Namminersorlutik Oqartussat allaffeqarfissuani quleriit arfineq-pingajuanni allaffik kujammut sammisoq teqeqqumiittoq iserlugu tukakujuppoq. Iigaq imarluaqivoq assilissallu nivinngarneqartussaanngikkunik peerneqarsimasut sumi tamaaniipput.
Issiavimmi ataatsimiiffiusartumi angut issiasoq qiviaraanni inip qanoq inneranut sanilliullugu allarluinnaavoq. Allaffimminut iserteramili tusagassiortunit siullermeerluni apersorneqassagami piareersarsimasoq takuneqarsinnaavoq. Pappilissat piareersarsimasai saatungaaniipput, nutsani inisseqqissaarsimavai naapisimaarnissaalu minutsinik 45-nik piffissalerneqarsimasoq aallarteriaannanngorpoq.
Juulut, qanoq ippit?
- Ajunngeqaanga, aamma inuunermi naatsorsuutiginikuunngisat issiaviit ingiffigalugit tupinnarpoq. Taamaattorli piareersimasutut misigisimajuaannarnikuuvunga, suliassaqarfinnut soqutigisannut sumulluunniit pigaluaruma, Jørgen Rosbach Avatangiisinut, Pinngortitamut, Nukissiutinut, Ilisimatusarnermullu Naalakkersuisutut qaammat kingulleq ivertinneqartoq taama oqarpoq.
Qannartama affaa piumasoq affaa piumanngikkaluarpoq
Jørgen Rosbach 40-nik ukioqarpoq marlunnillu ilinniagaqarluni. IT-administratoritut ilinniagaqarnermi saniatigut siorna aasakkut ilinniartitsisunngorpoq.
Ilinniartitsisutut ilinniarnini naammassiliivillugu Inatsisartunut qineqqusaarnini eqqaamalluarpaa.
- Qineqqusaarpunga misilitseqattaarnerma nalaani. Aallaruma, qineqqusaaruma, misilitsissutissakka piareersarukkit, tikikkuma misilitsikkuma, qineqqusaaruma. Piffissartaa aaqqissuulluagaasutut tupinnartorujummik overlappeqarnani (qaleriittoqarnani aaqq.) inissinnikuuvoq, Jørgen Rosbach oqarpoq nangillunilu.
- Inuuneq allatorluinnaq naatsorsuuteqarfiginikuugaluarpara. Politikkiuna soqutigisariginga, kisianni nammineerlunga sassarnissara ajattarneqarujussuanngikkuma nalunngilara sassarsimajunnanngikkaluarlunga.
Facebookimi quppernini atorlugu politikki pillugu isummersortuartarmat sassarnissaanik kaammattuisut amerliartuinnarput.
Inatsisartunullu qineqqusaassalluni siorna aalajangeriasaarpoq.
- Qineqqusaarpunga eqqumiittorujummik, sidste øjeblikingajallunga. Tarnima illuatungaata angeraa, qamuuna naaggaajusallunga.
- Perusunngittoq tassaavoq innuttaasutut nalinginnaasutut inuuneqarusunneq. Tamanut fjernsynikkut nuisaqattaartuunani. Unali kajumissuseqalersitsivoq inuit tapersersuinerat taavalu misigititsinerat: Aqqusaakkatit, ilisimasatit ilinniarsimasatit isummertarnitillu piareersimapput, Jørgen Rosbach oqarpoq.
Politikki ungasittutut misinnarsinnarluni qanilleriasaarpoq
Qineqqusaarnermini taaguunneqarluarluni Inatsisartunut siorna ilaasortanngorpoq. 354-inimmi taaguunneqarami Demokraatit sassartitaanni qinerneqarnerpaat sisamaattut inissippoq. Politikkip silarsuaani sulineq aallartippoq. Silarsuaq tunuarsimaarfigisarsimasaq iserfigaa.
- Nuannerpoq qineqqusaarnerput isigigaanni. Partiit allat, inuit nutaat takunikuunngisat kiisalu fjernsynikkuinnaq ilisarisimasat atit angisuut. Taakkua akornannut ingeriasaarluni eqqumiissuaarpoq, ilumuuittumik eqqumiippoq, Jørgen Rosbach illarlunilu oqarpoq.
Inatsisartunili avatangiiserilikkani aamma taama ungasitsiginagit paasiartupallappaa.
