Umiammakku Nunaat Karraniittup aamma Kigarsima Kangerluarsummiittup alapernaarsorneqarnerannut qaammammut nalunaarusiatut saqqummersinneqaqqammerput.
Qaqqap annertuup sisooratarsinnaaneranik, malissuarnillu inoqarfinnut anngussinnaasumik aarlerinartoqarneranik misissuinerit takussutissaqanngillat, Aatsitassanut Oqartussat nalunaatummi allappput.
Umiammakku Nunaani nakkutilliinermut atortunut innaallagissamik pilersuisut marluk ajoquteqarnerat pissutigalugu sarfalersornerat annikillisinneqarsimasoq, oqartussaasut aamma ilisimatitsipput.
- Ajoqutip kinguneraa ujarassiuut nakkutilliisuusut novembarip aallaqqaataaniilli alapernaarsuivimmiit assinik ersarissunik pissarsisimanngimmat, naliliinermi allapput.
Silaannarmit assilisat radarimiillu paasissutissai
Assit amigaataaammata qaqqamik nakkutilliiniarneq allatut aaqqissuunneqarpoq.
Issittumi Sakkutooqarfiup timmisartua atorlugu sapaatip-akunnera allortarlugu silaannakkut assiliiartortoqartassaaq, aammattaaq qaqqami nikinnernik allannguutinillu malussarumalluni qaammataasanit raadarimik paasissutissat katersorneqarsimasut misissoqqissaarneqartassapput.
Atortut sarfamik atuinikillisinneqartariaqarsimanerat kaperlaap kingorna februar/marsimi seqernup qaamarnganik sarfaliuutit batteriit naammattumik immiisinnerisigut qaammataasakkut attaveqaatip ullut tamakkiallugit paasissutissanik nassissuisinnaasaqqilernissaata tungaanut ingerlanneqassasoq, oqartussat paasissutissiipput.
Misissuineq tamaat uani atuarneqarsinnaavoq.
