Gideon Lyberthip (S) kommunalbestyrelsimi suleqatigiinniit tunuarnerata kingorna Qeqqata Kommuniani partiit illuatungiliuttut amerlanerussuteqalerput.
Naleraq, Demokraatit aamma Atassut kiisalu attaviitsoq Gideon Lyberth katillugit arfineq-pingasuupput, partiillu suleqatigiit Siumut aamma Inuit Ataqatigiit borgmesteri Malik Berthelsen (S) siuttoralugu arfineq-marlunnik ilaasortaatitaqarlutik.
Partiit illuatungiliuttut maanna suleqatigiinnissamut isumaqatigiissummik ukiuni pingasuni tulliuttuni atuuttussamik – tassa 2028-mi kommunimut qinersisoqarnissaata tungaanut – suliaqarlutillu atsioqatigiipput.
Isumaqatigiissutigineqartut meeqqat, utoqqaat, isumaginninneq, inuit innarluutillit, sunngiffimmi sammisassat inuussutissarsiornerullu tungaatigut suliniutit aallutissavaat.
Ataatsimiititaliap inuussutissarsiornerup ingerlalluarnissaa qulakkiissagaa
Qeqqata Kommuniani suliniutit angisuut marluk qanittukkut aallartissinnaapput. Taakku tassaapput Tasersuarmi Tasersiamilu erngup nukinganik nukissiorfiliornissamut periarfissat. Taamaattumik illuatungiliuttut kommunalbestyrelsimi ataatsimiititaliamik allamik pilersitsiniarput. Ataatsimiititaliap kommunimi inuussutissarsiornerup ineriartortinnissaanut periarfissat ersarissumik sinaakkusiiffigissavai. Tamanna kommunalbestyrelsip tulliani ataatsimiinnerani oqaluuserineqassaaq.
- Tasersuaq Tasersiallu Namminersorlutik Oqartussat nunarsuaq tamakkerlugu suliffeqarfissuarnik suleqateqarluni annertoorujussuarmik pilersaaruteqarnerani Qeqqata Kommuunia isiginnaartuuinnassanngilaq, aallaqqaataaaniit peqataatinneqartariaqarpoq. Taamaattumik suleqatigiit Namminersorlutik Oqartussanut piaarnerpaamik piumasarissavaat pilersaarummut isiginnaartuutinneqaannaratik peqataatinneqalernissaat. Tassanimi pineqarput Qeqqata Kommuuniani nunatarujussuit annertuut ilaatigut kulturikkut piniarnikkullu annertoorujussuarmik pingaarutillit, partiit allapput.
Sanaartornerit amerlanerusut pilersaarusiorneqassapput
Inuussutissarsiornerup saniatigut Naleraq, Demokraatit, Atassut attaviitsullu kommunimiit nutsertut ikilisarniarlugit inuusuttunut sunngiffimmi neqeroorutit ineriartortinnissaat sulissutigissavaat. Tamatuma peqatigisaanik inuit innarluutillit utoqqaallu pitsaanerusumik kiffartuunneqarnissaannik qulakkeerinnittumik suliniuteqartoqassaaq, pingaartumik ineqarfinnik pilersitsinikkut aamma sulisunik pikkorissartitsinernik piginnaanngorsaanissamullu amerlanerusunik neqerooruteqarnikkut.
Aamma meeqqat atuarfiat ulluneranilu paaqqinnittarfiit, kommunip akisussaaffigisai, partiinit pitsanngorsarneqarusupput.
- Meeqqeriviit nutaanngitsut tulleriiaarinikkut taarsersorneqarnissaat anguniarneqassaaq, sumiiffinnilu pisariaqartitsinerit aallaavigalugit pingaarnersiorneqassallutik, allassimavoq.
Najugaq qimannagu perorsaanermik ilinniarfimmi ilinniartoqarsinnaanera partiit aamma sulissutigissavaat. Taamaaliornikkut sulisut ilinniarnerminni illoqarfigisaminniiginnaarnissaat qulakkeerniarneqarluni.
Partiit suliniutiginiagaasa ilaat aamma tassaavoq kommunimi eqqakkanik isumaginninnerup pitsanngorsarnissaa, aamma ESANI suleqatigalugu eqqakkat immikkoortiterneqartarnerat ineriartortinnissaa.
Suleqatigiinnissamut isumaqatigiissummi nutaami suliassat arlallit eqqaaneqartut Siumup Inuit Ataqatigiillu suleqatigiinnissamut 2025-mi isumaqatigiissutaanniipput. Pingaartumik inissianut neqeroorutit assigiinngitsunilu sulisunut tunngatillugu.