- Politikki ungasittutut misinnarsigaluartoq qanilleriasaarpoq. Atassummeersoq Aqqalu meeraaqatikora, Demokraatini Nivi meeqqat atuarfiani atuaqatikora, taava illortaamma aqqalua Jens-Frederik. Siaarlualaaginnarani partiinut allanut Kuno Fencker Naleqqameersoq, Iluliarmioqatiginerani kammalaatitut naapilaartarnikuuara. Efterskoleqatikunni aamma isertoqarpoq, Naleqqameersoq Isak.
- Taava qanoq pinerpoq allaannginnami politikerit ittoornarunnaariasaartut. Taamaammat tunuarsimaarfeqarnanga imminullu kisinnanga akuuvunga, Jørgen Rosbach oqarpoq.
Politikkili aamma tassaavoq isummat aporaaffiata qitia.
- Allarujorujuuvoq politikeriulluni, aamma nalunngereernikuuara. Aningaasartassaanut aportartussaagatta.
Juulut apeqqarissuullunilu paasissutissanik nuannarinnittoq
Jørgen Rosbach politikkimut isinngikkallarami suligaluarluniluunniit malinnaajuartarpoq.
- Politikkimut nalunngilara immaqa malinnaavallaartoornikuullunga. Suligaluallaruma siutequtit atillugit malinnaasarnikuuvunga. Allaat apererusuttaraluarlunga "uani imaannikuuvoq." Ukiunut qulinut kingumut utersinnaallunga, Jørgen Rosbach oqaluttuarpoq.
Malinnaaffigisartagaasa ilaginikuuaat paragraf 37 tunngavigalugu Inatsisartut Naalakkersuisunut apeqqutaasa akissutaat. Namminerlu aperisinnaalerami, partiimini apeqquteqarnerpaalluni siorna 18-eriarluni apeqquteqarpoq.
Siunnersuuteqassatilluni paasissutissanik toqqammaveqarumalluni apeqquteqartarnikuulluni nassuiaavoq.
- Uanga nammineq sumiikkaluaruma toqqammaveqarnissaq ilisimasaqarnissarlu nuannarisorujuusarikka, Jørgen Rosbach oqarpoq.
Politikeriussagaanni paasissutissaannaat pineqarsinnaanngillat, immaqa? Imaluunniit?
- Tassami. Politikeriussagaanni oqaloriaaseqarpoq, inuit uummataanut pilaarsinnaanissaq.
Maanna tassa atuuffigilikkani iserfiginiarsaraa. Atorfilittat suliat killiffii pillugit paasisaqarfiginiarlugit naapillattaavai, soqutigisaqartut aamma naapittaqattaagaanut ilaapput.
Naalakkersuisoqatigiit siorna suleqatigiilernerminnit partiimik ataatsimik ilanngareersut, naalakkersuisunullu ilaasortani quliusuni sisamat tunuareersut ilannguffigai.
- Akunnattoorutiginngiivillugit ukua massakkut paarisakka angernikuuakka, aamma ingerlanneri peqataaffiginerilu nuanneqaat.
Naalakkersuisunulli ilaasortanngorneq oqitsuinnaanngilaq.
- Naalakkersuisuni sulineq aamma sakkortuvoq. Oqaraanni ikerinnarmi uanga ikkuppunga. Suna tamarmi assakaasoq ingerlareersoq. Malinnaaniapiloorneq itingannginnissaq. Taavalu naalakkersuisutut akisussaaffiup sukkanerpaamik atiniapiloornera. Tassaniinneruvoq, Jørgen Rosbach oqarpoq.
Atorfilittat ikiuulluarneratigut naalakkersuisutut atuuffimi iserfiginiarnera oqinnerusoq oqaluttuaraa. Ataaserli qularnanngilaq, naalakkersuisutut sulineq oqimaattunik naapitsiffiusarumaarpoq.
Ilungersuummertillunilu aalajangersimasumik pissuseqalertarami pissuseq taanna atillattaalissajunnarsigunarpaa.
- Iluliarmiorpalunnera tasisuaarunnaarnikuugunarami, Nuummiuunikuugama Iluliarmiuunikuuninniit sivisunermik. Sumiorpaluutit taakkua nuannarineqartarput, ilungersuleraangama aterpaluttarakku Iluliarmiuunera, Jørgen Rosbach illarlunilu oqarpoq.
