II-mut ilaavoq. Iluatsissappat 1970-ikkunniilli siullermeerluni inunnik Qaammammik kaajallaatitsisoqassaaq.
Avataarsualiartarneq immikkoortunut arlalinnut avinneqarpoq. Immikkoortoq siulleq - Artemis I - inuttaqanngilaq.
Suliniut Artemis II NASA-p inunnik qaammammut utertitsinissamik pilersaarutaanut pingaaruteqarluinnarpoq.
Qaammammi ataavartumik avataarsualiorfimmik sanaartortoqarnissaa kingusinnerusukkut pilersaarutaavoq, taannalu atorlugu avataarsua misissoqqissaarneqarsinnaanngussaaq, ilaatigut Marsimut angalasoqarsinnaalluni.
NASA-p avataarsualiartornermi suliniut nutaaq guutip Apollop marluliaa malillugu Artemisimik atserpaa.
NASA-p Artemisimik suliniut Europami, Japanimi, Canadami Australiamilu avataarsualiornermut ingerlatsiviit suleqatigalugit ingerlappaa.
/ritzau/
