Royal Greenlandimi Naalakkersuisut siulittaasuata Jens-Frederik Nielsenip (D) peqataaffigisaani ataasinngornermi ualikkut ataatsimeersuartoqarpoq.
Ataatsimeersuarnermi siulersuisuni ilaasortat marluk taarserneqarput, Juliane Henningsen Heilmann Morten Petersenilu ilaasortanngortinneqarlutik.
Juliane Henningsen Heilmann KNI-mi sulisoqarnermut, attaveqaqatigiinnermut piujuartitsinermullu pisortaavoq. Great Greenlandimi siulersuisuni siuttuunikuuvoq, kommunimi pisortaanerunikuulluni Inuit Ataqatigiillu sinnerlugit politikeriunikuulluni.
Morten Petersen DKI Holding A/S-imi siulersuisunut ilaasortaavoq Dansk Supermarked-imilu pisortaanerunikuulluni.
Taakku Karsten Høy aamma Arnanguaq Holm Olsen taarserpaat.
Niels Thomsen Royal Greenlandip siulersuisuini siulittaasuuginnarpoq, siulersuisullu siulittaasup tullianik namminneq toqqaassallutik.
